Adopcion Ta Algu pa Bo?

DJE CORESPONSAL DI SPIERTA! NA GRAN BRETANIA

“ADOPCION ta p’e beneficio di mucha, i no ta un areglo pa percurá yu pa pareha sin yu,” segun un trahador social británico. No obstante, ki bos e mucha tin generalmente den su adopcion?

Bo ta considerá adopcion di un yu? Anto bo ta enfrentá un decision cu no solamente ta emocional sino tambe incambiabel. Ki éxito e yu lo tin birando parti di bo famia?

Si bo ta un yu adoptá, bo sa ken ta bo mayornan biológico? Si bo no conocé nan, bo ta kere cu lo bo sintí bo diferente si bo conocé nan?

Bo ta un mama cu ta considerando pa duna bo yu pa adopcion of pa no dun’é? Adopcion realmente ta e único solucion i p’e mayor beneficio di bo yu?

Na 1995 mas cu 50.000 mucha a ser adoptá na Merca, i rond di 8.000 di nan a nace den estranheria. Cada bes mas hende ta adoptá yu di pais di estranheria. Segun e revista Time, durante e último 25 aña famia na Merca a adoptá mas cu 140.000 yu cu a nace den estranheria. Cifranan comparabel pa Europa ta Suecia 32.000, Hulanda 18.000, Alemania 15.000, i Dinamarca 11.000.

Bo ta considerá adopcion di un yu, of kisas pa duna bo yu pa adopcion? Hacimentu di adopcion kier men cu bo bida—i no e bida dje yu so—nunca lo keda mescos. Pareha cu ta adoptá yu por hustamente spera hopi placer, pero tambe nan tin cu ta prepará pa hopi problema i desilusion. Di igual manera, e dolor di curason cu un mama ta experenciá dunando su yu pa adopcion por nunca cura completamente.

Cada caso ta presentá e desafio di edificá of reedificá un bida hóben cu amor. E artículonan cu ta sigui lo presentá algun goso—i desafio—di adopcion di yu.