Contempla e Lealnan!

“Ken lo no realmente temé bo, Jehova, i glorificá bo nomber, pasobra abo so ta leal?”—REVELACION 15:4.

1. Ki testimonio J. F. Rutherford a duna dje lealtad di su predecesor, C. T. Russell?

JOSEPH F. RUTHERFORD, kende a sigui C. T. Russell como presidente dje Sociedad Watch Tower na 1917, a cuminsá su comentarionan n’e discurso di entiero di Russell bisando: “Charles Taze Russell tabata leal na Dios, leal na Jesucristo, leal n’e causa dje reino di Mesías. E tabata leal te den fondo di su alma—sí, leal te na morto.” Berdaderamente, esei tabata un bunita tributo pa haci na un fiel sirbidor di Jehova Dios. Nos no por duna un mayor tributo na ningun individuo cu di bisa cu el a pasa e prueba di lealtad, cu e tabata leal—leal te den fondo di su alma.

2, 3. (a) Pakico lealtad ta presentá un desafio? (b) Ken tambe ta den órden di bataya contra cristiannan berdadero den nan esfuerso pa ta leal?

² Ta difícil pa ser leal. Pakico? Pasobra lealtad ta choca cu interes propio. E cleronan di cristiandad ta esnan principal entre hende desleal na Dios. Tambe, nunca tabatin un deslealtad asina plamá manera den e relacion matrimonial awe. Adulterio ta comun i coriente. Deslealtad ta extensamente plamá tambe den e mundu di comercio. Relacioná cu esaki, segun un informe: “Hopi manager i profesionalnan . . . ta kere cu únicamente hende bobo i sokete ta leal na nan companianan awe.” Hende cu ta “muchu leal” ta ser menospreciá. “Bo promé i único lealtad mester ta na bo mes,” ta e forma cu e presidente di un empresa di asesoramentu riba tereno di maneho i personal ehecutivo a expres’é. Sin embargo, papia di lealtad na bo mes ta nificá corumpí e nificacion dje palabra. E ta haci nos corda riba loke Mikéas 7:2 ta declará: “Esun leal a perecé for dje tera.”

³ Na un grado muchu mas significativo, Satanas i su demoñonan ta den órden di bataya contra nos, determiná pa haci nos desleal na Dios. P’e motibu ei Efesionan 6:12 ta bisa cristiannan: “Nos tin un lucha, no contra sanger i carni, sino contra e gobiernunan, contra e autoridadnan, contra e gobernantenan dje mundu dje scuridad aki, contra e mal forsanan spiritual den e lugánan celestial.” Sí, nos tin cu haci caso dje spiertamentu: “Mantené boso sano huicio, sea vigilante. Boso adversario, e Diabel, ta cana rond manera un leon cu ta gruña, buscando un hende pa devorá.”—1 Pedro 5:8.

4. Ki tendencianan ta hacié asina difícil pa ser leal?

⁴ Otro cos cu ta hacié difícil pa ser leal ta e tendencianan egoista cu nos a heredá for di nos mayornan, manera ta ser mencioná na Génesis 8:21: “E inclinacion dje curason di hende ta malu”—i egoista—“for di su hubentud.” Nos tur tin e problema cu apostel Pablo a confesá cu e tabatin: “E bon cu mi ta deseá mi no ta haci, pero e malu cu mi no ta deseá ta loke mi ta practicá.”—Romanonan 7:19.

Lealtad Ta Algu Special

5, 6. Kico nos por bisa en cuanto e nificacion di lealtad, i con el a ser definí?

⁵ “Lealtad” ta un palabra masha special. Asina Perspicacia para comprender las Escrituras ta declará: “No ta parce cu tin ningun palabra [papiamentu] cu ta expresá exactamente e pleno nificacion dje palabranan hebreo i griego, pero como cu ‘lealtad’ ta incluí e idea di debocion i fieldad, ora e ta ser usá en coneccion cu Dios i su sirbishi, e ta sirbi pa transmití un nificacion parecido.”a Relacioná cu “lealtad,” E Toren di Vigilancia a bisa un biaha: “Fieldad, deber, amor, obligacion, fidelidad. Kico e palabranan aki tin en comun? Nan ta diferente facetanan di lealtad.” Sí, tin asina tantu birtud cu realmente ta diferente facetanan di lealtad. En berdad ta notabel cuantu biaha lealtad i rectitud ta ligá cu otro den e Scritura.

⁶ E siguiente definicionnan tambe ta útil: ‘Lealtad por indicá un fieldad i fidelidad confiabel i continuo, firme contra vacilacion of tentacion.’ ‘Lealtad ta implicá fieldad na loke bo primintí of fidelidad continuo n’e institucion of e principionan na cua bo ta sinti bo mes moralmente obligá; e término ta duna idea di no solamente apego sino tambe resistencia contra ser tentá i halá for di e apego ei.’ Pues, hende cu ta sigui ser fiel apesar di prueba, oposicion i persecucion ta merecé pa ser yamá “leal.”

7. Ki distincion nos por haci entre lealtad i fieldad?

⁷ Sin embargo, relacioná cu esaki, kisas ta bon pa ilustrá un distincion cu por ser hací entre lealtad i fieldad. Den e parti west di Merca, tin un geiser [fuente di awa cayente] cu ta spuit damp di awa aproximadamente cada ora. E ta asina regular cu el a ser yamá ‘Old Faithful’ [Biehitu Fiel]. Bijbel ta bisa di cosnan inanimá manera luna cu nan ta fiel, pasobra bo por dependé riba nan. Salmo 89:37 ta papia di luna como “un testigo fiel den shelu.” Bijbel ta mustra cu e palabranan di Dios ta fiel. Revelacion 21:5 ta bisa: “Esun sintá riba e trono a bisa: ‘Mira! Mi ta traha tur cos nobo.’ Tambe, e ta bisa: ‘Skirbi, pasobra e palabranan aki ta fiel i berdadero.’” Tur e cosnan aki ta fiel i bo por dependé riba nan, pero nan no ta capas pa desplegá ningun apego of cualidad moral, manera lealtad.

Jehova, Esun Supremamente Leal

8. Ki testimonio bíblico ta identificá e ehempel supremo di lealtad?

⁸ No cabe duda, Jehova Dios ta e ehempel di mas sobresaliente di lealtad. Jehova tabata leal na e rasa humano, asta dunando su Yu pa hende por ricibí bida eterno. (Juan 3:16) Na Jeremías 3:12, nos ta lesa: “‘Bolbe, O Israel apóstata,’ ta e expresion di Jehova. ‘Lo mi no haci mi cara cai di un manera rabiá riba boso, pasobra mi ta leal.’” Mas prueba di Jehova su lealtad ta e palabranan registrá na Revelacion 16:5: “Abo, Esun cu ta i cu tabata, Esun leal, ta hustu.” Anto, tambe, na Salmo 145:17 nos ta lesa: “Jehova ta hustu den tur su camindanan i leal den tur su obranan.” En realidad, Jehova ta asina sobresaliente den su lealtad cu Revelacion 15:4 ta declará: “Ken lo no realmente temé bo, Jehova, i glorificá bo nomber, pasobra abo so ta leal?” Jehova Dios ta leal n’e grado di mas haltu.

9, 10. Ki registro di lealtad Jehova a traha den su trato cu e nacion di Israel?

⁹ E historia dje nacion di Israel en particular ta contené testimonio abundante di Jehova su lealtad na su pueblo. Den e dianan dje huesnan, Israel a desviá for di adoracion berdadero bes tras bes, pero cada bes atrobe Jehova a tene duele di nan i a salba nan. (Huesnan 2:15-22) Atrabes dje cincu siglonan cu Israel tabatin reynan, Jehova a mustra su lealtad n’e nacion ei.

¹⁰ Jehova su lealtad a hacié tene pacenshi cu su pueblo, manera 2 Crónicanan 36:15, 16 ta mencioná: “Jehova e Dios di nan antepasadonan a sigui manda [aviso] contra nan pa medio di su mensaheronan, mandando bes tras bes, pasobra el a sinti compasion pa su pueblo i pa su habitacion. Pero continuamente nan tabata burla dje mensaheronan dje Dios berdadero i despreciá su palabranan i mofa di su profetanan, te ora e furia di Jehova a subi contra su pueblo, te ora no tabatin curacion.”

11. Ki siguransa of consuelo Jehova su lealtad ta duna nos?

¹¹ Debí cu Jehova ta supremamente leal, apostel Pablo por a skirbi, manera Romanonan 8:38, 39 ta bisa: “Mi ta convencí cu ni morto ni bida ni angel ni gobiernu ni cosnan aki awor ni cosnan pa bini ni podernan ni haltura ni profundidad ni ningun otro creacion lo por separá nos for dje amor di Dios cu ta den Cristo Jesus nos Señor.” Sí, Jehova ta sigurá nos: “Di ningun manera lo mi bandoná bo ni di ningun manera desampará bo.” (Hebreonan 13:5) Berdaderamente, ta un consuelo pa sa cu Jehova Dios ta semper leal!

Jesucristo, e Yu Leal

12, 13. Ki testimonio nos tin en cuanto e lealtad dje Yu di Dios?

¹² Esun cu ta imitá Jehova perfectamente den enfrentá e desafio di lealtad tabata i ta Jesucristo. Cu bon motibu apostel Pedro por a cita Salmo 16:10 i aplik’é na Jesucristo na Echonan 2:27: “Lo bo no laga mi alma den Hádes, ni lo bo no permití esun leal na bo mira corupcion.” Jesucristo merecidamente a ser yamá “esun leal.” E ta cabalmente leal na su Tata i n’e Reino primintí di Dios. Promé Satanas a purba kibra Jesus su integridad usando tentacionnan, atraccion na interes propio. Fracasando den esei, e Diabel a recurí na persecucion, finalmente causando Jesus su morto riba e staca di ehecucion. Nunca Jesus a kita for di su lealtad na su Tata celestial, Jehova Dios.—Mateo 4:1-11.

¹³ Jesucristo tabata leal na su siguidornan na armonia cu e promesa registrá na Mateo 28:20: “Mira! mi ta cu boso tur e dianan te n’e conclusion dje sistema di cosnan.” Na cumplimentu cu e promesa ei, e ta eherciendo lealmente liderato riba su congregacion for di Pentecoste 33 E.C. te n’e tempu actual.

Hende Imperfecto cu Tabata Leal

14. Ki ehempel di lealtad Job a pone?

¹⁴ Awor, kico di hende imperfecto? Nan por ta leal na Dios? Nos tin e ehempel sobresaliente di Job. Satanas a haci e asuntu masha cla den su caso. Job tabata leal na Jehova Dios, of e tabata sirbié solamente pa motibu di interes propio? Satanas a gaba cu e por a alehá Job for di Jehova dor di hinca Job den problema. Ora Job a perde tur su posesionnan, tur su yunan, i asta su salú, su esposa a urgié: “Plega Dios i muri!” Pero Job tabata leal, pasobra el a bis’é: “‘Manera un dje muhernan insensato ta papia, abo tambe ta papia. Nos lo aceptá meramente loke ta bon for dje Dios berdadero i no aceptá tambe loke ta malu?’ Den tur esaki Job no a peca cu su lipnan.” (Job 2:9, 10) En realidad, Job a bisa su supuesto consoladornan: “Aunke [Dios] matá mi, tog lo mi spera den dje.” (Job 13:15, New International Version) Nada straño cu Job a ricibí Jehova su aprobacion! P’esei, Jehova a bisa Elifas e temanita: “Mi rabia a bira ardiente contra bo i bo dos compañeronan, pasobra boso no a papia tocante mi loke ta verídico manera mi sirbidor Job a haci.”—Job 42:7, 10-16; Santiago 5:11.

15. Ki testimonio bíblico nos tin pa loke ta e lealtad di hopi sirbidor di Jehova Dios?

¹⁵ Di tur e homber i muhernan di fe describí den Hebreonan capítulo 11 nos por bisa cu nan tabata leal. Nan tabata no solamente fiel sino tambe leal luchando cu presionnan. Pues, nos ta lesa di esnan “cu pa medio di fe . . . a cera boca di leonnan, a detené forsa di candela, a scapa for di fila di spada . . . Sí, otronan a ricibí nan prueba dor di mofa i sota, en berdad, mas cu esei, dor di cadena i prizon. Nan a ser piedrá, nan a ser probá, nan a ser di zag na dos, nan a muri matá cu spada, nan a cana rond den cueru di carné, den cueru di cabritu, miéntras nan tabata den necesidad, den tribulacion, bou di maltrato.”—Hebreonan 11:33-37.

16. Ki ehempel di lealtad apostel Pablo a suministrá?

¹⁶ E Scritura Griego Cristian tambe ta duna e ehempel notabel di apostel Pablo. Cu bon motibu e por a bisa n’e cristiannan tesalonicense relacioná cu su ministerio: “Boso ta testigo, Dios tambe, ki leal i hustu i inculpabel nos a resultá di ta pa boso, creyentenan.” (1 Tesalonicensenan 2:10) Nos tin mas prueba di Pablo su lealtad den su palabranan registrá na 2 Corintionan 6:4, 5, unda nos ta lesa: “Di tur manera nos ta recomendá nos mes como ministernan di Dios, dor di wanta hopi, dor di tribulacion, dor di casonan di necesidad, dor di dificultad, dor di golpi, dor di prizon, dor di desordu, dor di labor, dor di anochinan sin drumi, dor di tempu sin cuminda.” Tur esaki ta duna prueba cu apostel Pablo tabatin respet propio pasobra e tabata leal.

Esnan Leal den Tempu Moderno

17. Ki palabranan di J. F. Rutherford a mustra su determinacion pa ser leal?

¹⁷ Yegando den tempu moderno, nos tin e ehempel excelente cu nos a considerá caba den nos introduccion. Nota loke e buki Siguridad mundial bao di “Prinz di Paz,” a declará na página 146 bou dje subtema “Lealtad Durante e Tempu di Encarcelacion.” Ei e ta bisa: “Demostrando lealtad n’e organisacion di Jehova durante e tempu di su encarcelacion, e presidente dje Sociedad Watch Tower, Joseph F. Rutherford, dia 25 di december, 1918, a skirbi lo siguiente: ‘Dor cu mi a nenga di haci compromiso cu Babilonia, sino a purba fielmente di sirbi mi Señor, mi ta den prizon, pa locual mi ta gradicidu. . . . Mi ta preferá hopi mas Su aprobacion i sonrisa i ser den prizon, en bes di haci compromiso cu e Bestia of entregá na dje i keda liber i haña aplauso di henter e mundu.’”b

18, 19. Ki ehempelnan genuino di lealtad den e tempu actual nos tin?

¹⁸ Nos tin ehempelnan excelente di lealtad den hopi otro cristiannan cu a wanta persecucion. Entre individuonan leal asina tin Testigonan di Jehova aleman durante e régimen nazista, manera e video Purple Triangles, ampliamente distribuí na idioma ingles, ta mustra. Notabel tambe ta e hopi leal Testigonan africano, manera esnan na Malawi. Aya, un guardia di prizon a duna testimonio dje lealtad dje Testigonan, bisando: “Nunca nan lo haci compromiso. Nan ta simplemente aumentá.”

¹⁹ Bo no por lesa Anuario de los testigos de Jehová dje último añanan sin keda impresioná p’e lealtad cu cristiannan berdadero a desplegá, manera esnan na Grecia, Mozambique i Polonia. Hopi di nan a sufri di tortura masha doloroso; otronan a ser matá. Página 177 di e Anuario para 1992 ta mustra e potret di nuebe homber cristian na Etiopia cu a enfrentá e desafio di lealtad te n’e punto cu nan a ser matá. Como Testigo di Jehova, nos no ta contentu di tin asina tantu ehempel excelente pa incitá nos pa enfrentá e desafio di lealtad?

20. Kico ta e resultado si nos permanecé leal?

²⁰ Resistiendo tentacion i presion lealmente, nos ta desaroyá nos respet propio. Pues, anto, na ken su banda dje cuestion di lealtad nos kier ser hañá? Dor di enfrentá e desafio di lealtad, nos ta tuma Jehova Dios su banda dje cuestion i ta duna prueba cu Satanas e Diabel ta un mentiroso baho i grosero! Asina nos ta gana e aprobacion di nos Formador, Jehova Dios, i e recompensa di bida eterno den felicidad. (Salmo 37:29; 144:15b) Loke ta necesario pa enfrentá e desafio di lealtad lo ser considerá siguientemente.

[Nota]

Con Lo Bo Contestá?

◻ Pakico ta difícil pa ser leal?

◻ Pakico nos por bisa cu “lealtad” ta un palabra masha special?

◻ Ki ehempelnan bíblico nos tin di hende imperfecto cu tabata leal?

◻ Ki ehempelnan excelente di lealtad den tempu actual nos tin?

[Plachi na página 11]

Charles Taze Russell

[Plachi na página 12]

Jesus berdaderamente tabata “esun leal” di Jehova

[Plachi na página 13]

Job, aunke imperfecto, a duna prueba di ta leal na Dios

[Plachi na página 14]

Pablo a pone un ehempel excelente di lealtad na Jehova