YUDA HENDE BIRA DISIPEL
LÈS 10
Sea Determiná pa Yuda Hende Bira Disipel
Prinsipio di Beibel: “Gustosamente nos a kompartí no solamente e bon notisia di Dios ku boso, sino tambe nos mes alma, pasobra nos ta stima boso masha hopi.”—1 Tes. 2:8.
Loke Hesus A Hasi
1. Wak e VIDIO òf lesa Huan 3:1, 2. Despues, analisá e siguiente preguntanan:
Dikon Nikodemo a preferá di bai papia anochi ku Hesus?—Wak Huan 12:42, 43.
Kon e echo ku Hesus tabata kla pa papia ku Nikodemo anochi ta mustra ku Hesus tabata determiná pa yuda hende bira disipel?
Kiko Nos Ta Siña for di Hesus?
2. Ora nos ta determiná pa yuda hende bira disipel, nos ta mustra ku nos ta stima nan.
Imitá Hesus
3. Studia na un ora i na un lugá ku ta kumbiní bo studiante di Beibel. Kisas, e ta preferá di studia riba un sierto dia di siman i na un sierto ora. Na unda lo e sintié mas kómodo pa studia? Kaminda e ta traha, na su kas òf na un lugá públiko? Si ta posibel, adaptá bo programa pa bo por studia kuné na e ora i na e lugá ku ta mihó p’e.
4. Studia regularmente. Si pa un òf otro motibu bo no por studia ku bo studiante, no kanselá boso afsprak. Pensa riba lo siguiente:
Bo por dirigí e estudio riba un otro dia di e siman?
Bo por dirigí e estudio via telefòn òf via konferensia di vidio?
Bo por pidi un otro publikadó pa studia ku bo studiante?
5. Pidi Yehova yuda bo keda ku un bon aktitut. Pidi Yehova yuda bo sigui studia ku un persona, asta si e persona no ta studia regularmente òf no ta apliká mesora loke e ta siña. (Flp. 2:13) Kisas, bo studiante tin vários bon kualidat; pidi Yehova yuda bo enfoká riba e bon kualidatnan di bo studiante.