Un Súplica for di Curason

E SPIERTA! di 8 di mei, 1996, a contené un seri di artículo tocante e tópico di adopcion. Tabata un sorpresa agradabel pa mira e reaccion cu nos a ricibí di lectornan for di tur parti di mundu. E siguiente carta tabata particularmente conmovedor.

“Mi ta sinti cu mi tin cu resaltá cu hopi di nos cu a duna nos yu pa adopcion, en berdad kier a ten’é. Mi tabata un tiener soltera cu tabata bai scol ainda. Asina cu mi mayornan a haña sa cu mi tabata na estado, nan a duná mi di comprendé cu mi mester pone e bienestar dje mucha promé cu esun di mi i dun’é pa adopcion. Nan a bisá mi cu ‘un baby mester di tantu un mama como un tata,’ locual ami no por a duna. Mi mayornan no tabata kier pa mi keda cu e baby—no tabatin lugá den nan cas pa mi si mi tabatin un baby. Kico mi por a haci? Nan a trece e argumento: ‘Lo bo keda resentí cu bo baby pa motibu di a kita bo libertad.’

“Asina cu mi estado a cuminsá bira bisto, nan a kitá mi for di scol i a mandá mi leu pa biba cu un famia. Ora mi a sali for di cas, mi tabata sa cu lo mi no ta bon biní ei te ora mi duna lus i duna e baby pa adopcion.

“Nan a mandá mi na un institucion pa mamanan soltero. Ora e trahadora social a puntrá mi cu si mi tabata sigur di mi decision pa duna e baby pa adopcion, mi tabata sa cu e no a realisá cu mi no tabatin otro alternativa. AMI KIER A KEDA CU MI BABY! Semper mi a anhelá pa mir’é hari i ta felis. Boso lectornan mester sa cu hopi mama cu a duna lus ta sinti mescos cu ami a sinti.

“Nan no a duná mi ningun berdadero alternativa. Di manera cu mi a haci loke nan a bisá mi tabata den e ‘mihó interes’ dje mucha. I ami a biba cu un herida profundo desde e tempu ei. Mi ta preocupá cu mi yu lo por pensa cu mi nunca a interesá den dje i cu mi no tabata kier e.

“Awor, como un cristian, semper mi ta apreciá e conseho di Bijbel tocante e situacionnan mas difícil cu nos ta hinca nos mes aden dor di no aplicá e Palabra di Dios den nos bida. E ta mustra cu e manera mundano di razoná tin efectonan doloroso i di largu alcanse. Pero hende adoptá mester sa cu djis pasobra nan a ser duná pa adopcion, no ta nificá cu nan mama no tabata kier nan. Por fabor, laga nan sa esei!”