E PUNTO DI BISTA BÍBLIKO
Angel
Bo ta haña angel den literatura, obra di arte i pelíkula. Pero ken nan ta, i kiko ta nan trabou?
Ken e angelnan ta?
LOKE BEIBEL TA BISA
Promé ku Dios a krea universo i e promé hendenan, ya kaba el a krea kriaturanan mas inteligente i mas poderoso. Nan ta biba huntu ku Dios den shelu, ku ta un lugá ku niun hende no por mira ni drenta aden. (Yòb 38:4, 7) Beibel ta yama e spiritunan akí ‘angel.’—Salmo 103:20; 104:4.a
Ta kuantu angel tin? Masha hopi mes. Beibel ta bisa ku tin “miónes di miónes” òf “10.000 biaha 10.000” angel rònt di e trono di Dios. (Revelashon 5:11; nota) Si nos tuma e ekspreshon ei literalmente, esei ke men ku tin sientos di miónes di angel.
“Mi a mira hopi angel rònt di e trono . . . Nan tabata miónes di miónes, i míles di míles.”—Revelashon 5:11.
Ki trabou e angelnan a hasi den pasado?
LOKE BEIBEL TA BISA
Hopi bes angel a sirbi komo bosero òf mensahero di Dios.b Tambe Beibel ta bisa ku Dios a duna nan poder pa hasi milager den su nòmber. Dios a manda un angel pa bendishoná Abraham i pa stòp e di sakrifiká su yu hòmber Isak. (Génesis 22:11-18) Ademas, un angel a aparesé na Moises den un mata ku tabata na kandela pa dun’é un mensahe ku a kambia su bida. (Éksodo 3:1, 2) I ora Daniel a ser tirá den e kueba di leon, “Dios a manda su angel i a sera boka di e leonnan.”—Daniel 6:22.
“I e angel di SEÑOR a aparesé na [Moises] den un kandela tur na vlam for di meimei di un mata.”—Éksodo 3:2.
Ki trabou e angelnan ta hasiendo den e tempu akí?
LOKE BEIBEL TA BISA
Nos no sa tur loke e angelnan ta hasiendo den nos tempu. Pero loke sí nos sa ta ku Beibel ta bisa ku nan ta yudando hende sinsero pa haña sa mas tokante Dios.—Echonan 8:26-35; 10:1-22; Revelashon 14:6, 7.
Den un soño, Yehova a laga e patriarka Yakòb mira angel ta subi baha un “trapi” entre shelu i tera. (Génesis 28:10-12) Kisas Yakòb a konkluí loke nos tambe por konkluí: Yehova ta manda angel na tera pa yuda hende leal ku tin mester di su yudansa.—Génesis 24:40; Éksodo 14:19; Salmo 34:7.
“Un trapi a wòrdu poné riba Tera ku su parti di ariba alkansando shelu. I mira, e angelnan di Dios tabata subi baha riba dje.”—Génesis 28:12.
a Beibel ta splika ku tin spiritu ku a rebeldiá kontra Dios, i Beibel ta yama e angelnan malbado akí ‘demoño.’—Lukas 10:17-20.
b De echo, e palabra original ku Beibel ta usa na hebreo i griego pa e palabra “angel” ta nifiká “mensahero.”