Con e Doctrina di Trinidad A Desaroyá?

AWOR bo por puntra: ‘Si e Trinidad no ta un siñanza bíblico, con el a bira un doctrina di cristiandad?’ Hopi ta pensa cu el a ser formulá na e concilio di Nicea na aña 325 E.C.

Sin embargo, esei no ta completamente corecto. E concilio di Nicea a afirmá cu Cristo tabata di e mésun esencia cu Dios, locual a pone e fundeshi p’e teologia trinitario despues. Pero e no a establecé e Trinidad, pasobra na e concilio ei no tabatin ningun mencion di e spiritu santo como e di tres persona di un divinidad triuno.

E Papel di Constantino na Nicea

PA HOPI aña, tabatin hopi oposicion cu base bíblico contra e idea desaroyando di cu Jesus tabata Dios. Pa trata di resolvé e conflicto, emperador romano Constantino a manda yama tur obispo na Nicea. Alrededor di 300, un parti chikí di e total, a asistí en realidad.

Constantino no tabata un cristian. Supuestamente, el a conbertí despues den su bida, pero e no a bautizá te ora cu e tabata riba cama di morto. Tocante dje, Henry Chadwick ta bisa den The Early Church: “Constantino, mescos cu su tata, tabata adorá e Solo Invicto; . . . su conbertimento no mester ta interpretá como un experencia interno di gracia . . . Esei tabata un asunto militar. Su comprendemento di doctrina cristian nunca tabata masha cla, pero e tabata sigur cu victoria den bataya tabata sinta den e don dje Dios dje cristiannan.”

Ki papel e emperador no bautizá aki tabatin den e concilio di Nicea? E Encyclopædia Britannica ta relatá: “Constantino mes a presidí, guiando e discusionnan activamente, i personalmente a proponé . . . e fórmula decisivo expresando e relacion di Cristo pa cu Dios den e credo cu e concilio a saca, ‘di e mésun esencia cu e Tata’ . . . Intimidá pa e emperador, e obisponan, cu solamente dos excepcion, a firma e credo, hopi di nan masha contra di nan inclinacion.”

Pues anto, e papel di Constantino tabata decisivo. Despues di dos luna di debate religioso fuerte, e político pagano aki a intervení i a dicidí na fabor di esnan cu a bisa cu Jesus tabata Dios. Pero pakico? Siguramente no pa ningun conviccion bíblico. “Básicamente Constantino no tabatin comprendemento di nada cu tabata ser puntrá den teologia griego,” A Short History of Christian Doctrine ta bisa. Loke sí el a comprendé ta cu division religioso tabata un menaza pa su imperio, i e kier a fortalecé su dominio.

Sin embargo, ningun di e obisponan na Nicea a promové un Trinidad. Nan a dicidí solamente e naturaleza di Jesus pero no e papel di e spiritu santo. Si Trinidad tabata un berdad bíblico claro, nan lo no mester a proponé na e tempo ei?

Desaroyo Mas Aleu

DESPUES di Nicea, debatenan riba e tópico a sigi pa décadanan. Pa un tempo asta esnan cu tabata kere cu Jesus no tabata igual cu Dios a ser favorecé. Pero despues emperador Teodicio a dicidí contra di nan. El a establecé e credo dje concilio di Nicea como e norma pa su reino i a manda pa tene e concilio di Constantinopel na aña 381 E.C. pa clarificá e fórmula.

E concilio ei a bai di acuerdo pa pone e spiritu santo na e mésun nivel cu Dios i Cristo. Pa di promé bez, e Trinidad di cristiandad a cuminzá haña forma.

Sin embargo, asta despues dje concilio di Constantinopel, Trinidad no a bira un credo hopi aceptá. Hopi a oponé i asina a trece riba nan mes persigicion violento. Tabata solamente siglonan despues cu Trinidad a ser formulá den doctrina fiho. The Encyclopedia Americana ta mencioná: “E desaroyo pleno di trinitarismo a tuma lugar den west, den e Escolasticismo di e Edad Medio, ora un splicacion tabata ser buscá den términonan di filosofia i sicologia.”

E Credo di Atanasio

TRINIDAD a ser definí mas pleno den e credo di Atanasio. Atanasio tabata un clero cu a apoyá Constantino na Nicea. E credo cu ta carga su nomber ta declará: “Nos ta adorá un Dios den Trinidad . . . E Tata ta Dios, e Yu ta Dios, i e Spiritu Santo ta Dios; i sin embargo nan no ta tres dios, sino un Dios.”

Sin embargo, escolásticonan bon informá ta di acuerdo, cu Atanasio no a componé e credo aki. The New Encyclopædia Britannica ta comentá: “E credo tabata desconocí pa e Iglesia Oriental te cu siglo 12. Desde siglo 17, escolásticonan generalmente a bai di acuerdo cu e credo di Atanasio no a ser skirbí pa Atanasio (el a muri na aña 373) pero probablemente a ser componí den zuid di Francia durante siglo 5. . . . E influencia dje credo ta parce di tabata principalmente den zuid di Francia i Spaña den e siglonan 6 i 7. E tabata usá den e liturgia dje iglesia na Alemania na siglo 9 i algo despues na Roma.”

Asina cu a dura siglonan for dje tempo di Cristo pa e Trinidad bira ampliamente aceptá den cristiandad. I den tur esaki, kico a guia e decisionnan? Tabata e Palabra di Dios, of tabata loke clero i políticonan a considerá? E. W. Hopkins ta contestá den Origin and Evolution of Religion: “E decision final i ortodox di e Trinidad tabata den su mayor parti un asunto di política di iglesia.”

Apostasia Profetizá

E HISTORIA difamatorio aki di e Trinidad ta pas cu loke Jesus i su apostelnan a profetizá cu lo a sigi despues di nan tempo. Nan a bisa cu lo tin un apostasia, un desviacion, un alehamento for di e berdadero adoracion te ora Cristo bolbe, ora adoracion berdadero lo ser restorá promé cu Dios su dia di destruccion dje sistema di cosnan aki.

Encuanto e “dia” ei, apostel Pablo a bisa: “Lo e no bin aménos cu e apostasia bin promé i e homber di maldad keda revelá.” (2 Tesalonicense 2:3, 7) Despues, el a profetizá: “Despues cu mi bai lobonan feroz lo invadí boso i lo no tin misericordia cu e tao. Asta for di boso mes seno lo bini hombernan padilanti cu un imitacion degradá dje berdad riba nan lip pa hiba e disipelnan pa sigi nan.” (Echonan 20:29, 30, JB) Otro disipelnan di Jesus tambe a skirbi di e apostasia aki cu su clase di clero ‘malbado’.—Mira, por ehempel, 2 Pedro 2:1; 1 Juan 4:1-3; Hudas 3, 4.

Pablo a skirbi tambe: “E tempo ta bini sigur ora, leu di ser contento cu siñanza sano, hende lo ta ansioso pa e último novedad i lo montoná pa nan mes un cantidad di maestronan di acuerdo cu nan mes gusto; i anto, enbez di scucha na e berdad, nan lo bira na mitonan.”—2 Timoteo 4:3, 4, JB.

Jesus mes a splica loke tabata tras dje alehamento for di adoracion berdadero aki. El a bisa cu el a sembra bon simia pero cu e enemigo, Satanas, lo sembra mal yerba riba e feld. Asina cu hunto cu e promé bladjinan di trigo, e mal yerba a aparecé tambe. Pues, un desviacion for di cristianismo puro tabata sperá te cu e cosecha, ora Cristo lo a rectificá asuntonan. (Mateo 13:24-43) The Encyclopedia Americana ta comentá: “Trinitarismo di siglo cuater no a reflehá cu exactitud siñanza cristian di promé encuanto e naturaleza di Dios; e tabata, al contrario, un desviacion di e siñanza aki.” Unda, anto, e desviacion aki a originá?—1 Timoteo 1:6.

Loke A Influenciá Trinidad

A TRAVEZ di e mundo di antigua, asta leu ayá den Babilonia, e adoracion di diosnan pagano agrupá den tres, of Trinidad, tabata comun. E influencia ei tambe tabata prevalecé den Egipto, Grecia, i Roma den siglonan promé, durante, i despues di Cristo. I despues di e morto dje apostelnan, tal creencia pagano a cuminzá invadí cristianismo.

Historiador Will Durant ta observá: “Cristianismo no a destruí paganismo; el a adopt’é. . . . For di Egipto a bini e ideanan di un Trinidad divino.” I den e buki Egyptian Religion, Siegfried Morenz ta nota: “Trinidad tabata un preocupacion mayor di teólogonan egipcio . . . Tres dios ta ser combiná i tratá como un solo ser, nan ta papia di nan den e forma singular. Den e manera aki e forza spiritual di religion egipcio ta mustra un coneccion directo cu teologia cristian.”

Pues, den Alehandria, Egipto, hombernan di iglesia dje último parti di siglo tres i promé parti di siglo cuater, tal como Atanasio, a reflehá e influencia aki mientras cu nan tabata formulá ideanan cu a hiba na Trinidad. Nan mes influencia a plama, asina cu Morenz ta considerá “teologia di Alehandria como e intermediario entre e herencia religioso egipcio i cristianismo.”

Den e prólogo di History of Christianity, di Edward Gibbon, nos ta leza: “Si paganismo tabata conquistá pa cristianismo, ta berdad tambe cu cristianismo a ser corumpí pa paganismo. E adoracion puro di un solo Dios creador di e promé cristiannan . . . tabata cambiá, pa e Iglesia di Roma, den e doctrina incomprendibel dje Trinidad. Hopi di e doctrinanan pagano, inventá pa e egipcionan i idealizá pa Plato, a ser mantené como digno di creencia.”

A Dictionary of Religious Knowledge ta nota cu hopi ta bisa cu Trinidad “ta un corupcion fiá di religion pagano, i mesclá cu e fe cristian.” I The Paganism in Our Christianity ta declará: “E orígen di [Trinidad] ta completamente pagano.”

Ta p’esei, den e Encyclopædia of Religion and Ethics, James Hastings a skirbi: “Den religion di India, por ehempel, nos ta encontrá cu e grupo trinitario di Brahmā, Siva, i Viṣṇu; i den religion egipcio cu e grupo trinitario di Osiris, Isis, i Horus . . . No ta solamente den religion histórico nos ta haña Dios considerá como un Trinidad. Bo por recordá en particular e punto di bista Neo-Platónico dje Realidad Supremo of Fundamental,” cua ta ser “representá den forma di Trinidad.” Kico e filósofo griego Plato tin di haber cu Trinidad?

Platonismo

PLATO, manera hende ta kere, a biba for di aña 428 te 347 promé cu Cristo. Mientras cu e no a siña Trinidad den su forma actual, su filosofia a prepará e caminda p’é. Despues, movementonan filosófico cu a incluí creencianan trinitario a lanta, i esakinan tabata influenciá pa Plato su ideanan di Dios i di naturaleza.

E buki na frances Nouveau Dictionnaire Universel (Diccionario Universal Nobo) ta bisa di Plato su influencia: “Trinidad platónico, cu ta simplemente un cambio di órden di trinidadnan mas bieu biniendo for di pueblonan di mas promé, ta parce di ta trinidad di atributonan racional filosófico cu a originá e tres persona divino siñá pa e iglesianan cristian. . . . E filósofo griego aki su concepto di trinidad divino . . . por ser hañá den tur e religionnan [pagano] di antigua.”

The New Schaff-Herzog Encyclopedia of Religious Knowledge ta mustra e influencia di e filosofia griego aki: “E doctrinanan dje Lógos i Trinidad a haña nan forma for dje Tatanan griego, kendenan . . . tabata hopi influenciá, directamente of indirectamente, pa e filosofia platónico . . . Cu eror i corupcion a drenta den e iglesia for dje fuente aki no por ser nengá.”

The Church of the First Three Centuries ta bisa: “E doctrina dje Trinidad tabata di formacion gradual i comparativamente lat; . . . e tabatin su orígen den un fuente completamente alehá for dje Scritura hudio i cristian; . . . el a crece, i tabata mezclá den cristiandad, mediante e mannan di e Tatanan platónico.”

Na final di siglo tres E.C., “cristianismo” i e filosofianan nobo platónico a bira inseparablemente uní. Manera Adolf Harnack a bisa den Outlines of the History of Dogma, doctrina di iglesia a bira “firmemente establecí den e tereno di helenismo [pensamento pagano griego]. Di tal manera el a bira un misterio pa e gran mayoria di cristiannan.”

E iglesia a pretendé cu su doctrina nobo tabata basá riba e Bijbel. Pero Harnack ta bisa: “En realidad el a haci speculacion helenista, punto di bista supersticioso i costumbernan di adoracion místico pagano legítimo den e iglesia.”

Den e buki A Statement of Reasons, Andrews Norton ta bisa di Trinidad: “Nos por sigi e historia dje doctrina aki, i descubrí su fuente, no den revelacion cristian, pero den filosofia platónico . . . E Trinidad no ta un doctrina di Cristo i su apostelnan, pero un invento dje scol di platonistanan despues.”

Pues, den e siglo cuater E.C., e apostasia profetizá pa Jesus i e apostelnan a florecé plenamente. Desaroyo di e Trinidad tabata solamente un evidencia di esaki. E iglesianan apóstata a cuminzá braza tambe otro ideanan pagano, tal como fierno di candela, inmortalidad dje alma i idolatria. Papiando spiritualmente, cristiandad a drenta su era di scuridad profetizá, dominá pa un creciente clase di clero dje “homber di maldad”.—2 Tesalonicense 2:3, 7.

Pakico Dios Su Profetanan No A Siñ’é?

PAKICO, pa miles di aña, ningun di Dios su profetanan a siña su pueblo tocante Trinidad? Finalmente, Jesus lo no a usa su abilidad como e Gran Maestro pa clarificá Trinidad na su sigidornan? Dios lo a inspirá cientos di página di Scritura i toch no usa ningun dje instruccion aki pa siña Trinidad si e tabata e “doctrina central” di fe?

Cristiannan mester kere cu siglonan despues di Cristo i despues di a inspirá e skirbimento dje Bijbel, Dios lo a apoyá formulacion di un doctrina cu tabata desconocí pa su sirbidornan pa miles di aña, uno cu ta un “misterio inpenetrabel” “fuera dje comprension di razonamento humano,” uno cu manera a ser admití tin un antecedente pagano i tabata “den su mayor parti un asunto di política di iglesia”?

E testimonio di historia ta clá: E siñanza di Trinidad ta un desviacion for dje berdad, un apostasia di dje.

[Komentario na página 8]

‘Trinitarismo di siglo cuater tabata un desviacion for di siñanza cristian di promé.’—The Encyclopedia Americana

[Kuadro na página 9]

“E Trinidad dje Gran Diosnan”

Hopi siglo promé cu tempo di Cristo, tabatin trinidad di diosnan den Babilonia i Asiria di antigua. Na frances e “Larousse Encyclopedia of Mythology” ta mencioná un trinidad asina den e area di Mesopotamia: “E universo tabata partí den tres region di cua cada un a bira e dominio di un dios. Anu su parti tabata e cielo. E tera a ser duná na Enlil. Ea a bira e gobernante dje awanan. Hunto nan a forma e trinidad dje Gran Diosnan.”

[Kuadro na página 12]

Trinidad Hindú

T’e buki “The Symbolism of Hindu Gods and Rituals” ta bisa encuanto un trinidad hindú cu a existí siglonan promé cu Cristo: “Siva ta un dje diosnan dje Trinidad. Ta ser bisá cu e ta e dios di destruccion. E otro dos diosnan ta Brahma, e dios di creacion i Visnu, e dios di mantencion. . . . Pa indicá cu e tres procesonan aki ta uno i mésun cos, e tres diosnan ta ser combiná den un forma.”​—Publicá pa A. Parthasarathy, Bombay.

[Plachi na página 8]

“Constantino básicamente no tabatin comprendemento di nada cu tabata ser puntrá den teologia griego.”—A Short History of Christian Doctrine

[Plachi na página 10]

1. Egipto. Trinidad di Horus, Osíris, Isis, di dos milenio P.E.C.

2. Babilonia. Trinidad di Istar, Sin, Shámash, di dos milenio P.E.C.

3. Palmira. Trinidad di dios di luna, Señor di cielo, dios di solo, rond di promé siglo E.C.

4. India. Divinidad trinitario hindú, rond di siglo 7 E.C.

5. Cambodia. Divinidad trinitario budista, rond di siglo 12 E.C.

6. Noruega. Trinidad (Tata, Yu, spiritu santo), rond di siglo 13 E.C.

7. Francia. Trinidad, rond di siglo 14 E.C.

8. Italia. Trinidad, rond di siglo 15 E.C.

9. Alemania. Trinidad, rond di siglo 19 E.C.

10. Alemania. Trinidad, siglo 20 E.C.