Informe di Proclamador di Reino

Lagando Nan Luz Luza den India

E BON nobo di Reino ta ser predicá den India via 11.524 testigo gozoso. (Mateo 24:14) E 1.066 hende bautizá durante e aña di sirbishi di 1991 ta proclamador di Reino, lagando nan luz luzá pa otronan. Ki feliz nan tur a keda pa mira 28.866 hende asisti na celebracion dje Conmemoracion dje morto di Cristo!

◻ Hopi hende a siña dje speranza dje Reino pe promé bez via testimonio informal. Por ehempel, un testigo a papia tocante e Reino cu compañé di trabao, cu també tabata carpinté. Un compañé di trabao a reacciona i a cuminza laga su luz luza pa su famía i amigonan. Eseinan gozosamente a pasa e mensahe maraviyoso di Reino na otronan. Segun informe, den poco aña so, ‘mas cu 30 persona a acepta e berdad.’ Jehova a bendicioné i su rumanan spiritual nobo pasobra nan a laga nan luz luza.

◻ Un ruman hoven den un otro congregacion a laga su luz luza dunando testimonio informal na otro alumno di scol. Algun di nan tabata interesá den e speranza dje Reino, i hopi bez el a splica e Bijbel na nan te cu despues di meianochi. Uno di nan, un católico, a tuma un posicion firme pe berdad apesar di a recibi advertencia dje pastor tocante consecuencia severo si e sigi asocia cu e testigonan. Sin embargo, e studiante a keda convencí cu e tabata siña e berdad bíblico for dje testigonan, i el a sigi gana conocimento. Ne debido tempo el a bautiza i awor ta sirbi como sirbidor ministerial den e congregacion. E ta alegrá den e speranza cu ta bini mediante e maraviyoso luz dje berdad!—Romano 12:12.

◻ Un otro studiante cu a scucha e mesun testigo hoven tabata un studiante bon conocí, un ateísta, cu a tene mofa di esnan cu a bisa cu nan a kere den Dios, pero un dia el a participa den e conbersacion i a haci hopi pregunta. El a haya sorpresa ora el a recibi contesta lógico pa tur su preguntanan i a yega ne conclusion cu e Bijbel ta e Palabra di Dios. El a progresa den conocimento bíblico i finalmente a bautiza. Su tata hindú a oponé te ne punto di saqué for di cas. Sin embargo, e posicion firme dje hoven pa cu e berdad a haya recompensa ora dos ruman carnal di dje i dos amigo a acepta e berdad i a bautiza. Un ruman di dje awor ta sirbi den e oficina di sucursal den India.

◻ Un organizador di alumno també a participa den un conbersacion cu e testigo hoven. El a huma cigaría en cadena i bebe hopi. Na un tempo, e kier a golpea dos otro alumno cu a siña e berdad for dje testigo. Door cu nan a acepta e berdad, nan a nenga di participa den un huelga dje colegio i també a nenga di duna sanger durante un campaña dje colegio di colecta sanger di locual e organizador di alumno a hiba e delantera. Awor e hoven ta feliz como un Testigo di Jehova portador di luz.

◻ Na tur, e alumno cu na principio a laga su luz luza tabata un instrumento pa yuda 15 otro alumno na dedicacion i bautismo dunando nan testimonio informalmente.

Ta un gozo pa mira hopi hende den e tera grandi ei acepta e speranza bíblico dje mundo nobo di Dios i uni cu e hermandad mundial cu Jehova Dios ta recoge pa biba pa semper bao di su Reino.