E Ta Claramente un Siñanza Bíblico?

SI E siñanza di Trinidad tabata berdad, e lo mester ta claramente i consistentemente presentá den e Bijbel. Pakico? Pasobra, manera e apostelnan a afirmá, e Bijbel ta Dios su revelacion di su mes na humanidad. I siendo cu nos mester conocé Dios pa ador’é aceptablemente, e Bijbel mester ta claro bisando nos exactamente ken e ta.

E creyentenan dje promé siglo a aceptá e Scritura como e revelacion auténtico di Dios. E tabata e base pa nan creencianan, e autoridad final. Por ehempel, ora apostel Pablo a predicá na hende dje stad di Berea, “nan a ricibí e palabra cu mayor disposicion mental, examinando cu cuidao e Scritura diariamente encuanto si e cosnan ei tabata asina.”—Echo 17:10, 11.

Kico hombernan di Dios prominente den e tempo ei a usa como nan autoridad? Echo 17:2, 3 ta bisa nos: “Segun e costumber di Pablo . . . el a razoná cu nan for dje Scritura, splicando i probando via referencianan [for dje Scritura].”

Jesus mes a pone ehempel den usa e Scritura como e base pa su siñanza, bisando repetidamente: “Ta pará skirbí.” “El a interpretá na nan cosnan cu ta pertenecé na e mes den tur e Scritura.”—Mateo 4:4, 7; Lucas 24:27.

Pues Jesus, Pablo, i e creyentenan dje promé siglo a usa e Scritura como e fundeshi pa nan siñanza. Nan tabata sa cu “tur Scritura ta inspirá di Dios i probechoso pa siña, pa reprendé, pa rectificá cosnan, pa disipliná den husticia, afin cu e homber di Dios por ta henteramente competente, completamente ekipá pa tur bon obra.”—2 Timoteo 3:16, 17; mira tambe 1 Corintio 4:6; 1 Tesalonicense 2:13; 2 Pedro 1:20, 21.

Siendo cu e Bijbel por ‘rectificá cosnan,’ lo e mester revelá claramente informacion tocante un asunto asina fundamental manera hende ta pretendé cu Trinidad ta. Pero teólogonan i historiadornan mes ta bisa cu e ta claramente un siñanza bíblico?

“Trinidad” den e Bijbel?

UN PUBLICACION protestant ta bisa: “E palabra Trinidad no ta ser hañá den e Bijbel . . . E no a haña un lugar formalmente den e teologia di iglesia te den di cuater siglo.” (The Illustrated Bible Dictionary) I un autoridad católico ta bisa cu Trinidad “no ta . . . directamente i inmediatamente [e] palabra di Dios.”—New Catholic Encyclopedia.

The Catholic Encyclopedia tambe ta comentá: “Den Scritura no tin te ainda ni un solo palabra cu ta designá e Tres Divina Persona hunto. E palabra τρίας [triʹas] (for di cua e trinitas latin ta un traduccion) ta ser hañá promé den Teófilo di Antiokia alrededor di aña 180 A.D. . . . Djis despues e ta aparecé den su forma latin trinitas den Tertuliano.”

Sin embargo, esaki no ta un prueba riba su mes cu Tertuliano a siña Trinidad. E obra católico Trinitas—A Theological Encyclopedia of the Holy Trinity, por ehempel, ta mencioná cu algun di Tertuliano su palabranan a wordu usá despues pa otronan pa describí Trinidad. Anto e ta spierta: “Pero conclusionnan lihé no por ser sacá for di su uso, pasobra e no ta aplicá e palabranan na teologia trinitario.”

Testimonio di e Scritura Hebreo

MIENTRAS cu e palabra “Trinidad” no ta ser hañá den e Bijbel, a lo menos e idea di Trinidad ta ser siñá claramente den dje? Por ehempel, kico e Scritura Hebreo (“Testament Bieu”) ta revelá?

The Encyclopedia of Religion ta admití: “Teólogonan djawe ta di acuerdo cu e Bijbel hebreo no ta contené un doctrina di Trinidad.” I e New Catholic Encyclopedia tambe ta bisa: “E doctrina di Santísimo Trinidad no ta ser siñá den e T[estament] B[ieu].”

Di manera similar, den su buki The Triune God, e jesuita Edmund Fortman ta admití: “E testament bieu . . . no ta bisa nos nada claramente of pa deduccion obligatorio di un Dios den tres kende ta Tata, Yu i Spiritu Santo. . . . No tin ningun evidencia cu cualkier escritor sagrado sikiera a sospechá e existencia di un [Trinidad] den e Divinidad. . . . Asta pa mira den [e “Testament Bieu“] indicacion of prefiguracion of ‘siñalnan cubrí’ di e Trinidad di personanan, ta baimento mas ayá di e palabranan i intencion di e escritornan sagrado.”—Letter cursivo ta di nos.

Un examinacion di e Scritura Hebreo mes lo confirmá e comentarionan aki. Pues, no tin ningun siñanza claro di un Trinidad den e promé 39 bukinan dje Bijbel cu ta componé e berdadero cánon di e Scritura Hebreo inspirá.

Testimonio di e Scritura Griego

WEL, anto, e Scritura Griego Cristian (“Testament Nobo”) ta papia claramente di un Trinidad?

The Encyclopedia of Religion ta bisa: “Teólogonan ta di acuerdo cu e Testament Nobo tampoco no ta contené un doctrina claro di Trinidad.”

E jesuita Fortman ta declará: “E escritornan di Testament Nobo . . . no ta duna nos ningun doctrina formal of formulá di Trinidad, ningun siñanza claro cu den un Dios tin tres divina persona co-igual. . . . Ningun caminda nos ta haña cualkier doctrina trinitario di tres suheto distinto di bida i actividad divino den e mésun Divinidad.”

The New Encyclopædia Britannica ta observá: “Ni e palabra Trinidad ni e doctrina explícito ta aparecé den e Testament Nobo.”

Bernhard Lohse ta bisa den A Short History of Christian Doctrine: “Asina leu cu ta toca e Testament Nobo, un persona no ta haña den dje un berdadero doctrina di Trinidad.”

The New International Dictionary of New Testament Theology ta declará mescos: “E T[estament]  N[obo] no ta contené e doctrina desaroyá di Trinidad. ‘E Bijbel ta falta e declaracion cla cu e Tata, e Yu, i e Spiritu Santo ta di esencia igual’ [ta loke teólogo protestant Karl Barth a bisa].”

Profesor E. Washburn Hopkins di e Universidad di Yale a afirmá: “Pa Jesus i Pablo e doctrina di Trinidad tabata aparentemente desconocí; . . . nan no ta bisa nada di dje.”—Origin and Evolution of Religion.

Historiador Arthur Weigall a nota: “Jesucristo nunca a mencioná un fenómeno asina, i ningun caminda den e Testament Nobo e palabra ‘Trinidad’ ta aparecé. E idea a wordu adoptá pa Iglesia trescien aña numa despues di e morto di nos Señor.”—The Paganism in Our Christianity.

Pues, ni e 39 bukinan di e Scritura Hebreo ni e cánon di 27 bukinan inspirá di e Scritura Griego Cristian ta percurá cualkier siñanza claro di e Trinidad.

Cristiannan di Promé A Siñ’é?

E CRISTIANNAN di promé a siña e Trinidad? Ripará e sigiente comentarionan hací dor di historiadornan i teólogonan:

“Cristianismo primitivo no tabatin un doctrina claro di Trinidad manera a ser elaborá despues den e credonan.”—The New International Dictionary of New Testament Theology.

“E cristiannan di promé, sin embargo, no a pensa na promé instante di aplicá e idea [di Trinidad] na nan mes fe. Nan a mustra nan debocion na Dios e Tata i na Jesucristo, e Yu di Dios, i nan a reconocé e . . . Spiritu Santo; pero no tabatin pensamento cu e tresnan aki en realidad ta un Trinidad, co-igual i uní den uno.”—The Paganism in our Christianity.

“Na promé instante e fe cristian no tabata trinitario . . . E no tabata asina den era apostólico ni despues di e apostelnan, manera ta ser reflehá den e T[estament] N[obo] i otro skirbimentonan cristian di promé.”—Encyclopædia of Religion and Ethics.

“E formulacion di ‘un Dios den tres Persona’ no tabata establecí firmemente, siguramente no completamente incorporá den e bida cristian i su declaracion di fe, promé cu e fin di e di cuater siglo. . . . Entre e Tatanan Apostólico, no tabatin nada ni sikiera djaleu cu por a yega na tal mentalidad of perspectiva.”—New Catholic Encyclopedia.

Loke e Tatanan Promé cu e Concilio di Nicea A Siña

E TATANAN promé cu e concilio di Nicea tabata ser reconocé di ta e maestronan religioso principal den e promé siglonan despues di Cristo su nacimento. Loke nan a siña ta di interes.

Justino Martyr, kende a muri alrededor di aña 165 E.C., a yama Jesus den su forma prehumano un angel creá cu ta “distinto di e Dios cu a traha tur cos.” El a bisa cu Jesus tabata inferior cu Dios i “cu Jesus nunca a haci algo excepto loke e Creador . . . tabata kier pa e haci i bisa.”

Ireneo, kende a muri alrededor di aña 200 E.C., a bisa cu Jesus den su forma prehumano tabatin un existencia separá for di Dios i tabata inferior na dje. El a mustra cu Jesus no ta igual cu “Esun Dios único i berdadero,” kende ta “supremo riba tur, i fuera di ken no tin ningun otro.”

Clemente di Alehandria, kende a muri alrededor di aña 215 E.C., a yama Dios “e único i berdadero Dios, no creá i indestructibel.” El a bisa cu e Yu “ta despues di e único Tata omnipotente” pero no igual cuné.

Tertuliano, kende a muri alrededor di aña 230 E.C., a siña di e supremacia di Dios. El a observá: “E Tata ta distinto di e Yu (un otro), como cu e ta mas grandi; mescos cu esun cu ta engendrá ta distinto di esun cu a ser engendrá; esun cu ta manda, distinto di esun mandá.” Tambe el a bisa: “Tabatin un tempo cu e Yu no tabat’ei. . . . Promé cu tur cos Dios tabata su so.”

Hipólito, kende a muri alrededor di aña 235 E.C., a bisa cu Dios ta “e único Dios, e promé i Esun único, e Formador i Señor di tur,” kende “no tabatin nada di igual edad cuné . . . Pero e tabata Uno, su só; kende, siendo ku e tabata ke esei, a trece na existencia loke no tabata existí promé,” tal manera e Jesus prehumano cu tabata creá.

Orígenes, kende a muri alrededor di aña 250 E.C., a bisa cu “e Tata i Yu ta dos substancia . . . dos cos den loke ta toca nan esencia,” i cu “compará cu e Tata, [e Yu] ta un luz mashá chikito.”

Resumiendo e evidencia histórico, Alvan Lamson ta bisa den The Church of the First Three Centuries: “E doctrina popular moderno di Trinidad . . . no ta haña apoyo for di e idioma di Justino [Martyr]: i e observacion aki por ser extendé na tur e Tatanan promé cu e concilio di Nicea; esta, na tur escritor cristian pa e tres siglonan despues di nacimento di Cristo. Ta berdad cu nan ta papia di e Tata, Yu, i . . . Spiritu Santo, pero no como co-igual, no como un esencia numérico, no como Tres den Un, den ningun sentido admití awor pa e trinitarionan. E echo ta net contrali.”

Pues, e testimonio di e Bijbel i di historia ta haci claro cu e doctrina di Trinidad tabata desconocí durante tur e tempo bíblico i pa varios siglo despues.

[Komentario na página 7]

“No tin evidencia cu ningun escritor sagrado ni a sospechá e existencia di un [Trinidad] den e Divinidad.”—The Triune God