Uso di Boskeho

E IDEA so di tin ku papia for di un boskeho ta hasi hopi hende nervioso. Nan ta sinti nan mes mas sigur si tur kos ku nan tin ku bisa ta skirbí riba papel òf si nan sa e parti for di kabes.

Pero echo ta ku tur dia nos ta papia sin yudansa di algu skirbí. Ta asina nos ta kòmbersá ku famia i amigunan. Nos ta hasié ora nos ta den sirbishi di vèlt i tambe ora nos ta hasi orashon di kurason, sea den privá òf pa representá un grupo.

Ora bo ta duna un diskurso, ki diferensia tin entre les’é palabra pa palabra òf present’é siguiendo un boskeho? Un diskurso lesá por ta mas eksakto i bo por usa frasenan mas bunita, pero ta difísil pa e yega na kurason di hende. Ora bo ta lesa mas ku djis un par di frase, por lo general bo stèm lo haña un ritmo i tono ku ta distinto for di e estilo natural di un kòmbersashon. Si bo ta konsentrá mas riba bo papelnan ku riba bo ouditorio, hopi hende presente lo no skucha ku e mesun atenshon ku ora nan ta sinti ku di bèrdat bo ta interesá den nan i ta adaptá bo informashon na nan sirkunstansia. Pa un diskurso realmente motivá e ouditorio, ta mihó bo present’é for di un boskeho, improvisando e palabranan segun bo ta papia.

E Skol di Ministerio Teokrátiko ta diseñá pa yuda nos den nos bida diario. Ora nos topa nos amigunan, nos no ta kore saka un pida papel i lesa loke nos tin gana di bisa nan pa hasi sigur ku nos ta usa e palabranan di mas mihó. Den sirbishi di vèlt tampoko nos no ta bai ku un papel pa nos lesa pa motibu ku nos tin miedu ku nos lo por lubidá algun punto ku nos kier kompartí ku e hendenan. Ora bo tin un demostrashon den e skol pa mustra kon pa prediká bou di e sirkunstansianan ei, kustumbrá papia na un manera mas natural posibel. Lo bo ripará ku si bo prepará bon, por lo general un boskeho, sea mental òf skirbí, ta sufisiente pa rekordá bo di e puntonan prinsipal ku bo kier trata. Pero kon bo por desaroyá e konfiansa nesesario pa papia solamente for di un boskeho?

Organisá Bo Ideanan. Pa bo papia a base di un boskeho, bo tin ku organisá bo ideanan. Esaki no ta nifiká skohe e palabranan ku bo tin pensá di usa. Simplemente e kier men pensa promé ku bo papia.

Den bida diario, un persona ku ta aktua lihé sin pensa por hañ’é ta bisa kos ku despues ta duel e. Un otro persona kisas ta papia sin rumbo, bulando di un idea pa otro. Bo por superá tur dos tendensia na un manera efikas dor di pousa pa formulá un skema òf boskeho mental simpel promé ku bo kuminsá papia. Na promé lugá, kòrda riba bo meta, despues pensa kiko bo tin ku bisa pa logra bo meta, anto e ora ei kuminsá papia.

Bo ta preparando pa sirbishi di vèlt? Tuma tempu no solamente pa bo drecha bo tas, sino tambe pa organisá bo ideanan. Si bo disidí ku bo ta bai usa un di e presentashonnan ku Nos Ministerio di Reino ta rekomendá, les’é vários biaha pa hinka e ideanan prinsipal bon kla den bo mente. Bisa e puntonan prinsipal den un òf dos frase kòrtiku. Adaptá e palabranan na bo personalidat i na e sirkunstansianan di bo teritorio. Lo ta bon pa bo tin un boskeho mental. Kiko lo e por inkluí? (1) Den e introdukshon lo bo por menshoná algu ku ta preokupá bo komunidat. Invitá e doño di kas pa duna su opinion. (2) Pensa riba algu spesífiko ku lo bo por bisa di e tema, inkluso un òf dos teksto bíbliko ku ta mustra kon Dios a primintí di trese alivio. Si ta posibel, enfatisá ku Yehova lo hasi esaki mediante su Reino, esta, su gobièrnu selestial. (3) Animá e persona pa aktua a base di loke boso a papia. Lo bo por ofres’é un publikashon i/òf un studio di Beibel, i hasi areglonan konkreto pa sigui ku e kòmbersashon riba un otro dia.

E úniko boskeho ku probablemente lo bo tin mester pa un presentashon asina ta un boskeho mental. Si bo kier konsultá un boskeho skirbí promé ku bo yama na e promé kas, e boskeho ei probablemente lo tin solamente un par di palabra komo bo introdukshon, un òf dos teksto i un nota kòrtiku di loke lo bo kier bisa den bo konklushon. Dor di prepará i usa un boskeho asina, nos lo no bula di un kos pa otro, sino ku esei lo yuda nos duna un mensahe kla ku ta fásil pa kòrda.

Si den bo teritorio bo ta topa hopi bes ku sierto pregunta òf opheshon, kisas lo ta bon pa buska informashon riba nan. Por lo general lo bo tin mester di solamente dos òf tres punto básiko huntu ku algun teksto bíbliko ku ta apoyá nan. Kisas bo ta haña presis e boskeho ku bo mester den e foyeto chikí na spañó “Temanan Bíbliko pa Kòmbersashon” òf bou di e suptemanan skirbí ku lèter diki den e buki Rasonamentu for di e Skritura. Podisé bo ta haña un bon sita den un otro publikashon ku lo bo kier inkluí. Traha un boskeho kòrtiku, pon’é huntu ku e sita, anto hink’é den bo tas di sirbishi. Ora un doño di kas bini ku e pregunta òf opheshon, lag’é sa ku gustosamente lo bo splik’é loke bo ta kere. (1 Ped. 3:15) Duna bo kontesta a base di e boskeho ei.

Ora bo ta bai representá bo famia, un grupo di studio di buki òf e kongregashon den orashon, tambe ta bon pa bo organisá bo pensamentunan promé. Segun Lukas 11:2-4, Hesus a duna su disipelnan un boskeho simpel pa hasi orashon yen di nifikashon. Sálomon a hasi un orashon largu na dedikashon di e tèmpel di Yerúsalèm. Pero ta bisto ku el a pensa di antemano riba loke e kier a bisa. Promé el a konsentrá riba Yehova i Su promesa na David; despues riba e tèmpel; kaba riba situashonnan spesífiko i riba diferente grupo di hende. (1 Rei. 8:22-53) Nos por benefisiá di e ehèmpelnan aki.

Tene Bo Boskeho di Diskurso Simpel. Kuantu informashon bo boskeho mester tin aden pa bo duna un diskurso?

Kòrda ku e meta di un boskeho ta pa yuda bo kòrda ideanan. Podisé ta bon pa skirbi un par di frase pa usa komo introdukshon. Pero despues di esei, konsentrá riba e ideanan, no riba palabra. Si bo pone e ideanan ei den forma di frase, sòru pa nan ta frasenan kòrtiku. E par di puntonan prinsipal ku bo tin pensá di desaroyá mester destaká den bo boskeho. Bo por logra esei dor di skirbi nan ku lèter kapital, hala liña bou di nan òf resaltá nan ku marker. Bou di kada punto prinsipal, skirbi e ideanan ku bo kier usa ora di desaroy’é. Skirbi e tekstonan ku bo tin pensá di lesa. En general ta mihó pa lesa e tekstonan dirèkt for di Beibel. Anotá e komparashonnan ku bo kier usa. Tambe kisas bo kier sita algun hende ku a bisa kosnan importante. Hasi bo notanan sufisiente ekstenso di manera ku bo por presentá echonan spesífiko. Ta mas fásil pa usa e boskeho si e ta nèchi i ordená.

Tin ruman ta usa boskeho ku ta mas simpel ainda, nan ta usa un par di palabra klave, e tekstonan ku nan lo sita for di kabes, i algu pintá ku ta yuda nan kòrda e ideanan. Ku e notanan simpel aki, un oradó lo por presentá su informashon den un sekuensia lógiko i estilo di kòmbersashon. Esei ta e meta di e lès aki.

Na página 39 pa 42 di e buki aki, bo ta haña e lès “Kon pa Traha un Boskeho.” Lo ta masha útil pa lesa e informashon ei ora bo ta traha riba e lès aki “Uso di Boskeho.”

Kon pa Usa e Boskeho. Sin embargo, na e punto aki bo meta no ta pa djis prepará bo diskurso den forma di boskeho, sino pa usa e boskeho efikasmente.

E promé paso pa usa bo boskeho ta di prepará pa presentá e diskurso. Wak e tema, lesa tur e puntonan prinsipal, i pensa riba e relashon ku kada un di nan tin ku e tema. Skirbi kuantu tempu bo por dediká na kada punto. Awor bai bèk na kuminsamentu i studia e promé punto prinsipal. Repasá e argumentunan, tekstonan bíbliko, komparashonnan i ehèmpelnan ku bo tin pensá di usa pa desaroyá e punto ei. Keda repasá e informashon te ora ku e sekshon ei di bo diskurso ta bon kla den bo mente. Hasi meskos ku kada un di e otro puntonan prinsipal. Wak kiko lo bo por laga afó pa por kaba na tempu, si resultá nesesario. Por último, repasá e diskurso kompletu. Konsentrá riba e ideanan, no riba e palabranan. No siña henter e diskurso for di kabes.

Ora bo ta presentá e diskurso, ta importante pa bo mantené bon kontakto visual ku bo ouditorio. Despues di lesa un teksto, bo mester por rasoná riba dje usando bo Beibel sin bai bèk na bo notanan. Tambe si bo usa un komparashon, no les’é, sino kont’é manera lo bo a hasi si bo tabata papia ku bo amigunan. No wak bo notanan kada bes ku bo ta kuminsá un frase. Papia di kurason, i lo bo yega na kurason di esnan ku ta skucha bo.

Ora bo ta dominá e arte di papia a base di un boskeho, bo a dal un paso masha importante pa bira un bon oradó públiko.