Bijbel​—⁠Un Buki pa Lesa

TA MASHA fácil pa palabra superlativo caba lagá bo ora bo ta papiando tocante Bijbel. E ta e buki mas ampliamente plamá den tur historia. Bijbel ta e buki di mas bieu, mas traducí, mas citá, cu mas influencia i di mas respetá. Probablemente e ta tambe esun mas controversial. I siguramente e ta e buki cu a sobrebibí mas tantu prohibicion, kimamentu i oposicion violento. Sin embargo, desafortunadamente tin un palabra superlativo cu no por ser aplicá mas na Bijbel. Ta improbabel cu ainda e ta e buki mas ampliamente lesá den mundu.

Aunke hende por tin un Bijbel un caminda den cas, hopi ta sinti cu nan ta muchu ocupá pa realmente dedicá tempu pa les’é. Un tempu, lesamentu tabata un pasatempu popular. Sin embargo, awor, mayoria hende ta preferá di dedicá nan tempu liber na wak television of haci algu otro. Esnan cu ainda ta dedicá un poco tempu na lesamentu generalmente ta preferá algu leve i fácil. Lesamentu di Bijbel ta exigí concentracion, i mayoria hende no ta concentrá mas profundamente riba loke nan ta lesa.

Sin embargo, Bijbel no a sobrebibí simplemente pa lagu’e para riba nos reki di buki. Tin bon motibu pakico bo mester les’é. Considerá algun dato tocante dje.

Nada Straño cu El A Dura!

E palabra “Bijbel” ta bini dje palabra griego bi·bliʹa, nificando “bukinan chikitu.” Esaki ta haci nos corda cu Bijbel ta consistí di un cantidad di buki​—⁠algun no asina chikitu! Nan a ser skirbí durante un periodo di mil seis cien aña. Aunke e escritornan tabata hende, nan a ser inspirá pa un Fuente mas haltu. Un escritor di Bijbel a bisa: “Profecia no a yega na ningun tempu via e boluntad di hende, sino hende a papia di parti di Dios segun nan a ser hibá pa spiritu santu.” (2 Pedro 1:21) Loke ta cierto di profecia bíblico ta cierto tambe dje resto di Bijbel. E “bukinan chikitu” aki divinamente inspirá ta yená cu e pensamentunan elevá di Jehova Dios. (Isaías 55:⁠9) Nada straño cu Bijbel a dura asina tantu tempu!

Pa sirbidornan di Dios, Bijbel semper tabata e buki di mas importante. Nan ta di acuerdo cu apostel Pablo, siendo e mes un dje escritornan bíblico. El a bisa: “Tur Scritura ta inspirá di Dios i ta probechoso pa siña.” (2 Timoteo 3:16) Di acuerdo cu esei, Bijbel ta e base dje fe di Testigonan di Jehova awe. E ta determiná nan doctrinanan i ta goberná nan conducta. Di henter curason nan ta recomendá pa tur hende lesa algun parti dje Palabra di Dios tur dia i meditá apreciativamente riba su contenido.​—⁠Salmo 1:​1-3.

E Custumber di Lesa Bijbel

E custumber di lesa e Scritura tabata beneficioso den pasado. Reynan di Israel a ser mandá pa traha nan propio copia dje Ley skirbí na man​—⁠awor un parti importante di Bijbel​—⁠i pa les’é diariamente como un recordatorio constante dje boluntad di Dios pa nan. (Deuteronomio 17:​18-20) Keda sin haci esaki a causa e caida di hopi rey.

E balor di studia e Scritura ta ser ilustrá den e caso dje profeta di edad, Daniel. Debí na su studio personal dje partinan di Bijbel cu a existí den su dia, Daniel, miéntras e tabata den exilio na Babilonia, tabata capas pa ‘dicerní mediante e bukinan’ cu un profecia importante registrá dor di Jeremías tabata cerca di haña su cumplimentu.​—⁠Daniel 9:⁠2.

N’e tempu di Jesus su nacimentu, Simeon, e homber “hustu i reverente” a spera cu confiansa pa mira esun kende lo a bira e Cristo, of e Mesías. Simeon a ser primintí cu lo e no muri promé cu e mira e Cristo. Su referencia n’e profecia di Isaías ora e tabatin e baby Jesus den su brasanan ta mustra cu Simeon tabata un lector atento dje bukinan di Bijbel cu ya a ser skirbí den su dia.​—⁠Lucas 2:​25-32; Isaías 42:⁠6.

Ora Juan Bautista tabata predicando, “e pueblo tabata den expectativa” dje Mesías. Kico esaki ta indicá? E ta indicá cu hopi hende entre e hudiunan tabata conocé e profecianan mesiánico registrá den e Scritura. (Lucas 3:15) Esaki ta interesante, pasobra den e dianan ei bo no por a haña un buki fácilmente. Copianan di bukinan di Bijbel mester a ser skirbí over na man cuidadosamente, i p’esei nan tabata caru i difícil pa obtené. Con hende a familiarisá cu nan contenido?

Den hopi caso, dor di lesamentu público. Por ehempel, Moises a manda pa na cierto tempu fiho, lesa henter e Ley duná pa Dios n’e israelitanan congregá. (Deuteronomio 31:​10-13) Pa promé siglo E.C., lesamentu público di bukinan di Bijbel tabata ampliamente plamá. Disipel Santiago a remarcá: “Desde tempu antiguo Moises tabatin den stad tras di stad esnan cu ta predik’é, pasobra nan ta les’é na bos haltu den e snoanan riba tur sabat.”​—⁠Echo 15:21.

Awe, ta fácil pa bo tin bo mes copia personal di Bijbel. Por lo ménos algun dje “bukinan chikitu” aki ta disponibel den e idiomanan di 98 porciento dje poblacion di mundu. Pues ta tristu cu hopi hende no ta interesá pa siña loke Bijbel tin di bisa nan. Esaki kisas ta un era científico, pero e Palabra di Dios, Bijbel, ta ainda extraordinariamente “probechoso pa siña.” E ta duna conseho sano riba moralnan, relacionnan humano i hopi otro tópico. Ademas, Bijbel ta ofrecé e único speransa sigur pa un futuro pacífico.

Les’é Regularmente

P’esei, Testigonan di Jehova a haci como un parti importante di nan trabou pa animá lesamentu regular di Bijbel. Cu letternan diki riba e edificio dje fábrica na nan sede mundial na Brooklyn, New York, ta aparecé e spiertamentu: “LESA E PALABRA DI DIOS, BIJBEL SANTU, DIARIAMENTE.” Miyones di hende cu ta pasa ei banda a mira e palabranan aki, i nos ta spera cu hopi a tuma nan na pechu.

Den e mas cu 73.000 congregacion di Testigonan di Jehova rond mundu, sesionnan dje Scol di Ministerio Teocrático ta ser tené tur siman. Parti dje curso ta e lesamentu público di un porcion selectá for di Bijbel. Tur den asistencia tambe ta haña un asignacion pa lesa algun capítulo di Bijbel tur siman privádamente den nan mes cas. Esnan cu ta cana al paso cu e programa aki cu tempu ta lesa henter Bijbel.

E areglo aki ta na armonia cu un dje bukinan di instruccion usá den e scol aki. E Guía para la Escuela del Ministerio Teocrático ta bisa: “Bo programa personal mester incluí tempu pa lesa Bijbel mes. Ta masha balioso pa les’é completamente di kaft pa kaft. . . . Sin embargo, bo meta den lesamentu nunca mester ta pa djis abarcá e material, sino pa haña e punto di bista general di dje cu e intencion di record’é. Tuma tempu pa meditá riba loke e ta bisa.”

Otro publicacionnan producí dor di Testigonan di Jehova di igual manera ta animá lesamentu di Bijbel. Por ehempel, den e revista compañé di esaki, ¡Despertad!, a aparecé e siguiente animacion pa hóbennan: “Bo a lesa . . . Bijbel completamente? En berdad, Bijbel ta un buki grandi, pero pakico no dividí e lesamentu di dje den porcionnan chikitu? . . . E bereanonan ‘di mente noble cuidadosamente a examiná e Scritura diariamente.’ (Echo 17:11) Si bo sigui un programa diario di lesa solamente 15 minut pa dia . . . , bo por completá e lesamentu di Bijbel dentro di un aña.” Sí, Testigonan di Jehova ta kere cu cristiannan di tempu moderno mester ta bon familiarisá cu e Scritura, net manera Dios su sirbidornan tabata den tempu antiguo.

Cu esaki na mente, e Testigonan a promové un version di siglo 20 moderno di lesamentu público di Bijbel. Na varios idioma, nan a traha grabacion di caset di lesamentu cu ta cubri henter Bijbel. Pa hopi hende esaki a resultá di ta un yudansa excelente pa vence algun obstáculo den lesamentu di Bijbel. Algun ta scucha e grabacionnan aki miéntras nan ta trahando na cas, coriendo den auto, of haciendo un cantidad di otro cosnan. Pa sinta i scucha trankilamente n’e lesamentu di un porcion di Bijbel miéntras bo ta sigui’é den bo mes copia ta un experencia deleitabel.

Si bo no ta lesando Bijbel diariamente caba, pakico no haci’é un custumber pa haci esei? Esaki no tin nodi dura largu cada dia, pero e beneficionan lo ta grandi, pasobra aplicacion dje Scritura lo permití bo actua sabí i disfrutá di un bida spiritualmente recompensador. Tambe lo bo ta actuando na armonia cu e mandamentu aki duná hopi tempu pasá n’e lider israelita Hosué: “E buki aki dje ley no mester ta apartá for di bo boca, i dia i anochi bo mester lesa den dje na bos abou, afin di percurá di haci conforme cu tur loke ta skirbí den dje; pasobra e ora ei lo bo haci bo caminda exitoso i e ora ei lo bo actua sabí.”​—⁠Hosué 1:⁠8.

E páginanan di Bijbel ta revelá Jehova su propósito amoroso pa humanidad obediente. Conocimentu exacto di su Palabra inspirá ta resultá den berdadero felicidad i e speransa di bida eterno den Paradijs den un maraviyoso mundu nobo di bendicion sin fin. (Lucas 23:43; 2 Pedro 3:13) Probechá di bo oportunidad pa lesa i studia Bijbel i purba alcansá e bida maraviyoso aki.