Un Mundu Nobo Segun Dios Su Promesa

BEIBEL, Dios su Palabra skirbí, ta duna nos speransa ora e ta bisa: “Segun su promesa nos ta sperando shelunan nobo i un tera nobo, den kual ta biba hustisia.”—2 Pedro 3:13.

Kiko e “shelunan nobo” ta? Beibel ta relashoná shelu ku gobernashon. (Echonan 7:49) E “shelunan nobo” ta un gobièrnu nobo ku lo goberná e tera. Lo e ta nobo pasobra lo e remplasá e aktual sistema di gobernashon; tambe e ta un desaroyo nobo den e kumplimentu di Dios su propósito. Esei ta e Reino ku Hesus a siña nos pidi p’e den orashon. (Mateo 6:10) Siendo ku ta Dios ta Fuente di e Reino ei, i Dios ta biba den shelu, Beibel ta yam’é “e reino di shelu.”—Mateo 7:21.

Kiko e “tera nobo” ta? E no ta un planeta nobo, ya ku Beibel ta deklará bon kla ku tera lo ta habitá pa semper. E “tera nobo” ta un sosiedat humano nobo. Lo e ta nobo pasobra e malbadonan lo wòrdu kortá kitá for di tera. (Proverbionan 2:21, 22) Tur hende ku lo ta na bida e tempu ei lo onra i obedesé e Kreadó i lo biba na armonia ku su rekisitonan. (Salmo 22:27) Hende di tur nashon ta hañando e invitashon pa siña kiko ta e rekisitonan ei i biba na armonia ku nan awor. Abo ta hasiendo esei?

Den Dios su mundu nobo, tur hende lo respetá Su gobernashon. Amor pa Dios ta motivá bo pa obedesé su mandamentunan? (1 Juan 5:3) Bo obedensia ta bisto den bo kas? na trabou òf na skol? i den e manera ku bo ta hiba bo bida?

Den e mundu nobo ei, hende lo ta uní den adorashon di e Dios berdadero. Abo ta adorá e Kreadó di shelu i tera? Bo adorashon realmente ta uni bo ku kompañeronan di adorashon di tur nashon, tur rasa i tur idioma?—Salmo 86:9, 10; Isaias 2:2-4; Sofonias 3:9.

[Kuadro na página 17]

E Dios Ku Ta Primintí e Kosnan Aki

E ta e Kreadó di shelu físiko i di planeta Tera. E ta esun ku Hesukristu a identifiká komo “e úniko Dios berdadero.”—Juan 17:3.

Mayor parti di humanidat ta onra diosnan ku nan mes a inventá. Miónes di hende ta bùig dilanti di imágennan sin bida. Otronan ta glorifiká institushonnan humano, filosofianan basá riba norma- i balornan material òf nan propio deseonan. Asta entre esnan ku ta deklará ku nan ta usa Beibel, no ta tur ta onra e nòmber di esun ku Beibel ta identifiká komo “e Dios berdadero.”—Deuteronomio 4:35, NW.

E Kreadó a bisa tokante su mes: “Ami ta Yehova. Esei ta mi nòmber.” (Isaias 42:5, 8, NW) E nòmber aki ta aparesé un 7.000 biaha den Beibel su idiomanan original. Hesukristu a siña su siguidónan resa: “Nos Tata ku ta den shelu, bo nòmber sea santifiká.”—Mateo 6:9.

Ki klase di persona e Dios berdadero ta? E ta deskribí su mes komo un persona “yen di kompashon i grasia, kende no ta rabia lihé i kende ta abundá den miserikòrdia i bèrdat,” i komo un persona ku sigur no ta laga di kastigá esnan ku deliberadamente ta violá su mandamentunan. (Eksodo 34:6, 7) E historia di su trato ku humanidat ta konfirmá ku e deskripshon ei ta bèrdat.

Tantu e nòmber komo e persona ku e nòmber ei ta representá tin ku ser santifiká, es desir, tratá komo santu. Komo Kreadó i Soberano Universal, nos mester obedes’é i ador’é eksklusivamente. E tin derecho riba esei. Abo personalmente ta dun’é e kosnan aki?

[Kuadro/Plachi na página 18]

Ki Kambionan “Shelunan Nobo i un Tera Nobo” Lo Trese?

Planeta Tera transformá den Paradeis Lukas 23:43

Trabou ku ta duna satisfakshon, abundansia di kuminda Isaias 25:6; 65:17, 21-23

[Kuadro/Plachi na página 19]

Lo Bo Benefisiá?

Dios no por gaña!—Tito 1:2.

Yehova ta deklará: “Mi palabra . . . lo no bolbe bashí serka mi, sin kumpli ku loke mi ta deseá, i sin alkansá e propósito ku kual mi a mand’é.”—Isaias 55:11.

Ya kaba Yehova ta kreando “shelunan nobo i un tera nobo.” E gobièrnu selestial ta funshoná kaba. E fundeshi di e “tera nobo” ta poné kaba.

Despues di revelá algun di e kosnan maravioso ku “un shelu nobo i un tera nobo” lo trese pa humanidat, Revelashon ta sita Dios mes, e Soberano di universo, bisando: “Mira, mi ta hasi tur kos nobo.” Tambe e ta bisa: “Skirbi, pasobra e palabranan aki ta fiel i berdadero.”—Revelashon 21:1, 5.

E pregunta krusial ta: Nos ta hasiendo e kambionan nesesario afin di por ser konsiderá digno di forma parti di e “tera nobo” ei bou di e “shelunan nobo”?