Adopcion—Pakico i di ki Manera?

PAKICO e cantidad di yu adoptá na Gran Bretania a mengua drásticamente durante e último 20 añanan? Dos motibu a ser sugerí—aborto legal ta mas disponibel i mas aceptacion di mama cu ta cria yu sin un esposo. Ser un famia cu un solo mayor ta ser mirá awor como un desafio cu por ta aceptabel den e areglo social djawe.

Sin embargo, un poco mas cu 100 aña pasá e situacion tabata diferente. Ora Polly, e mama di Edgar Wallace, e autor ingles di novela di crímen, a sali na estado dje yu di su doño di trabou, Polly a bai leu i a duna lus den secreto. Edgar tabatin nuebe dia di edad ora e partera a haci areglo p’e esposa di George Freeman, un peon n’e mercado di piscá di Billingsgate di Londen, cuid’é. E famia Freeman tabatin dies yu caba di nan mes, i Edgar a lanta yamá Dick Freeman. Polly a paga placa cu regularidad pa yuda mantené su yu, i e tata nunca a tende cu e tabatin un yu.

Awendia ora mama no kier yu, hopi bes autoridad civil ta aceptá responsabilidad pa nan. Autoridad civil ta cuida hopi yu pa motibu cu nan tin mester di proteccion contra abusu of pa motibu cu nan tin hendikep físico of mental. Mucha cu a bira huérfano debí na morto dje mayornan den guera i yu como resultado di violacion di hende muher ta ­aumentá constantemente e cantidad di yu cu ta sclama pa amor i proteccion di mayornan—es decir, sclama pa adopcion.

Adoptá of No Adoptá?

Nunca ta fácil pa adoptá yu, i nunca ta sabí pa dicidí lihé ora bo ta considerá di hacié. Si bo a perde un yu, por ta mihó pa warda pa bo recobrá dje shok i e pena promé cu bo tuma un decision final tocante adopcion. Mescos por ta cierto di un pareha cu ta descubrí cu nan no por haña yu.

Tur yu ta heredá nan propio característica genético. Hopi bes inclinacion di nan mes yunan ta sorprendé nan mayornan, pero ta difícil pa calculá e potencia mental i emocional di yu adoptá cu tin mayornan desconocí.

Bo ta duna hopi balor na bon punto na scol? Si ta asina, con lo bo sintí bo si un yu adoptá no ta alcansá loke bo a spera? Bo por enfrentá e desafio di un yu cu hendikep mental of físico?

Oficinista entrená na agencia di adopcion of trahador social di gobiernu lo repasá pregunta asina cu bo promé cu bo tuma un decision final. Nan interes principal ta p’e seguridad i felicidad dje mucha.

Si Bo Dicidí di Adoptá . . .

Cada pais tin nan mes ley i reglamentu di adopcion cu bo mester studia. Den Gran Bretania tin cientos di agencia di adopcion, i generalmente nan ta cooperá cu autoridadnan local di gobiernu. Cada agencia tin nan mes regla.

Specialmente popular na Gran Bretania ta reunion pa adopcion, unda vários posibel mayornan por inspeccioná mucha disponibel pa adopcion, sin e presion emocional cu por presentá ora bo ta inspeccioná un solo mucha. E ambiente trankilu ta haci mas fácil pa posibel mayornan dicidí di no adoptá un cierto mucha i ta haci ménos probabel p’e yu keda desilusioná, ya cu ningun mucha individual ta ricibí tur e atencion.

Generalmente tin un límite di edad pa adulto cu kier adoptá, probablemente 35 of 40 aña di edad—aunke hopi bes esei ta aplicá na adopcion di yu chikitu i no necesariamente na mucha mas bieu. Agencia di adopcion ta bisa cu límite di edad ta tuma na cuenta e posibel largura di bida dje posibel mayornan. Sin embargo, nan sa cu hende di edad tin experencia di gran balor.

Hopi aña pasá pareha so por a haci areglo pa adopcion. Awe, hende no casá por solicitá i haña adopcion di cierto mucha. Ademas, desempleo i hendikep no ta necesariamente un motibu pa rechasá posibel mayornan. E cuestion básico tá, Kico tal areglo por ofrecé e mucha?

Asta ora un adopcion finalmente a ser finalisá, e mayornan por keda bou di observacion consistentemente pa sigurá cu tur cos ta sigui suavemente.

Adoptá Mucha di un Otro Rasa?

Na Gran Bretania trinta aña pasá tabata difícil pa ofrecé yu scur pa famia scur, i como resultado, famia blancu a adoptá nan. Desde 1989 e sistema nacional na Gran Bretania ta di ofrecé yu pa adopcion pa mayornan dje mésun rasa. Nan a kere cu dje manera ei un mucha por identificá mas fácil cu su mes rasa of cultura. Sin embargo, esei a ­resultá den algun situacion straño.

Recientemente The Sunday Times a informá di algun mayor blancu cu a ser “reclasificá como ‘scur’” pa nan por adoptá un yu scur. No ta straño pa mayornan blancu cria yu scur, locual kier men cu nan ta cuid’é pa un tempu. Pero si despues e mayornan ta ser nengá e derecho di adoptá e yu ei permanentemente, e resultado ta trauma emocional pa yu i tambe mayornan.

Un pareha di Escocia, cu pa seis aña a cria dos mucha di India, recientemente a enfrentá un problema típico di adopcion di mucha di otro rasa. E corte a permití e adopcion con tal cu e mayornan “haci nan mihó esfuerso pa garantisá p’e yunan ser concientisá di nan identidad [racial] i criá cu un comprendimentu di nan orígen i tradicion racial,” segun The Times. Den e caso aki e mayornan adoptivo tabata haci esei caba. E yunan tabata siñá e idioma di punjabi i avéces tabata bistí na moda di punjabi.

Hopi hende ta di acuerdo cu e opinion dje bosero dje servicio social británico cu a bisa cu adopcion di mucha di otro rasa mester ta permití mas libremente. El a bisa, “Nos ta biba den un areglo social multicultural i criamentu i adopcion mester reflehá esei.”

Adoptá Mucha di Estranheria?

Adopcion di yu di pais stranhero ta un ‘negoshi aumentante,’ segun e corant The Independent. Aunke informe ta indicá cu algun tráfico por ta ilegal, Oost Europa ta un fuente principal di mucha pa Gran Bretania.

Por ehempel, algun mucha cu a nace como resultado di violacion di hende muher durante e kibramentu di ex-Yugoslavia a ser bandoná. Segun opinion, otro yu lo a ser abortá si “traficante di mucha” no a entremeté, kende a primintí adopcion si e yu a nace normalmente. Pero, gobiernu di pais occidental ta preocupá p’e pagonan hací pa percurá cierto adopcion.

Un motibu pa mas preocupacion ta relacioná cu acusacion di falsificacion cu dokter ta haci di documento n’e tempu di nacementu. E corant The European a informá di acusacion di cu algun mama den Ucrania a ser bisá cu nan yu a nace morto. Tambe tabatin acusacion di cu e yunan aki a ser bendí despues. Otro mama por a ser bisá cu nan yu tabatin hendikep mental. Bou di presion asina, mama perturbá ta ser convencí mas fácilmente pa firma pa nan yu ser adoptá. Otro muchanan ainda kisas nunca no a yega weeshuis unda nan tabata mandá pero por a ser hibá na estranheria.

Rencor ta presentá den pais den desaroyo. Nan ta bisa cu e Occidente ricu mester haci mas pa yuda famia natural cuida nan yu den ambiente di nan cas en bes di hiba nan pa adopcion den un cultura di estranheria.

E Occidente mester comprendé tambe e tradicion hopi bieu di parientenan djacerca bibando den e mésun cas, e fundeshi dje comunidad den hopi cultura. Un mucha generalmente no ta falta cuido ora e ta biba den tribu, asta si e mayornan muri. Ademas di miembro inmediato di famia, tal como abuelo, otro miembro di famia incluyendo tanta i tio ta considerá cu e yu ta di nan, i no ta comprendé oferta di adopcion di parti di stranhero i ta considerá esei como entremetementu inaceptabel.a

No ta fácil pa haci areglo pa adopcion, i asta ora e ta finalisá, trabou duru ta necesario p’e gosa bon éxito. Pero manera nos lo bai mira, tin gran goso tambe.

[Nota]

[Kuadro na página 5]

Mi Yu Lo Buscá Mi?

MI MAYORNAN a divorciá ora mi tabatin 11 aña di edad. Mi tabata desesperá pa haña amor. Ora mi tabata den colegio, mi a drenta den un relacion romántico; esei tabata mi manera pa haña cariño. Anto mi a keda shangriná ora mi a haña sa cu mi a sali na estado. Tabata asina ridículo. Ami i mi compañero tabata mashá hóben. Mi nunca a usa droga, alcohol, of tabaco, pero uso di LSD den pasado a perhudicá mi compañero hopi.

Mi a haña e conseho di cometé aborto, pero mi tata a saca esei for di mi cabes. Mi no tabata kier ta na estado, pero tampoco mi no ­tabata kier a destruí un bida. Ora mi yu a nace na 1978, mi a dicidí di no dun’é e fam di su tata, pa eliminá cualkier reclamo di derecho di tata. Realmente, mi a cumbiní pa hende adoptá e yu na su nacementu; di manera cu e tabata kitá for di mi mesora i poní bou di cuido social temporal. Ami ni sikiera a mir’é. Pero, e ora ei mi a cambia di idea. Mi a kita mi yu for di cuido temporal i a purba desesperadamente di cri’é mi so. Pero, mi no por a hacié, i mi casi a sufri di un colapso emocional.

Mi yu tabatin rond di seis luna di edad ora e órden pa adopcion tabata aprobá i mi tabatin cu lagu’é bai. Mi ta corda cu mi a sintí mi como si hende a hincá mi cu un cuchú. Mi a muri emocionalmente. Solamente desde cu mi a ricibí conseho profesional durante e último dos añanan mi por a establecé relacion personal significante. Mi no por a pena—mi yu no a muri. Pero mi no por a pensa riba dje tampoco—mi a nenga di permití mi di haci esei. Tabata horibel.

Loke ta causa mas dolor ta di tende hende bisa: “Si bo ta entregá bo yu pa adopcion, bo no ta stim’é.” Pero esei no tabata cierto den mi caso! Pa motibu cu mi a stima mi yu mi a entregu’é! Te n’e último minuut, mi a sigui puntra mi mes: ‘Ki solucion tin pa mi problema? Kico mi por haci?’ No tabatin alternativa. Mi tabata sa cu mi no por mas i cu mi yu lo sufri si mi purba di keda cuné.

Na Inglatera, e areglo social awor ta aceptá famianan cu un solo mayor—pero esei no tabata e caso ora mi a duna lus. Mi ta deseá cu mi tabata por a duna mi yu cuido adecuado. Mi ta suponé cu e conseho cu mi a ricibí recientemente por a yuda, pero ta muchu lat awor. Mi yu ta na bida ainda? El a crece pa ser ki sorto di hende? Na edad di 18 aña, yu adoptá tin ­derecho legal di busca nan mayornan. Hopi bes mi ta puntra mi mes si mi yu lo buscá mi.—­Contribuí.

[Kuadro/Plachi na página 8]

Adopcion A Sali Bon pa Nos

NOS tabatin dos yu homber tiener i nos tabata un famia británico uní i contentu. Nos nunca a pensa di haña un yu muher— i di otro rasa. Anto Cathy a drenta den nos bida. Cathy a nace na Londen, Inglatera. Nan a cri’é católico romano, pero como mucha el a bai cu su mama na algun reunion den Salon di Reino di Testigo di Jehova. Pero, na 10 aña di edad nan a pon’é den cas di huérfano.

Aunke tabata mas difícil p’e asina, tog el a logra riba su mes cuenta di asistí na reunion den Salon di Reino, e lugá unda nos a conoc’é. Cathy tabata un mucha atento. Ora ami i mi esposa a bishit’é den e cas di huérfano, nos a ripará cu e muraya cant’i su cama tabata tapá cu potret di animal i paisahe, distinto di potret di strea popular cu e otro mucha muhernan tabata plak riba muraya.

Un poco tempu despues Cathy tabatin cu presentá dilanti di un comité di evaluacion cu a puntr’é si e kier a bandoná e cas di huérfano i bai biba cu un famia. El a contestá: “Cu un famia di Testigo di Jehova so.” Ora Cathy a conta nos tocante esei i loke el a bisa, nos a cuminsá pensa riba dje. Nos tabatin un kamber extra. Nos por a aceptá tal sorto di responsabilidad? Como un famia, nos a papia i a haci oracion tocante dje. Tabata solamente hopi tempu despues cu nos a descubrí cu e moda ei—pidi opinion dje mucha—tabata un experimento nobo di parti dje servicio social, un experimento cu nan tabata documentá n’e tempu ei.

E servicio social a haci investigacion di nos cerca polis i nos dokter i a obtené recomendacion personal. Pronto nos a yega na un acuerdo. Nan a bisa cu nos por hiba Cathy como un experimento i si nos no gust’é, nos por mand’é bek! Esei a duna nos un shok, i nos a para firme bisando cu nos nunca lo haci esei. Cathy tabatin 13 aña di edad ora nos a adopt’é oficialmente.

E enlace di amor special entre nos tur ta sigui bira mas fuerte. Awor Cathy ta sirbi como pionero den un congregacion frances di Testigo di Jehova den e nort di Londen. E aña cu el a sali for di cas pa bira pionero, el a skirbi nos un nota conmovedor: “Un refran ta bisa cu ‘bo no por scoge bo famia.’ Pero, mi kier gradicí boso for di mi curason cu boso a scogé mi.”

Nos ta mashá gradicidu cu Cathy a bira miembro di nos famia! Como miembro di nos famia, el a haci nos bida mas completo. Adopcion a sali bon pa nos!—Contribuí.

[Plachi]

Cathy cu su mayornan i rumannan adoptivo

[Plachi na página 7]

Hopi mucha ta sclama pa amor i proteccion di mayornan