Kapítulo Diesinku
Skucha Konseho, Aseptá Disiplina
1. (a) Dikon nos tur tin mester di konseho i disiplina? (b) Ki pregunta nos tin ku konsiderá?
“NOS tur ta trompeká na hopi manera,” Beibel ta bisa na Santiago 3:2. Nos por pensa di hopi okashon ku nos tabata leu for di loke e Palabra di Dios kier pa nos ta. P’esei nos ta rekonosé ku Beibel tin rason ora e ta bisa: “Skucha konseho i aseptá disiplina, pa bo por ta sabí pa restu di bo bida.” (Proverbionan 19:20) Sin duda nos a hasi algun kambio kaba den nos bida pa e ta mas na armonia ku e siñansanan di Beibel. Pero kon nos ta reakshoná si un kompañero kristian konsehá nos riba un asuntu spesífiko?
2. Kiko nos mester hasi ora nos risibí konseho personal?
2 Tin hende ta purba hustifiká nan mes, òf ta minimisá e seriedat dje situashon òf nan ta tira falta riba otro hende. Pero e mihó kos ta pa skucha konseho i aplik’é. (Hebreonan 12:11) Ta klaro ku ningun hende no mester ferwagt perfekshon for di otronan, ni kana konsehá otronan tur ora bai riba kosnan insignifikante òf riba asuntunan ku Beibel ta laga na nos preferensia personal. Ademas, por ta ku e persona ku ta dunando e konseho no a konsiderá tur faktor, i bo por hala su atenshon riba esaki den un forma respetuoso. Pero den e konsiderashon ku ta bai sigui aki, laga nos asumí ku e konseho òf disiplina duná ta na su lugá i tin base bíbliko. Kon nos mester reakshoná?
Ehèmpelnan di Atvertensia
3, 4. (a) Kiko Beibel ta kontené ku por yuda nos desaroyá e punto di bista korekto di konseho i disiplina? (b) Kon Rei Saul a reakshoná riba konseho, i ku ki resultado?
3 E Palabra di Dios ta kontené eksperensia di bida real di personanan ku a risibí konseho nesesario. Tabatin biaha ku e konseho a ser kompañá ku disiplina. Un dje personanan ei tabata Rei Saul di Israel. E no a obedesé Yehova relashoná ku e nashon di Amalek. E amalekitanan a oponé e sirbidónan di Dios, i Yehova a dekretá ku no tin mag di spar e amalekitanan ni nan krio di bestia. Pero Rei Saul no a mata nan rei ni nan mihó bestianan.—1 Samuel 15:1-11.
4 Yehova a manda profeta Samuel bai skual Saul. Kon Saul a reakshoná? El a hustifiká su mes bisando ku el a derotá e amalekitanan, pero ku solamente el a disidí di spar nan rei. Pero esei no tabata loke Yehova a mand’é. (1 Samuel 15:20) Saul a purba tira falta riba e pueblo p’e echo ku el a spar e krio di bestia, bisando: “Mi tabatin miedu di e pueblo i a skucha nan bos.” (1 Samuel 15:24) I parse ku e tabata mas preokupá ku su orguyo, pasobra asta el a pidi Samuel pa onr’é dilanti e pueblo. (1 Samuel 15:30) Ku tempu, Yehova a rechasá Saul komo rei.—1 Samuel 16:1.
5. Kiko a sosodé ku Rei Uzías ora el a rechasá konseho?
5 Rei Uzías di Huda “a bira infiel na SEÑOR su Dios, pasobra el a drenta e tèmpel di SEÑOR pa kima sensia.” (2 Krónikanan 26:16) Pero ta saserdote so tabatin mag di ofresé sensia. Ora e saserdotenan prinsipal a purba para Uzías, e rei a rabia mashá. Kiko a sosodé? Beibel ta bisa: “Lepra a sali na su frenta . . . pasobra SEÑOR a kastigu’é. I Rei Uzías tabata un leproso te dia di su morto.”—2 Krónikanan 26:19-21.
6. (a) Kon bini tantu Saul komo Uzías a resistí konseho? (b) Dikon hopi hende awe tin un problema serio pa aseptá konseho?
6 Kon bini tantu Saul komo Uzías tabatin difikultat pa aseptá konseho? E problema básiko tabata orguyo, nan tabatin un idea muchu halsá di nan mes. Orguyo ta pone hopi hende kousa tristesa pa nan mes. Aparentemente nan ta sinti ku si nan aseptá konseho, esei ta indiká ku di un òf otro manera nan ta inadekuado òf esei ta daña nan reputashon. Pero orguyo ta un debilidat. Orguyo ta stroba un persona di pensa na un manera sano, i dor di esei e tin tendensia di resistí e yudansa ku Yehova ta perkurá via su Palabra i organisashon. P’esei Yehova ta spièrta: “Orguyo ta bin promé ku destrukshon, i un spiritu arogante promé ku kaida.”—Proverbionan 16:18; Romanonan 12:3.
Aseptá Konseho
7. Ki lès positivo nos por siña for dje manera ku Moises a reakshoná riba konseho?
7 Tambe e Skritura ta kontené bon ehèmpel di hende ku a aseptá konseho, i nos por siña for di esakinan. Tuma Moises. Su suegro a konseh’é kon pa atendé ku e responsabilidat pisá ku e tabatin. Moises a skuch’é i a apliká e konseho mesora. (Éksodo 18:13-24) Ounke Moises tabatin hopi outoridat, dikon e tabata habrí pa konseho? Pasobra e tabata humilde. “Moises tabata masha humilde, mas ku tur hòmber ku tabatin riba superfisie di tera.” (Numbernan 12:3) Kon importante humildat ta pa nos? Sofonías 2:3 ta mustra ku esei ta nifiká nos bida.
8. (a) Ki piká David a kometé? (b) Kon David a reakshoná ora Natan a skuale? (c) Kiko tabata e konsekuensianan di David su pikánan?
8 Rei David a kometé adulterio ku Bat-seba i a purba skonde esei dor di laga mata Bat-seba su kasá, Urías. Yehova a manda profeta Natan bai skual David. David a repentí i mesora a atmití: “Mi a peka kontra SEÑOR.” (2 Samuel 12:13) Ounke Dios a aseptá David su repentimentu, lo el a bai sufri e konsekuensianan di su malecho. Yehova a bis’é ku spada ‘lo no kita for di su kas,’ ku su esposanan lo ser duná ‘na su kompañero’ i ku e yu ku a nase di su adulterio “lo muri sigur.”—2 Samuel 12:10, 11, 14.
9. Kiko nos no mester lubidá si nos haña konseho òf disiplina?
9 Rei David tabata sa dje benefisio di skucha bon konseho. Na un okashon, el a gradisí Dios p’e persona via ken el a haña e konseho. (1 Samuel 25:32-35) Nos tambe ta meskos? Si ta asina, esei lo yuda nos evitá di bisa òf hasi hopi kos ku lo por duel nos despues. Pero kiko si nos haña nos den un situashon ku ta pone nos haña konseho òf asta disiplina? Laga nos no lubidá ku konseho i disiplina ta prueba di Yehova su amor; loke e ta mira ta nos bienestar eterno.—Proverbionan 3:11, 12; 4:13.
Kualidatnan Presiosísimo Ku Ta Bon pa Kultivá
10. Ki kualidat Hesus a mustra ku tabata nesesario pa esnan ku lo drenta den e Reino?
10 Pa nos por tin un bon relashon ku Yehova i ku nos rumannan kristian, nos tin ku kultivá sierto kualidatnan. Hesus a menshoná un di nan ora el a pone un mucha meimei di su disipelnan i a bisa: “Si boso no kombertí i bira manera mucha, boso lo no drenta e reino di shelu. Esun anto ku humiá su mes manera e mucha aki ta esun di mas grandi den e reino di shelu.” (Mateo 18:3, 4) Hesus su disipelnan mester a kultivá humildat, ya ku nan tabata diskutí nan ku nan, ken ta mas grandi.—Lukas 22:24-27.
11. (a) Dilanti ken nos mester ta humilde, i dikon? (b) Si nos ta humilde, kon nos lo reakshoná riba konseho?
11 Apòstel Pedro a skirbi: “Boso tur, bisti boso mes ku humildat pa ku otro, pasobra ‘Dios ta resistí e orguyosonan, ma ta duna grasia na e humildenan.’” (1 Pedro 5:5) Nos sa ku nos mester ta humilde dilanti Dios, pero e teksto aki ta mustra ku tambe nos mester ta humilde pa ku kompañeronan di kreensia. Si nos ta humilde pa ku nan, nos lo no rabia ora nan duna nos bon sugerensia. Mas bien, nos lo siña for di nan.—Proverbionan 12:15.
12. (a) Ki kualidat importante ta hopi ligá ku humildat? (b) Dikon nos mester ta interesá den e efekto ku nos kondukta tin riba otro hende?
12 Algu ku ta hopi ligá ku humildat ta interes den e bienestar di otro hende. Apòstel Pablo a skirbi: “No laga ningun hende buska su mes interes, sino esun di su próhimo. . . . Asina anto, sea ku boso ta kome òf bebe òf kiko ku boso ta hasi, hasi tur pa e gloria di Dios. No duna ofensa ni na hudiu ni na griego ni na e iglesia di Dios.” (1 Korintionan 10:24-33) Pablo no a bisa ku nos mester pone tur nos preferensianan personal un banda, sino mas bien a urgi nos pa no hasi nada ku lo a animá un otro hende pa hasi algu ku su konsenshi ta kondená.
13. Ki ehèmpel por indiká si nos tin e kustumber di apliká konseho bíbliko?
13 Abo ta pone e bienestar di otro hende promé ku bo preferensia personal? Nos tur tin ku siña hasi esei. Tin hopi manera ku nos por hasi esaki. Tuma komo un ehèmpel e manera ku nos ta bisti i areglá nos mes. Esakinan ta kosnan di gustu personal, pero ku mester ta na armonia ku e instrukshon dje Skritura di ser modesto, na òrdu i limpi. Pero si bo haña sa ku debí n’e kustumbernan dje hendenan den bo komunidat, bo manera di bisti i di areglá bo mes ta stroba otro hende di skucha e mensahe di Reino, lo bo hasi kambio? Un kos ta sigur, ta mas importante pa yuda otro hende gana bida eterno ku komplasé bo mes.
14. Dikon ta importante pa kultivá humildat i interes den otro hende?
14 Hesus a pone un bon ehèmpel di humildat i di mustra interes den otro hende. El a asta laba pia di su disipelnan. (Huan 13:12-15) E Palabra di Dios ta bisa di Hesus: “Laga tin den boso e aktitut aki ku tabatin tambe den Kristu Hesus, kende, ounke ku e tabata eksistí den e forma di Dios, no a konsiderá igualdat ku Dios algu pa tene na dje, ma a bandoná su mes gloria, tumando forma di un sirbidó, siendo trahá den e semehansa di hende. I hañando su mes den kondishon di hende, el a humiá su mes dor di bira obedesidu te na morto.”—Filipensenan 2:5-8; Romanonan 15:2, 3.
No Rechasá e Disiplina di Yehova
15. (a) Ki kambionan nos tin ku hasi pa nos tin un personalidat ku ta agradá Dios? (b) Kon Yehova a perkurá konseho i disiplina pa nos tur?
15 Komo ku nos tur ta pekador, nos tin ku hasi kambio den nos aktitut i kondukta si nos kier reflehá e personalidat di nos Dios. Nos tin ku bisti “e hende nobo,” esta un personalidat nobo. (Kolosensenan 3:5-14) Konseho i disiplina ta yuda nos mira kiko ta e kambionan ku nos mester hasi, anto kon pa hasi nan. E fuente básiko di instrukshon ku nos tin mester ta Beibel mes. (2 Timoteo 3:16, 17) E literatura bíbliko i reunionnan ku Yehova su organisashon ta perkurá ta yuda nos apliká e Palabra di Dios. Asta si nos a tende e konseho un biaha kaba, nos lo rekonosé ku nos tin mester di dje i purba mehorá?
16. Ki yudansa Yehova ta perkurá pa nos individualmente?
16 Yehova, ku amor i interes, ta yuda nos ku nos problemanan. Loke a yuda miónes di hende ta un studio di Beibel na kas. Mayornan ta konsehá i disipliná nan yunan pa protehá nan di kondukta ku lo por kousa doló di kurason. (Proverbionan 6:20-23) Den kongregashon, tin hende ku hopi bes ta pidi sirbidónan ku eksperensia pa konseho i sugerensia ya asina nan por mehorá nan esfuersonan den e aktividat den fèlt. Tin biaha, ansianonan por pidi otro konseho òf nan por pidi otro rumannan ku tin eksperensia den e sirbishi di proklamá e palabra. Esnan ku tin kualifikashonnan spiritual ta usa Beibel pa duna yudansa na esnan ku tin mester di esei, hasiend’e ku un aktitut suave. Si bo ta duna konseho, kòrda ‘wak bo mes, pa bo tambe no wòrdu tentá.’ (Galationan 6:1, 2) Sí, nos tur tin mester di konseho i disiplina pa adorá e úniko Dios berdadero unidamente.
Komo Repaso
• Kon Yehova ta yuda nos ku amor pa mira unda nos personalmente tin ku hasi kambio?
• Dikon hopi hende tin difikultat pa aseptá konseho, i kon serio esaki ta?
• Ki kualidatnan presiosísimo lo yuda nos pa ta habrí pa konseho, i kon Hesus a pone un bon ehèmpel den esaki?
[Plachi na página 142]
Uzías a rechasá konseho i a ser kastigá ku lepra
[Plachi na página 142]
Moises a benefisiá dor di aseptá konseho di Yetro