E Punto di Bista Bíblico

E Amor Cu Ta Yuda Nos Mantené Serenidad

NA 1978 un tormenta enorme den e océano Nort Atlántico a golpia e luhoso crusero Queen Elizabeth 2. Olanan mes haltu cu un edificio di dies piso a dal contra e barcu i a hacié sagudí manera un korki den awa. Mueblenan i pasaheronan a ser tirá p’aki-p’aya segun cu e nave tabata ser bentá di un banda pa otro violentamente. Tabata algu remarcabel cu e 1.200 pasaheronan a ricibí solamente heridanan chikitu. Bon ingenieria, material i construccion a pone cu e barcu no a kibra for di otro.

Siglonan pasá tabatin un otro barcu cu a cai den e gara di un tormenta tempestuoso. Apostel Pablo huntu cu 275 otronan tabata na bordo. Dor cu nan a teme cu e intensidad dje tormenta lo a kibra e barcu na pida-pida, e marineronan aparentemente a pasa “yudansa”—cadenanan of cabuyanan—bou dje barcu di un banda pa otro pa wanta e plankinan huntu cu a forma e barica dje barcu comercial aki. Tur e pasaheronan na bordo a scapa, aunke e barcu a bai perdí.—Echonan, capítulo 27.

Tin biaha pruebanan den bida por haci nos sinti como si fuera nos ta riba un barcu den laman turbulento. Olanan di ansiedad, decepcion i depresion por dal pasa riba nos, poniendo nos amor na prueba te na su límite. Pa nos resistí tormentanan asina i evitá cu nos ta cai for di otro, na moda di papia, nos tambe tin mester di algun yudansa.

Ora Tormentanan Lanta Cabes

E fe i awante di apostel Pablo ta bon documentá den Bijbel. El a traha duru na fabor dje congregacionnan cristian di promé. (2 Corintionan 11:24-28) Loke el a logra den e trabou di Señor ta duna evidencia claro di su amor intenso pa su próhimo i su relacion fuerte cu Dios. Sin embargo, e bida di Pablo no tabata semper un nabegacion suave. E apostel a pasa dor di hopi tormenta literal i figurativo.

Den Pablo su tempu, ora un barcu a topa cu un tormenta turbulento, e sobrebibencia dje pasaheronan i dje barcu a dependé dje abilidad dje tripulantenan, como tambe di con bon e barcu a wanta sin kibra for di otro. Esaki tabata cierto tambe ora e apostel a topa cu tormentanan figurativo. Aunke Pablo a pasa dor di necesidad físico, encarcelacion i tortura, e tormentanan di mas severo cu a pone na prueba su stabilidad spiritual i emocional i tambe su abilidad pa sigui stima, a bini for di paden dje congregacion cristian.

Por ehempel, Pablo a traha incansablemente pa un aña i mei pa establecé e congregacion den e stad di Corinto. Su experencianan cu e corintionan a haci cu el a desaroyá sintimentunan tierno pa e tou. Pablo a asta papia di su mes di ta manera un tata pa nan. (1 Corintionan 4:15) Sin embargo, apesar di su registro di amor i trabou duru na fabor dje congregacion, algun ruman na Corinto a papia di un manera ofensivo di Pablo. (2 Corintionan 10:10) En bista di tur loke el a haci den sacrificio propio, ki desalentador esei mester tabata!

Con esnan na ken Pablo a duna su amor ilimitadamente por tabata asina cruel i despreciativo? Pablo mester a sinti como si fuera nan tabata kibr’é for di otro, manera un barcu cu ta den e gara di un tempestad. Ki fácil lo tabata pa e entregá, sinti cu tur su esfuersonan di pasado tabata en bano, of pa e bira amargá! Kico a yuda Pablo mantené su serenidad? Kico a previnié di cai for di otro pa motibu di decepcion?

E Amor cu Ta Yuda Nos Mantené Serenidad

Pablo no a laga duda den e mente di su lectornan tocante e fuente di tantu su fortalesa como su motivacion. El a skirbi: “E amor cu Cristo tin ta obligá nos.” (2 Corintionan 5:14) Pablo a señalá n’e fuente superlativo di fortalesa i motivacion. E forsa impulsador ta “e amor cu Cristo tin.” Un erudito bíblico a haci e siguiente remarke tocante e texto aki: “Pablo no ta bisa cu nos amor pa Cristo ta haci nos pega na nos ministerio . . . Esei lo ta solamente un banda dje medaya. Nos amor pa Cristo ta ser cendé i nutrí constantemente dor di su amor pa nos.”—Letternan cursivo ta di nos.

E amor cu Cristo a demostrá dor di someté su mes na un morto agonisante riba un staca di tormento—dunando asina su bida humano perfecto como un rescate pa salba henter humanidad creyente—a motivá, obligá i a forsa Pablo pa sigui sirbi den e interesnan di Cristo i dje hermandad. Dje manera ei, e amor di Cristo a controlá Pablo, impidiend’e di desplegá egoismo, i poniend’e limitá su metanan n’e sirbishi di Dios i di su semehante.

En berdad, e fuente di motivacion tras dje curso di bida fiel di un cristian ta e amor di Cristo. Ora nos ta enfrentá pruebanan cu por tin un efecto debilitador riba nos físicamente, emocionalmente i spiritualmente, e forsa impulsador dje amor di Cristo ta capacitá nos pa bai mas ayá dje punto caminda un hende ménos motivá lo a entregá. E ta duna nos e fortalesa pa wanta.

Nos no por dependé riba nos emocionnan imperfecto pa sostené i motivá nos. Esaki ta specialmente e caso ora nos pruebanan ta bini como resultado di decepcion of ansiedad. Na otro un banda, e amor di Cristo tin e poder di haci nos pega na nos ministerio, pa sostené i motivá nos, sea cual sea nos prueba personal. E amor di Cristo ta capacitá un cristian pa wanta, no solamente mas ayá di loke otronan a spera, sino a lo mehor asta mas ayá di loke e mes a spera.

Ademas, ya cu e amor di Cristo ta permanecé pa semper, e efecto no ta caba nunca. E ta un forsa impulsador cu no ta bira swak ni no ta mengua. “Amor nunca ta faya.” (1 Corintionan 13:8) E ta capacitá nos pa nos continuá siguiendo Cristo fielmente, kico cu pasa.

Pruebanan emocional tin un forsa cu por kibra nos na werki. Ta ki vital, anto, pa nos meditá riba e amor cu Cristo a demostrá pa nos. E amor di Cristo lo yuda nos mantené nos serenidad. Su amor ta haci posibel pa nos evitá di sufri naufragio di nos fe. (1 Timoteo 1:14-19) Ademas, e amor di Cristo ta obligá nos haci tur loke nos por pa glorificá esun cu a haci e expresion dje amor di Cristo posibel, Jehova Dios.—Romanonan 5:6-8.