Un Modelo Inspirá di Trabao di Misionero Cristian

“Bira imitador di mi, mescos cu mi tá di Cristo.”—1 CORINTIO 11:1.

1. Menciona algun manera cu Jesús a pone ehempel sobresaliente pa sigidor di dje imita. (Filipense 2:5-9)

KI UN ehempel sobresaliente Jesús a pone pa su disípelnan! Cu gusto el a laga su gloria celestial pa baha riba tera i biba cerca hende pecador. El a keda dispuesto pa experimenta mashá sufrimento pe salbacion di humanidad i, mas importante ainda, pe santificacion dje nomber di su Tata celestial. (Juan 3:16; 17:4) Ora e tabata huzgá pa determina si el a merece morto, Jesús a declara cu curashi: “P’sei mi a nace, i p’sei mi a bini na mundo, pa mi duna testimonio dje berdad.”—Juan 18:37.

2. Pakico Jesús resusitá por a manda disípel di dje continuá e trabao cu el a cuminza?

² Promé cu su morto, Jesús a duna entrenamento excelente na su disípelnan pa nan por sigi haci e trabao di duna testimonio dje berdad di Reino. (Mateo 10:5-23; Lucas 10:1-16) P’sei, despues di su resureccion, Jesús por a duna e mandamento: “Bai . . . i haci disípel di hende di tur nacion, bautizando nan den e nomber dje Tata i dje Yiu i dje spiritu santo, siñando nan pa warda tur loke mi a manda boso.”—Mateo 28:19, 20.

3. Con e trabao di haci disípel a aumenta, pero el a concentra principalmente den cua region?

³ Pe sigiente tres aña i mei disípel di Jesús a obedece e mandamento pero a limitá nan trabao na hacimento di disípel di hudío, sigidor di hudío, i samaritano circuncidá. Anto, na aña 36 EC, Dios a manda pe bon nobo ser predicá na Cornelio, un homber no circuncidá i na su famía. Durante e sigiente diez aña, otro gentil a drenta den e congregacion. Sin embargo, ta parce cu e mayor parti dje trabao tabata limitá na tera banda pariba dje Mediterráneo.—Echo 10:24, 44-48; 11:19-21.

4. Cua suceso importante a tuma lugar rond di aña 47-48 EC?

⁴ Algo tabata necesario pa motiva of capacitá hende cristian pa haci disípel di hudío i gentil den tera mas leu. Pues, rond di aña 47-48 EC, anciano dje congregacion di Antioquía di Siria a recibi e sigiente mensahe divino: “Di tur persona aparta pa mi Barnabás i Saul pe trabao pa locual mi a yámanan.” (Echo 13:2) Ripara cu nan a yama Pablo ne tempo ei pa su nomber original, Saul. Ripara, també, cu Dios a mencioná Barnabás promé cu Pablo, kizás pe motibo cu ne tempo ei Barnabás tabata considerá como esun mayor di nan dos.

5. Pakico e relato di biahe misional di Pablo i Barnabás ta di gran balor pa hende cristian ­djawe?

⁵ E relato en detaye dje biahe misional di Pablo i Barnabás ta duna hopi animacion na Testigo di Jehova, specialmente na misionero i pionero cu a bandona nan cas pa sirbi Dios den otro comunidad. Además, un repaso di Echo capítulo 13 i 14 siguramente por motiva mas hende cristian ainda pa imita Pablo i Barnabás i ampliá nan parti den e trabao importantísimo di haci disípel.

E Isla di Chipre

6. Cua ehempel misionero a pone den Chipre?

⁶ Sin tarda e dos misionero a barca na Seleucia, un haf di Siria, rumbo e isla di Chipre. Yegando tera na Salamina, nan no a malgasta tempo sino “a cuminza publica e palabra di Dios den sinagoga di hudío.” Sigiendo e modelo di Cristo, nan no a establecénan den e stad i a spera pe pueblo acudi na nan. Mas bien, nan a pasa “atraves di tur e isla.” Sin duda esei a exigi hopi camnamento na pia i hopi cambiamento di posada, siendo cu Chipre ta un isla grandi, i nan paseo a cubri e parti mas grandi di dje.—Echo 13:5, 6.

7. (a) Cua suceso sobresaliente a tuma lugar den Pafos? (b) E relato ta animános pa tene cua actitud?

⁷ Na fin di nan estadía, e dos homber tabata recompensá cu un experencia maraviyoso den e stad di Pafos. Sergio Paulo, gobernador dje isla, a scucha nan mensahe i a “bira creyente.” (Echo 13:7, 12) Pablo a skirbi despues: “Boso ta mira su yamamento di boso, rumanan, cu no hopi hende sabí na moda carnal tabata yamá, ni hopi poderosonan, ni hopi di nacimento noble.” (1 Corintio 1:26) Sin embargo, Sergio Paulo tabata un poderoso cu a recibi e mensahe. Tal experencia mester anima nos tur, specialmente misionero, pa tene un actitud positivo tocante dunamento di testimonio na oficial di gobierno, manera nos ta ser animá pa haci den 1 Timoteo 2:1-4. Tabatin bez cu homber di autoridad a duna hopi yudanza na sirbidor di Dios.—Nehemías 2:4-8.

8. (a) Cua cambio di situacion ta parce di a sosode entre Barnabás i Pablo dje tempo ei padilanti? (b) Di ki manera Barnabás tabata un bon ehempel?

⁸ Bao di influencia dje spiritu di Jehova, Pablo a hunga e papel principal den e conbertimento di Sergio Paulo. (Echo 13:8-12) Además, dje tempo ei padilanti, ta parce cu Pablo a hiba e delantera. (Compara Echo 13:7 cu Echo 13:15, 16, 43.) Esei ta di acuerdo cu e comision divino cu Pablo a recibi ne tempo di su conbertimento. (Echo 9:15) E situacion nobo kizás a pone na prueba e humildad di Barnabás. Sin embargo, en bez di considera tal cambio como un ofensa personal, probablemente Barnabás a cumpli cu e nificacion di su nomber, “Yiu di Consuelo,” i a apoya Pablo lealmente durante tur e biahe misional i despues ora algun cristian hudío a critica e sirbishi cu nan a rindi pa gentil incircunciso. (Echo 15:1, 2) Ki un bon ehempel esei ta pa nos tur, incluyendo esnan cu ta biba den cas di misionero i di Betel! Nos mester semper keda dispuesto pa acepta ahuste teocrático i duna pleno apoyo na esnan nombrá pa hiba delantera den nos.—Hebreo 13:17.

Interior di Asia Menor

9. Kico nos ta siña for dje gana di Pablo i Barnabás di bai na Antioquía di Pisidia?

⁹ Pablo i Barnabás a barca na Chipre rumbo nort pe continente di Asia. Pa un motibo desconocí, e dos misionero no a keda na costa, sino a haci un biahe largu i peligroso di rond di 180 kilometer pa Antioquía di Pisidia, situá den interior di Asia Menor. Nan tabatin cu pasa riba lomba di montaña i baha na un sabana mas cu 1.100 meter mas halto cu nivel di lamá. J. S. Howson, escolástico bíblico, a bisa: “Costumber di plundermento i bandolero dje pueblo dje montaña ei cu ta separa e terreno halto . . . for di llanura na costa di zuid, tabata famoso den tur parti di historia di antigua.” Además, e dos misionero a enfrenta peliger di elemento natural. Howson a agrega: “Ningun districto di Asia Menor ta ser mas distingí cu ‘inundacion’ cu e region montañoso di Pisidia, unda rio ta pasa over na pia di barranca enorme, of ta basha cu hopi forza door di rooi smal.” Detaye asina ta yúdanos visualiza e clase di biahe cu misionero a keda dispuesto pa haci pa causa di plamamento dje bon nobo. (2 Corintio 11:26) Di igual manera den e dia djawe, hopi sirbidor di Jehova ta enfrentá cu balentía tur sorto di obstáculo pa yega cerca hende i comparti e bon nobo cu nan.

10, 11. (a) Con Pablo a mantene un terreno común cu e auditorio? (b) Pakico hopi hudío probablemente a keda asombrá di tende di sufrimento di Mesías? (c) Cua clase di salbacion Pablo a pone dilanti oyentes?

¹⁰ Siendo cu tabatin un sinagoga hudío den Antioquía di Pisidia, e dos misionero a bai ei promé pa duna esnan cu a conoce e Palabra di Dios un oportunidad di acepta e bon nobo. Ora Pablo tabata invitá pa papia, el a lanta i a duna un discurso público magistral. Durante e discurso, el a mantene un terreno común cu hudío i nan disípel den e auditorio. (Echo 13:13-16, 26) Despues di su introduccion, Pablo a repasa e historia ilustre di hudío, haciendo nan recorda cu Jehova Dios a scoge nan antepasado anto a líbranan for di Egipto, i també a yúdanan vence habitante dje Tera Primintí. Anto Pablo a destacá e trato di Jehova cu David. Tal informacion a toca e curazón di hudío den e promé siglo pasobra nan tabata spera pa Dios lanta un desendiente di David como salbador i gobernante eterno. Anto, Pablo cu curashi a anuncia: “For di desendiente di [David], segun su promesa, Dios a trece un salbador pa Israel, Jesús.”—Echo 13:­17-23.

¹¹ Sin embargo, e clase di salbador cu hopi hudío tabata spera tabata un heroé militar pa líbranan for di dominacion romano i halza e nacion di hudío mas halto cu tur otro. P’sei, sin duda nan a keda asombrá pa tende Pablo bisa cu nan mes lider religioso a entrega Mesías pa ehecucion. Pablo a declara cu balentía, “Pero Dios a lanté for di morto.” Cerca e fin di su discurso, el a mustra e auditorio cu nan por alcanza un clase di salbacion maraviyoso. El a bisa: “Laga esaki keda conocí na boso, cu pa medio di DJE pordón di picá ta ser publicá na boso; i tur loke e ley di Moisés no por declara boso inculpable di dje, tur hende cu ta kere ta wordu declará inculpable pa medio di DJE.” Pablo a conclui su discurso consehando e auditorio pa no ser calificá hunto cu e cantidad di hende cu, segun e profecía di Dios, lo rechaza e maraviyoso percuracion pa salbacion.—Echo 13:30-41.

12. Cua resultado tabatin dje discurso di Pablo, i con esei mester animános?

¹² Ki un bon discurso bíblico, presentá asina bon! Con e auditorio a reacciona? “Hopi hudío i disípel di hudío cu a adora Dios a sigi Pablo i Barnabás.” (Echo 13:43) Ki un animacion pa nos djawe! Láganos di igual manera haci tur loke nos por pa presenta e berdad efectivamente, sea den e ­ministerio público of den comentario i discurso den reunion di congregacion.—1 Timoteo 4:13-16.

13. Pakico misionero tabatin cu bandona Antioquía di Pisidia, i cua pregunta ta presenta tocante disípel nobo?

¹³ Hende recién interesá den Antioquía di Pisidia no por a warda e bon nobo secreto den nan mes. Como resultado, “e sigiente sabat casi tur e stad a reuni hunto pa tende e palabra di Jehova.” I pronto e mensahe a plama mas leu cu e stad. Realmente, “e palabra di Jehova a sigi ser hibá através di tur e país.” (Echo 13:44, 49) Hudío envidioso no a gusta tanto interés, i nan a logra saca e dos misionero for dje stad. (Echo 13:45, 50) Con esei a afecta disípel nobo? Nan a desanimá i a entrega?

14. Pakico opositor no por a caba cu e trabao cu misionero a cuminza, i kico nos ta siña for di esei?

¹⁴ No, pasobra esei tabata e trabao di Dios. Además, e misioneronan a pone un fundeshi di fe firme den Señor Jesucristo resusitá. A keda bisto, anto cu disípel nobo a considera Cristo como nan Lider, i no e misioneronan. P’sei nos ta leza cu nan a “sigi yena cu gozo i spiritu santo.” (Echo 13:52) Ki un animacion esei ta pa misionero i otro hacidor di disípel djawe! Si nos ta haci loke nos por cu humildad i celo, Jehova Dios i Jesucristo lo bendiciona nos ministerio.—1 Corintio 3:9.

Iconio, Listra, i Derbe

15. Kico misionero a haci den Iconio, i cu cua resultado?

¹⁵ Awor Pablo i Barnabás a sigi rond di 140 kilometer zuidoost te ne otro stad di Iconio. Miedu di persecucion no a stróbanan di haci mescos cu nan a haci den Antioquía. Como resultado, segun e Bijbel: “Un multitud grandi tanto di hudío como di griego a bira creyente.” (Echo 14:1) Di nobo, hudío cu no a acepta e bon nobo a instiga oposicion. Pero e dos misionero a wanta i a dedica hopi tempo den Iconio pa yuda disípel nobo. Anto, despues di a tende cu opositor hudío tabata cla pa piédranan, Pablo i Barnabás a actua cu prudencia i a hui ne sigiente territorio, “Listra i Derbe i nan becindario.”—Echo 14:2-6.

16, 17. (a) Kico a pasa Pablo den Listra? (b) Con e tratamento di Dios cu apóstol Pablo a afecta un hoven di Listra?

¹⁶ Cu curashi “nan a sigi declarando e bon nobo” den e territorio nobo cu nunca a tende. (Echo 14:7) Ora hudío den Antioquía di Pisidia i Iconio a tende esei, nan a bai te na Listra i a convence e multitud pa piedra Pablo. Sin tempo pa scapa, Pablo tabata piedrá, di manera cu opositor di dje a kere cu e tabata morto. Nan a lastré pafó dje stad.—Echo 14:19.

¹⁷ Bo por imaginábo e angustia cu esei a causa e disípelnan nobo? Pero, ki un sorpresa, ora nan a rondoná Pablo, el a lanta riba su pia! E Bijbel no ta bisa si un hoven yamá Timoteo tabata dje disípelnan nobo ei. Siguramente na un tempo el a yega di conoce e tratamento di Dios cu Pablo i esei a haci un impresion profundo den su mente hoven. Pablo a skirbi den su segundo carta pa Timoteo: “Bo a sigi cu sumo cuidao mi siñamento, mi moda di anda den bida, . . . e sorto di cosnan cu a pasámi den Antio­quía, den Iconio, den Listra, e sorto di persecucion cu mi a soporta; i toch Señor a librámi for di nan tur.” (2 Timoteo 3:10, 11) Rond di un of dos aña despues dje piedramento di Pablo, el a bolbe pa Listra i a haya cu e hoven Timoteo tabata un cristian ehemplar, i cu e “rumanan di Listra i di Iconio a duna bon informe tocante dje.” (Echo 16:1, 2) P’sei, Pablo a scogé como compañé di biahe. Esei a yuda Timoteo ­crece spiritualmente, i cu tempo e tabata prepará pa Pablo mandé pa bishitá varios congregacion. (Filipense 2:19, 20; 1 Timoteo 1:3) Di igual manera den e dia djawe, sirbidor celoso di Dios ta un maraviyoso influencia pe hovenan, hopi di locual ta crece pa bira balioso sirbidor di Dios, manera Timoteo.

18. (a) Kico a pasa e dos misionero den Derbe? (b) Nan tabatin cua oportunidad awor, pero kico nan a haci?

¹⁸ Su mañan, despues di a scapa for di morto den Listra, Pablo a sigi cu Barnabás pa Derbe. Awor, ningun opositor a sigi, i e Bijbel ta bisa cu ‘nan a haci un bon cantidad di disípel.’ (Echo 14:20, 21) Despues di a establece un congregacion den Derbe, Pablo i Barnabás tabatin cu tuma un decision. Un carretera romano hopi usá a bai di Derbe pa Tarso. Djei tabata poco distancia te na Antioquía di Siria. Posiblemente esei tabata e manera di mas conbeniente pa nan bolbe, i e dos misionero por a kere cu awor nan a merece un descanso. Pero, den imitacion di nan Doño, Pablo i Barnabás a distingi un necesidad mas grandi.—Marco 6:31-34.

Efectuando Plenamente e Trabao di Dios

19, 20. (a) Con Jehova a bendiciona e dos misionero pa nan regreso na Listra, Iconio, i Antio­quía? (b) E pueblo di Jehova djawe por siña cua les for di esei?

¹⁹ En bez di coge e camina mas corto pa nan yega cas, e dos misionero cu curashi a bolbe i a rebishitá e mesun stadnan unda nan bida tabata den peliger. Jehova Dios a bendicionánan pa tal interés inegoísta den e carnénan nobo? Claro cu sí, pasobra e relato ta bisa cu nan por a “fortalece alma dje disípelnan, animando nan pa permanece den e fe.” Apropiadamente, nan a bisa disípel nobo: “Nos tin cu drenta den e reino di Dios através di hopi tribulacion.” (Echo 14:21, 22) Pablo i Barnabás també a hácinan corda nan yamamento como coheredero dje binidero Reino di Dios. Awe, nos també tin cu duna animacion di igual manera na disípel nobo. Nos por fortalecénan pa wanta prueba, poniendo dilanti nan e prospecto di bida eterna riba tera bao di gobernacion dje mesun Reino di Dios cu Pablo i Barnabás a predica.

²⁰ Promé cu nan a bandona cada stad, Pablo i Barnabás a yuda organiza mihor e congregacion local. Ta parce cu nan a entrená homber capacitá i a nómbranan pa hiba e delantera. (Echo 14:23) Sin duda esei a contribui na mas expansion. Di igual manera, misionero i otronan djawe, despues di yuda esnan sin experencia progresa te cu nan por acepta responsabilidad, tin bez cu nan ta bai i ta sigi nan bon trabao den otro lugar unda tin mas necesidad.

21, 22. (a) Kico a pasa despues cu Pablo i Barnabás a termina nan biahe misional? (b) Cua pregunta ta surgi?

²¹ Ora por fin e dos misionero a bolbe pa Antioquía di Siria, nan por a sinti un satisfaccion profundo. Realmente, e relato bíblico ta bisa cu nan a “ehecuta completamente” e trabao cu Dios a confiá na nan. (Echo 14:26) Ta di comprende cu relato di nan experencia a causa “gozo grandi pa tur e rumanan.” (Echo 15:3) Pero, kico dje futuro? Nan a retira awor i a keda satisfecho cu nan logramento, na moda di mundo? Di ningun manera. Despues di a bishitá e cuerpo gobernante den Jerusalem pa nan decidi e cuestion di circuncision, e dosnan a sali di nobo pa haci biahe misional. Awor nan a bai den dos direccion. Barnabás a tuma Juan Marco i a bai na Chipre, pero Pablo a haya un otro compañé, Silas, i a pasa door di Siria i Cilicia. (Echo 15:39-41) Riba e biahe ei Pablo a scoge e hoven Timoteo i a hibé cuné.

²² E Bijbel no ta menciona e resultado dje segundo biahe di Barnabás. En cuanto Pablo, el a sigi bai na un territorio nobo i a establece congregacion den por lo menos cinco stad—Filipos, Berea, Tesalónica, Corinto, i Efeso. Kico tabata clave dje éxito sobresaliente di Pablo? E mesun principionan ta práctica pa hende cristian, hacidor di disípel, den e dia djawe?

Bo ta Corda?

◻ Pakico Jesús ta ehempel sobresaliente pa imita?

◻ Di ki manera Barnabás tabata un ehempel?

◻ Kico nos ta siña for dje discurso di Pablo den Antioquía di Pisidia?

◻ Con Pablo i Barnabás a cumpli cu nan asignacion plenamente?

[Plachi na página 15]

Apóstol Pablo su manera di wanta persecucion a haci un impresion permanente riba e hoven Timoteo