E Soño Di Por Bula

“TUR mashin bulador a mustra masha lihé cu e refran for di tempu nos tabata yong, ta berdad, esta cu ‘tur loke subi mester baha.’ ”

Asina un editorial un poco sképtico den The New York Times di 25 di mei 1908 a cuminsá, ménos cu cincu aña despues cu e rumannan Wright a haci nan famoso vuelo na Kitty Hawk, North Carolina, Merca. E escritor no tabata convencí ainda dje éxito dje “mashinnan bulador” recien inventá cu a cuminsá aparecé den laira. Refleccionando, el a bisa cu “ta masha poco di nos tin e deseo di flota hopi haltu den aire.” Aunke el a reconocé cu kisas futuro generacionnan lo ta mas habrí pa cu tráfico aéreo, e artículo a sigurá cu e “soño di tin aereonave di pasahero cu ta bula distancianan leu . . . nunca lo por ser realisá.”

Esta ekibocá e prediccion ei a resultá di ta! Awe, tur aña mas cu mil miyon pasahero ta bula den “aereonave di pasahero cu ta bula distancianan leu.” Sí, den un siglo, avion a ser transformá for dje artefacto wabi-wabi trahá di palu i tela cu nan tabata na cuminsamentu di siglo 20, te na e aeroplanonan nèchi i computarisá djawe, cu ta bula na un haltura di 10 kilometer i ta carga cientos di pasahero pa destinacionnan leu den e comodidad di aire acondicioná.

E progreso rápido di tecnologia di aviacion den siglo 20 tabata remarcabel en berdad i el a cambia nos mundu drásticamente. En realidad, e historia di hende su intentonan pa logra bula ta bai bek hopi mas cu un par di década, i asta mas cu un par di siglo. For di tempu antiguo hende tabata obsesioná cu e soño di bula.

[Plachi na página 2, 3]

Lockheed SR-71 Blackbird, e avion mas rápido na mundu, cu un velocidad di 3.550 km/o

[Plachi na página 3]

Boeing Stratoliner 307, rond di 1940, 33 pasahero, cu un velocidad di 350 km/o

[Rekonosementu]

Boeing Company Archives

[Plachi na página 3]

“Flyer” di rumannan Wright, 1903

[Rekonosementu]

U.S. National Archives photo