Enfermedad di Lyme—Bo Ta den Peliger?

MIENTRAS cu AIDS ta e noticia principal, enfermedad di Lyme casi no ta ser mencioná. Pero, enfermedad di Lyme ta plamando cu rapides. Realmente, un poco aña pasá, The New York Times Magazine a yam’é “e enfermedad contagioso di aumento mas rápido na [Merca] despues di AIDS.” Informenan di otro pais ta mustra cu e enfermedad ta plamando na Asia, Europa, i Sur América tambe.

Kico ta enfermedad di Lyme? Con e ta plama? Bo ta den peliger?

Carpata, Biná i Abo

Rond di 20 aña pasá, un aumento misterioso den casonan di artrítis a sosodé den e pueblo di Lyme, Connecticut, i rond di dje, locual ta situá den e parti nortoost di Merca. E víctimanan tabata principalmente mucha. Nan artrítis a cuminsá cu grawatamentu, dolor di cabes, i dolor di djoint. Un residente a bisa cu pronto su “esposo i dos dje yunan tabata riba kruk.” Pronto, mas cu 50 hende den e becindario a ser afectá, i dentro di poco aña, miles di hende tabata sufri dje mésun síntomanan doloroso.

Investigadornan, mirando cu e enfermedad aki tabata diferente cu otro malesa, a yam’é enfermedad di Lyme. Kico tabata e causa? Borrelia burgdorferi—un bacteria cu forma spiral bibando den carpata. Con e ta plama? Hende canando den campo por contra cu un carpata infectá. E carpata ta bora cueru dje persona desafortuná i inyectá bacteria cu ta causa e malesa. Siendo cu e carpatanan infectá aki hopi bes ta pega na biná, ta chupa nan sanger i ta cria famia riba nan i siendo cu mas hende ta bai biba den campo unda cu biná ta aumentá, no ta straño cu hende cu enfermedad di Lyme ta aumentando.

Síntoma i Problemanan

E promé síntoma di enfermedad di Lyme generalmente ta uitslag di cueru (yamá erythema migrans, of EM) cu ta cuminsá como un mancha corá chikitu. Durante un periodo di dianan of simannan, mancha indicador ta crece pa bira un uitslag rondó, triangular, of oval cu por ta e tamaño di un depchi of por plama riba tur e hanchura di bo lomba. Hopi bes bo ta haña keintura, dolor di cabes, nek stijf, dolor di curpa, i cansancio huntu cu e uitslag. Si nan no ta haña tratamentu mesora, mas cu mitar di tal víctima ta sufri di atake di dolor di djoint cu ta hincha, locual por dura pa hopi luna. Te na 20 porciento di víctimanan cu no ta haña tratamentu ta haña artrítis crónico. Aunke e ta ménos comun, e malesa tambe por afectá e sistema di nervio i causa problema di curason.—Mira e cuadro.

Hopi experto ta considerá enfermedad di Lyme difícil pa diagnosticá pasobra síntomanan inicial parecido di griep ta similar cu síntoma di otro infeccion. Ademas, 1 di cada 4 hende infectá no ta haña uitslag—e único indicacion cu enfermedad di Lyme tin—i hopi víctima no ta corda si carpata a morde nan pasobra su mordí generalmente ta sin dolor.

Diagnósis dje malesa ta ser strobá mas ainda pasobra prueba di sanger pa descubrí anticuerpo cu ta disponibel actualmente no ta confiabel. Anticuerpo den e sanger dje víctima ta indicá cu e sistema di inmunidad dje curpa a detectá invasor, pero algun prueba no por mustra si tal invasor ta bacteria di enfermedad di Lyme. Pues, e prueba di un pashent por mustra positivo pero, en realidad, su síntoma por ta e resultado di infeccion di otro bacteria. P’esei, Instituto Nacional di Salú na Merca (NIH) ta consehá dokternan pa funda nan diagnósis riba si e persona ta corda cu un carpata a mord’é, síntomanan dje pashent, i un exclusion completo di otro malesa cu por a iniciá e síntomanan ei.

Tratamentu i Prevencion

Si e pashent ta haña diagnósis na ora, e mayoria di nan por haña tratamentu exitoso cu antibiótica. Miéntras mas pronto e tratamentu ta cuminsá, mas lihé i mas completo e recobramentu lo ta. Pa vários luna despues dje tratamentu, cansancio i dolor por persistí, pero e síntomanan aki lo mengua sin e necesidad di mas terapia cu antibiótica. Pero, segun e spiertamentu di NIH, “un encuentro cu enfermedad di Lyme no ta duna garantia cu e mésun persona lo no hañ’é atrobe.”

Tal prospecto inkietante nunca lo cambia? Un anuncio di noticia dje Scol di Medicina di Universidad di Yale na Merca a bisa cu investigadornan a desaroyá un vacuna experimental cu por prevení enfermedad di Lyme. E vacuna di “accion dobel” aki ta stimulá e sistema di inmunidad humano p’e producí anticuerpo cu ta atacá i ta mata bacteria invasor di Lyme. A la bes, e ta destruí tambe bacteria cu ta biba den carpata cu ta morde un víctima cu a ricibí e vacuna.

Segun Dr. Stephen E. Malawista, un dje investigadornan cu a descubrí enfermedad di Lyme na 1975, “Prueba dje vacuna aki ta un desaroyo principal den nos esfuersonan pa protehá hende di consecuencia potencialmente serio di enfermedad di Lyme.” Segun The New York Times, científiconan ta spera cu, den sector unda miedu dje malesa a haci hende keda cas, “e vacuna por haci posibel pa hende cana den campo sin miedu di carpata.”

Pero, entretantu, bo por tuma medida preventivo riba bo mes cuenta. NIH ta recomendá: Si bo ta cana den campo yen di carpata, cana den centro di caminda. Bisti un carson largu, un camisa cu manga largu, i un sombré. Hinca pia di carson den mea, i bisti sapatu cu ta tapa bo pia completamente. Bisti paña di color cla locual por yudá bo mira carpata. Ta eficas pa flit bo paña i cueru cu repelente di insecto, pero esei por causa efectonan secundario serio specialmente na mucha. Segun e spiertamentu di NIH, “Hende muher na estado mester ta specialmente cuidadoso pa evitá carpata den sector cu tin enfermedad di Lyme, pasobra e infeccion por pasa n’e yu cu no a nace” i por aumentá e posibilidad di perdementu di barica of un yu nací morto.

Tan pronto cu bo ta drenta cas, inspeccioná bo curpa i bo yunan pa carpata, specialmente den e partinan di bo curpa cu tin cabei. Haci esei cuidadosamente pasobra carpata chikitu ta tantu chikitu como e punto na fin dje zin aki i bo por fácilmente mir’é pa un pida di sushi. Si bo tin bestia di cas, inspeccioná nan promé cu nan drenta bo cas—nan tambe por haña enfermedad di Lyme.

Con bo por kita carpata? No cu bo dede sino cu pincet stompi. Dal un rancá suave pero firme cerca e cabes dje carpata te cu e ta los su gara riba e cueru, pero no primi su curpa. Anto laba rond dje mordí cabalmente cu antiséptico. Segun Dr. Gary Wormser, un specialista mericano di malesa infeccioso, kitamentu di carpata dentro di 24 ora, por salbá bo di infeccion di enfermedad di Lyme.

Ta cierto cu, asta unda cu tin hopi carpata, tin poco posibilidad di haña e enfermedad incapacitante di Lyme. No obstante, tal precaucion senciyo por haci tal posibilidad chikitu asta mas chikitu. Tal proteccion ta bale la pena? Puntra cualkier hende cu ta sufri dje enfermedad di Lyme.

[Kuadro na página 22]

Indicacionnan dje Enfermedad di Lyme

Principio di Infeccion

○ Uitslag di cueru

○ Dolor di curpa i di djoint

○ Dolor di cabes

○ Nek stijf

○ Cansancio significante

○ Keintura

○ Parálisis di cara

○ Meningítis

○ Atakenan breve di dolor i hinchamentu di djoint

Ménos comun:

○ Inflamacion di wowo

○ Biramentu di cabes

○ Falta di rosea

Infeccion mas Despues:

○ Artrítis, tempu-tempu of crónico

Ménos comun:

○ Perdementu di memoria

○ Dificultad cu concentracion

○ Cambio di humor of custumber di drumi

Un of mas di e síntomanan aki por presentá na diferente tempu durante e infeccion.—Lyme Disease—The Facts, the Challenge, publicacion di Instituto Nacional di Salú.

[Plachi na página 23]

Un paseo den campo por causa rísico

[Plachi na página 24]

Un carpata (hopi aumentá)

[Rekonosementu]

Yale School of Medicine

[Plachi na página 24]

Carpata (tamaño real)