MONDI

Kiko Ta Pasando ku Nos Mondinan?

Tur aña, hende ta kap míles di miónes di palu; mayoria di bes ta pa kultivá tera, esta, prepará e tera pa planta. For di mas o ménos 75 aña pasá te ku awor, mitar di mundu su mondinan kaminda hopi awa ta kai a disparsé.

Ora un mondi ser destruí, tur e benefisionan di su sistema ekológiko i tur loke e mondi ta produsí ta ser destruí huntu kuné.

Nos Planeta A Ser Diseñá pa Sobrebibí

Asta na lugá kaminda hende a kap mayoria di e palunan, e palunan por bolbe kuminsá krese i e mondi por rekuperá. Algun ekólogo a keda sorprendí ora nan a opservá resientemente kon lihé un área kaminda hende a kap hopi palu a logra bira un mondi atrobe. Wak algun ehèmpel:

• Algun investigadó ta opservando kiko ta pasa den e áreanan kaminda hende ta kap e palunan di un mondi pa kultivá e tera pero despues nan ta stòp di kultiv’é i ta bandoná e área. Un estudio di 2.200 diferente área na Amérika i Wèst Afrika, ku a pasa den un situashon similar, ta mustra ku e áreanan por bolbe na nan estado original denter di dies aña.

• Segun un estudio ku e revista Science a publiká, e investigadónan ta kalkulá ku den mas o ménos 100 aña, e mondinan por bira bèk manera nan tabata promé ku a kap e palunan.

• Resientemente, algun sientífiko na Brazil a hasi un estudio pa wak si un mondi ta bolbe bèk na su estado original mas lihé si hende hasi esfuerso pa planta palu einan atrobe. National Geographic a bisa lo siguiente tokante e investigadónan ku tabata enbolbí den e estudio ei: “Nan tabata masha kontentu pa haña sa ku no tabata nesesario pa hende planta palu.” Den apénas sinku aña, e áreanan kaminda nan a hasi investigashon tabata “yen di palu di e área ei atrobe” sin ku mester a planta palu.

Loke Hende Ta Purba di Hasi pa Resolvé e Problema

Rònt mundu, hende ta hasi esfuerso pa protehá e mondinan i pa restorá esnan ku a sufri daño. Kiko tabata e resultado? Segun un fuente di Nashonnan Uní, durante e último 25 añanan “hende ta kap 50 porshento ménos palu di mondi rònt mundu.”

Pero esei no ta sufisiente pa salba nos mondinan. Un informe ku e organisashon Global Forest Watch a publiká ta bisa ku “e kantidat di mondi tropikal ku ta ser destruí no a kambia mashá den e último añanan.”

E kompanianan ku ta kap palu pa usa den konstrukshon sin pèrmit di gobièrnu ta gana míles di miónes di dòler. Anto ta e golosidat akí pa ganashi ta e motibu prinsipal pakiko mondi tropikal ta ser destruí.

Ki Speransa Beibel Ta Duna Nos?

“Yehovaa Dios a planta tur sorto di palu ku tabata mustra masha bunita i ku tabatin bon fruta pa kome.”—Génesis 2:9.

E Kreador di tur mondi a diseñá mondi di tal manera ku nan tin e kapasidat pa rekuperá di e daño ku hende ta kousa na nan. E ke protehá i sostené nos mondinan i e maravioso sistema ekológiko ku tin den nan.

Beibel ta mustra ku Dios lo pone un fin na e manera egoista ku hende ta manehá nos tera su rekursonan, i e ta primintí ku nos planeta i e bida riba dje lo sobrebibí. Wak e artíkulo “Dios Ta Primintí Ku Nos Planeta Lo Sobrebibí,” na página 15.