Hóbennan Sa Puntra . . .

Con Mi Por Trata cu Faboritismo?

“Mi ruman muher ta dos aña mas yong cu mi i e ta haña tur atencion. . . . Esei no ta parcé mi hustu.”—Rebecca.a

MAS atencion bo ruman haña, mas bo por sintí bo neglishá. Anto si bo tin un ruman cu tin abilidadnan sobresaliente, cu ta pasando dor di problemanan serio of tin mésun interes of rasgonan di personalidad cu bo mayornan, lo bo por tin un berdadero lucha djis pa haña un tiki atencion! Mas bo pensa riba dje, mas dolor i rabia lo bo por sinti.b

Sin embargo, Bijbel ta spierta: “Agitá, pero no peca. Bisa loke boso kier bisa den boso curason, riba boso cama i keda ketu.” (Salmo 4:4) Ora bo ta rabiá i sará, tin mas probabilidad cu lo bo bisa of haci algu cu lo duel bo despues. Corda con Cain a rabia pa motibu cu Dios a faborecé su ruman, Abel. Dios a spiert’é: “Tin picá di bùk n’e entrada, i su deseo fuerte ta pa bo; i abo, di bo parti, lo logra domin’é?” (Génesis 4:3-16) Cain no a logra dominá su sintimentunan, i e resultado tabata desastroso!

Claro, abo no ta na punto di bira un asesino manera Cain. Pero tog faboritismo por lanta sintimentu i emocionnan masha mahos den bo. Kisas tin peliger di bùk na bo porta! Cua ta algun dje peligernan ei? I con bo por logra dominá e situacion aki?

Frena Bo Lenga!

Ora Beth tabatin 13 aña, el a pensa cu su mayornan a faborecé su ruman homber i a trata e inhustamente. E ta conta: “Ami cu mama tabata grita otro hopi, pero nos no tabata yega niun caminda. Ami no tabata scucha loke e tabata bisa i e no tabata scucha loke ami tabata bisa, di manera cu nos no tabata logra nada.” Kisas abo tambe a descubrí cu gritamentu ta solamente haci un situacion malu mas pió. Efesionan 4:31 ta bisa: “Boso kita tur amargura malicioso i furia i rabia i griteria i abla ofensivo for di boso, huntu cu tur maldad.”

Bo no tin nodi grita pa laga otro hende comprendé kico bo kier men. Di tur manera, bo ta logra mas si bo keda calmu. Proverbionan 25:15 ta bisa: “Cu pacenshi bo ta inducí un comandante, i un lenga suave mes por kibra un wesu.” Pues, si bo mayornan ta parce di mustra faboritismo, no grita i acusá nan. Warda te cu un momento apropiado, anto e ora ei papia cu nan den un manera calmu i respetuoso.—Compará cu Proverbionan 15:23.

Si bo ta enfocá riba e faltanan di bo mayornan of ta reprochá nan di ta asina “inhustu,” lo bo alehá nan for di bo of pone nan den defensiva. Mihó enfocá riba con nan accionnan ta afectá bo. (‘Mi ta sintí mi ègt malu ora boso ta ignorá mi.’) Tin mas chens cu nan lo tumá bo na serio. Tambe, “[sea] lihé pa tende.” (Santiago 1:19) Por ta masha bon cu bo mayornan tin motibunan legítimo pa duna bo ruman extra atencion. Kisas e tin problemanan cu abo no sa di dje.

Pero kico si bo tin e tendencia di explotá i papia sin pensa ora bo ta rabiá? Proverbionan 25:28 ta compará un “homber cu no tin freno pa su spiritu” cu un stad “cu no tin muraya”; ta hopi probabel cu su impulsonan imperfecto lo venc’é. En cambio, e abilidad di controlá bo sintimentunan ta un muestra di berdadero fortalesa! (Proverbionan 16:32) Pakico, anto, no warda te ora bo calma pa expresá bo sintimentunan, kisas asta warda te n’e siguiente dia? Tambe lo por ta bon pa kita bai for dje situacion, kisas bai cana of haci ehercicio. (Proverbionan 17:14) Dor di controlá bo lipnan, bo por evitá di bisa algu bobo of cu ta ofendé otronan.—Proverbionan 10:19; 13:3; 17:27.

Desobedencia Sutil

Un otro trampa cu bo mester evitá ta desobedencia. Marie di dieseis aña a ripará cu su ruman homber mas chikitu nunca ta haña castigu ora e stroba e studio di Bijbel di famia. Frustrá pa e aparente parcialidad aki, el a cuminsá “welga” i a nenga di participá den e studio. Abo a yega di keda sin papia cu niun hende na cas of a keda sin cooperá cu nada ora bo a haña cu tin cos inhustu?

Si ta asina, corda cu tácticanan sutil asina ta contrario n’e mandamentu bíblico pa onra i obedecé bo mayornan. (Efesionan 6:1, 2) Ademas, desobedencia ta daña bo relacion cu bo mayornan. Ta mihó pa papia cu nan di bo problemanan. Proverbionan 24:26 ta indicá cu esun “cu ta contestá den un manera directo” ta gana e respet di otronan. Ora Marie a papia tocante e asuntu cu su mama, nan a yega na un comprendimentu mutuo, i cosnan a cuminsá mehorá.

E Peliger di Isolá Bo Mes

Un otro manera masha malu pa trata cu faboritismo ta di alehá bo mes for di bo famia of busca atencion cerca hende no-creyente. Esaki ta loke a sosodé cu Cassandra: “Mi a apartá mi mes di mi famia i a acudí na hóbennan mundano cu kendenan mi a cera amistad na scol. Asta mi tabatin namorado sin cu mi mayornan tabata sa. Despues mi a bira hopi deprimí i tabatin un concenshi cu tabata molestiá mi pasobra mi tabata sa cu mi no tabata haci bon. Mi kier a sali for dje situacion, pero gewoon mi no tabata sa con pa bisa mi mayornan.”

Ta peligroso pa isolá bo mes for di bo famia i for di compañeronan creyente, foral ora bo ta rabiá i no por pensa cla. Proverbionan 18:1 ta spierta: “Un persona cu ta isolá su mes lo busca su mes anhelo egoista; contra tur sabiduria práctico lo e lanta.” Si bo ta haña cu ta difícil pa acercá bo mayornan awor aki, papia e asuntu cu un amigu cristian manera esun cu Proverbionan 17:17 ta describí: “Un berdadero compañero ta stima na tur tempu, i ta un ruman cu ta nací pa ora tin angustia.” Generalmente ta mas fácil pa haña “un berdadero compañero” asina entre e miembronan maduro dje congregacion.

Cassandra a haña “un berdadero compañero” ora e tabatin necesidad: “Ora e superintendente di circuito [minister biahero] a bishitá nos congregacion, mi mayornan a animá mi pa traha cuné. E i su casá tabata hende masha gewoon, i nan a mustra berdadero interes den mi. Mi por a ègt papia cu nan. Mi no a sinti cu nan lo condená mi. Nan tabata sa cu djis e echo cu bo a lanta como cristian no ta nificá cu bo ta perfecto.” Nan animacion i conseho maduro tabata net loke Cassandra tabatin mester!—Proverbionan 13:20.

E Peliger di Envidia

Proverbionan 27:4 ta spierta: “Tin e crueldad di furia, i tambe e inundacion di rabia, pero ken por keda pará dilanti yaluzí?” Algun hóben a cometé accionnan imprudente dor cu nan a envidiá i tabata yalurs riba nan ruman cu a ser faborecí. Un señora a confesá: “Tempu mi tabata chikitu, mi tabatin cabei maron fini i spiña, miéntras cu mi ruman muher tabatin hopi cabei, diki, color blond masha bunita cu a yega te na su cintura. Tur ora mi tata tabata elogi’é pa su cabei. E tabata yam’é ‘mi Raponzel.’ Un anochi ora mi ruman tabata drumí, mi a coge mama su skèr di corta paña, a cana bai poco poco na su cama i a corta mas tantu di su cabei cu mi tabata por.”−Siblings Without Rivalry, (Rumannan Sin Rivalidad) di Adele Faber i Elaine Mazlish.

Nada straño anto cu Bijbel ta describí envidia como un dje mal “obranan di carni.” (Galationan 5:19-21; Romanonan 1:28-32) Sin embargo, e “tendencia pa cu envidia” ta existí den nos tur. (Santiago 4:5) Pues si bo haña bo mes ta trama algu pa hinca bo ruman den problema, pa lagu’é keda laf of pa kibr’é den un of otro manera, por ta masha bon cu envidia ta “di bùk n’e entrada,” tratando di dominá bo!

Kico bo mester haci si bo descubrí cu bo tin sintimentunan malu asina? Promé, purba pidi Dios den oracion pa su spiritu. Galationan 5:16 ta bisa: “Sigui cana pa medio di spiritu i boso lo no cumpli cu ningun deseo carnal.” (Compará cu Tito 3:3-5.) Tambe lo ta bon pa refleccioná riba loke berdaderamente bo ta sinti pa bo ruman. Bo por ègt bisa cu bo no ta sinti niun tiki amor p’e, apesar di bo rencor? Wel, e Scritura ta bisa nos cu “amor no ta yalurs.” (1 Corintionan 13:4) Pues, rechasá e tendencia di keda pensa cosnan negativo cu ta lanta envidia. Purba di alegrá cu bo ruman ora e ta haña atencion special for di bo mayornan.—Compará cu Romanonan 12:15.

Tambe lo bo por ser yudá den esaki dor di combersá cu bo mayornan. Si nan keda convencí cu ta necesario pa duná bo mas atencion, e lo ta un gran yudansa pa bo vence e sintimentunan di envidia pa cu bo rumannan. Pero kico si cosnan no drecha na cas i e faboritismo sigui? No rabia, zundra of rebelá contra bo mayornan. Purba mantené un actitud obediente i di kier yuda. Si ta necesario, busca yudansa cerca esnan maduro den e congregacion cristian. Riba tur cos, hala cerca di Jehova Dios. Corda riba e palabranan dje salmista: “En caso cu mi mes tata i mi mes mama bandoná mi, asta Jehova mes lo ricibí mi.”—Salmo 27:10.

[Notanan]

[Plachi na página 19]

Dor di splica cu bo ta sintí bo menospreciá lo por solucioná e problema