Sirbiendo Lealmente cu e Organisacion di Jehova

“Cu un hende leal lo bo actua den lealtad.”—2 SAMUEL 22:26.

1, 2. Cua ta algun ehempel di lealtad cu nos tur por mira den e congregacion?

UN ANOCHI lat un anciano ta prepará un discurso pa un reunion cristian. E tin gana di stop i bai sosegá; en bes di esei, e ta sigui traha, buscando ehempelnan bíblico i ilustracionnan cu lo alcansá curason i animá e tou. Riba e anochi dje reunion, un mama cu un tata dje mésun congregacion ei ta agotá i lo tin gana di disfrutá di un anochi na cas; en bes di esei, cu pacenshi nan ta prepará nan yunan i ta bai reunion. Despues dje reunion, un grupo di cristian ta papia tocante e parti dje anciano. Un ruman muher ta sinti su mes tentá pa mencioná cu e mésun ruman homber ei un biaha a ofend’é; en bes di esei, e ta papia entusiasmá tocante un dje puntonan cu el a trece dilanti. Bo ta mira kico tur e senarionan aki tin en comun?

² Esei ta lealtad. E anciano ta traha lealmente pa sirbi e tou di Dios; e mayornan ta asistí lealmente na reunionnan di congregacion; e ruman muher ta apoyá e ancianonan lealmente. (Hebreonan 10:24, 25; 13:17; 1 Pedro 5:2) Sí, den tur aspecto di bida, nos ta mira e pueblo di Dios determiná pa sirbi lealmente cu e organisacion di Jehova.

3. Pakico ta asina importante pa nos permanecé leal n’e organisacion terenal di Jehova?

³ Ora Jehova ta wak den direccion dje mundu corupto aki, e ta mira masha poco lealtad. (Mikéas 7:2) Cuantu su curason mester alegrá ora e observá e lealtad di su pueblo! Sí, bo mes lealtad ta dun’é deleite. Sin embargo, esei ta pone Satanas, e rebelde original, yena cu furia, i ta duna prueba cu e ta un mentiroso. (Proverbionan 27:11; Juan 8:44) Bo por verwagt cu Satanas lo trata na kibra bo lealtad na Jehova i na Su organisacion terenal. Laga nos considerá algun manera den cua Satanas ta haci esaki. Asina nos por mira mihó con pa keda leal te n’e fin.—2 Corintionan 2:11.

Enfocando Riba Imperfeccion Por Caba cu Lealtad

4. (a) Pakico ta fácil pa asumí un punto di bista negativo di esnan cu tin un posicion di autoridad? (b) Con Core a resultá di ta desleal n’e organisacion di Jehova?

⁴ Ora un ruman homber tin un posicion di responsabilidad, su fayonan por bira mas bisto. Ki fácil ta pa criticá ‘un splenter den e wowo di nos ruman miéntras cu nos ta ignorá un biga den nos mes wowo’! (Mateo 7:1-5) Sin embargo, concentrando riba fayonan por fomentá deslealtad. Pa ilustrá, considerá e contraste entre Core i David. Core a carga hopi responsabilidad, i probablemente e tabata leal pa hopi aña, pero el a bira ambicioso. El a cuminsá carga rencor contra e autoridad di Moises i Aron, su primunan. Aunke Moises tabata e persona di mas mansu di tur hende, evidentemente Core a cuminsá wak e cu wowo crítico. Probablemente el a mira fayonan den Moises. Sin embargo, e fayonan ei no a hustificá Core su deslealtad n’e organisacion di Jehova. El a ser destruí for di meimei dje congregacion.—Númeronan 12:3; 16:11, 31-33.

5. Pakico David por a sinti su mes tentá pa rebelá contra Saul?

⁵ David, di otro banda, a sirbi bou di Rey Saul. Un tempu Saul tabata un bon rey, pero despues el a bira malbado. David tabatin mester di fe, awante i asta un tiki ingeniosidad pa sobrebibí e atakenan di Saul cu tabata yalurs. Tog, ora David a haña un chens di tuma vengansa, el a bisa cu esei tabata ‘inconcebibel, for dje punto di bista di Jehova,’ p’e cometé un acto desleal contra un cu Jehova a ungi.—1 Samuel 26:11.

6. Asta si nos percibí debilidad i fayonan den e ancianonan, kico nos no mester haci nunca?

⁶ Ora algun di esnan cu ta hiba delantera den nos ta parce di ta tuma decisionnan robes, ta usa palabranan severo of ta parce di mustra faboritismo, nos lo keha tocante nan, tal bes contribuyendo na un spiritu crítico den e congregacion? Nos lo keda sin bai reunionnan cristian como un forma di protesta? Claro cu no! Mescos cu David, nunca nos lo permití e fayonan di un otro persona impulsá nos pa ta desleal na Jehova i su organisacion!—Salmo 119:165.

7. Kico ta algun práctica corupto cu a desaroyá en coneccion cu e tempel den Jerusalem, i con Jesus a sinti tocante esaki?

⁷ E hende cu a duna e ehempel mas grandi di lealtad tabata Jesucristo, describí proféticamente como ‘esun leal’ di Jehova. (Salmo 16:10) E maluso corupto dje tempel den Jerusalem mester a haci lealtad un desafio. Jesus tabata sa cu e trabou dje sumo sacerdote i e sacrificionan a prefigurá su mes ministerio i morto sacrificial, i e tabata sa ki vital tabata pa hende siña for di esakinan. P’esei el a yena cu indignacion hustu ora el a mira cu e tempel a bira “un cueba di ladron.” Cu e autoridad cu Dios a dun’é, dos biaha el a dal paso pa limpi’é.a—Mateo 21:12, 13; Juan 2:15-17.

8. (a) Con Jesus a mustra lealtad n’e areglo di tempel? (b) Con nos por mustra cu nos ta apreciá di ta adorá Jehova huntu cu su organisacion limpi?

⁸ Tog, Jesus a sostené lealmente e areglo dje tempel. For di infancia, e tabata asistí n’e festivalnan n’e tempel i hopi biaha a siña otronan ei. Asta e tabata paga e impuesto di tempel—aunke e no tabata realmente obligá pa haci esei. (Mateo 17:24-27) Jesus a encomendá e biuda pober pa a tira “tur loke e tabatin pa biba” den e caha di placa dje tempel. Un poco tempu despues, Jehova a rechasá e tempel ei permanentemente. Pero te n’e ora ei, Jesus tabata leal na dje. (Marco 12:41-44; Mateo 23:38) E organisacion terenal di Dios awe ta hopi mas superior cu e sistema hudiu cu su tempel. Ta cierto cu e no ta perfecto; p’e motibu ei ta haci ahustenan de bes en cuando. Pero e no ta yená cu corupcion, i Jehova Dios no ta bai reemplas’é tampoco. Nunca nos mester permití ningun imperfeccion cu nos percibí den dje amargá nos of pone nos adoptá un actitud crítico i kehoso. Mas bien, laga nos imitá e lealtad di Jesucristo.—1 Pedro 2:21.

Nos Mes Imperfeccionnan

9, 10. (a) Con e sistema di cosnan di Satanas ta saca probecho di nos imperfeccionnan pa asina pone nos haci algu desleal? (b) Kico un persona cu a cometé picá serio mester haci?

⁹ Tambe Satanas ta purba promové deslealtad dor di saca probecho di nos imperfeccionnan. Su sistema di cosnan ta probechá di nos debilidadnan, i ta tenta nos pa haci loke ta robes den bista di Jehova. Lamentablemente, tur aña miles ta sucumbí na inmoralidad. Algun ta haci e deslealtad aki mas grave dor di hiba un bida dòbel, continuando den un curso di malecho miéntras cu nan ta pretendé cu ainda nan ta cristiannan fiel. Como reaccion riba artículonan tocante e tópico aki den e seri di “Hóbennan Sa Puntra . . .” den e revista Spierta!, un muher hóben a skirbi: “E artículonan a describí loke mi a haci den mi bida.” Na scondí, el a cultivá amistad cu hóbennan cu no tabata stima Jehova. E resultado? E ta skirbi: “Mi a rebahá mi bida te na suela, i mi a hañá mi enbolbí den inmoralidad i mi mester a ser reprendé. Mi a daña mi relacion cu Jehova, i e confiansa di mi mayornan i e ancianonan a bai perdí.”b

¹⁰ E muher hóben aki a ricibí yudansa for dje ancianonan i a cuminsá sirbi Jehova lealmente atrobe. Sin embargo, desgraciadamente hopi ta sufri consecuencianan pió, i algun no ta bolbe nunca mas bek n’e congregacion. Ta muchu mas mihó pa ta leal i resistí tentacion den e mundu malbado aki! Haci caso dje spiertamentunan for dje revistanan Toren di Vigilancia i Spierta! riba asuntunan manera asociacion mundano i entretenimentu degradante. Ohalá bo no cai niun biaha den conducta desleal. Pero si esei sosodé mes, nunca pretendé un cos cu bo no ta. (Salmo 26:4) Mihó, busca yudansa. P’esei tin mayornan i ancianonan cristian.—Santiago 5:14.

11. Pakico lo ta incorecto pa mira nos mes como un mal hende sin speransa, i ki precedente bíblico por yuda nos corigí nos punto di bista?

¹¹ Nos imperfeccionnan lo por hinca nos den peliger den un otro manera. Algun persona cu ta cometé un acto di deslealtad ta stop di purba agradá Jehova. Corda, David a cometé picánan masha serio. Tog, hopi tempu despues di David su morto, Jehova a record’é como un sirbidó fiel. (Hebreonan 11:32; 12:1) Pakico? Pasobra e nunca a stop di purba agradá Jehova. Proverbionan 24:16 ta bisa: “E hustu por cai asta shete biaha, i lo e lanta sigur.” Siguramente, si nos cai den picánan menor—sí, bes tras bes—debí na un of otro debilidad cu nos ta luchando cuné, tog nos por ta hustu den bista di Jehova si nos ta sigui “lanta”—esta, repentí sinceramente i reanudá un curso di sirbishi leal.—Compará cu 2 Corintionan 2:7.

Cuidou cu Formanan Sutil di Deslealtad!

12. Den e caso dje fariseonan, con un punto di bista rígido i fanático di ley a hiba na deslealtad?

¹² Deslealtad ta presentá tambe den formanan mas sutil. E por ta asta disfrasá na lealtad! Por ehempel, e fariseonan den tempu di Jesus probablemente a haña cu nan tabata masha leal.c Pero nan no a mira e diferencia entre ser leal i ser un fanático inflexibel di regla cu hende a traha, pasobra nan tabata rígido i tabatin tendencia di husga severamente. (Compará cu Eclesiástes 7:16.) Den esaki en realidad nan tabata desleal—na e pueblo cu nan mester tabata sirbiendo, na e spiritu dje Ley cu nan a pretendé di siña, i na Jehova mes. Jesus, di otro banda, tabata leal na e spiritu dje Ley, cua tabata basá riba amor. Dje manera ei el a fortalecé i animá hende, net manera e profecianan Mesiánico a predicí.—Isaías 42:3; 50:4; 61:1, 2.

13. (a) Con mayornan cristian lo por ta desleal? (b) Pakico mayornan mester evitá di ta demasiado severo, crítico of negativo den disipliná nan yunan?

¹³ Cristiannan cu tin un midí di autoridad ta saca masha beneficio for dje modelo di Jesus relacioná cu esaki. Por ehempel, mayornan leal sa cu nan tin cu disipliná nan yunan. (Proverbionan 13:24) Ma nan ta haci sigur pa nan no fada nan chikitunan cu disiplina severo duná cu rabia of cu un avalancha constante di crítica. Yunan cu ta sinti cu nan nunca por agradá nan mayornan of cu ta sinti cu e religion di nan mayornan ta parce di haci nan negativo i crítico so, por wel bira desanimá, i como resultado, nan ta bin terminá alehá for dje fe berdadero.—Colosensenan 3:21.

14. Con wardadónan cristian por resultá di ta leal n’e tou cu nan ta sirbi?

¹⁴ Di igual manera, ancianonan cristian i superintendentenan biahero ta duna atencion na problema i peligernan cu e tou ta enfrentá. Como wardadónan leal, nan ta ofrecé conseho ora ta necesario, haciendo sigur cu nan tin tur e datonan promé i basa cuidadosamente loke nan ta bisa riba Bijbel i riba e publicacionnan di Sociedad. (Salmo 119:105; Proverbionan 18:13) Nan sa tambe cu e carnénan ta conta riba nan pa animacion i alimentacion spiritual. P’esei nan ta trata na imitá Jesucristo, e Wardador Excelente. Nan ta sirbi e carnénan lealmente siman aden siman afó den reunionnan cristian—no kibrando nan, sino, mas bien, animando nan i fortaleciendo nan fe.—Mateo 20:28; Efesionan 4:11, 12; Hebreonan 13:20, 21.

15. Con algun persona den e promé siglo a demostrá cu nan tabatin lealtad ekibocá?

¹⁵ Un otro forma sutil di deslealtad ta lealtad ekibocá. Berdadero lealtad den e sentido bíblico no ta permití nos pone ningun otro lealtad promé cu nos lealtad na Jehova Dios. Hopi hudiu den e promé siglo a pega caprichosamente n’e Ley di Moises i n’e sistema di cosnan hudiu. Sin embargo Jehova su tempu a yega p’e kita su bendicion for dje nacion rebelde ei i pon’é riba e nacion di Israel spiritual. Solamente un grupo relativamente chikitu tabata leal na Jehova i a adaptá nan mes n’e cambio trasedental aki. Asta entre cristiannan berdadero algun siguidó di hudaismo a insistí pa bai bek na e “cosnan elemental débil i miserabel” ei dje Ley di Moises, cu a ser cumplí den Cristo.—Galationan 4:9; 5:6-12; Filipensenan 3:2, 3.

16. Con sirbidónan leal di Jehova ta reaccioná riba ahustenan?

¹⁶ Na contraste, Jehova su pueblo den tempu moderno a duna prueba cu nan ta leal atrabes di tempu di cambio. Segun cu e lus dje berdad revelá ta sigui briya mas cla, ahustenan ta ser hací. (Proverbionan 4:18) Recientemente, “e esclabo fiel i discreto” a yuda nos refiná nos comprendimentu dje término “generacion” cu ta ser usá na Mateo 24:34 i dje tempu cu e huicio di “e carnénan” i “e cabritunan” mencioná na Mateo 25:31-46 lo tuma lugá, i tambe di nos punto di bista pa cu cierto tipo di servicio no-militar. (Mateo 24:45) Sin duda algun apóstata lo tabata contentu si hopi Testigo di Jehova lo a pega rígidamente n’e comprendimentu anterior di tópiconan asina i nenga di progresá. No tabatin un reaccion asina. Pakico? Jehova su pueblo ta leal.

17. Con sernan kerí por pone nos lealtad na prueba de bes en cuando?

¹⁷ Tog, e cuestion di lealtad ekibocá por afectá nos personalmente. Ora un amigu stimá of asta un miembro di famia scoge un curso cu ta violá principionan di Bijbel, nos por sinti cu nos ta dividí entre dos lealtad. Di naturalesa nos ta sinti nos leal na miembronan di famia. Pero nunca nos mester pone nos lealtad na nan promé cu nos lealtad na Jehova! (Compará cu 1 Samuel 23:16-18.) Tampoco nos lo no yuda malechornan sconde un picá serio ni tuma parti pa nan contra ancianonan cu ta purba ‘reahustá nan cu un spiritu di suavedad.’ (Galationan 6:1) Si nos haci esei, nos lo ta desleal na Jehova, na su organisacion i na un ser kerí. Al fin i al cabo, nos lo ta previniendo un pecadó di haña e disiplina cu e tin mester, en efecto, nos lo ta strobando un expresion di Jehova su amor di alcans’é. (Hebreonan 12:5-7) Corda tambe cu “e heridanan causá pa un cu ta stima ta fiel.” (Proverbionan 27:6) Conseho franco i amoroso cu ta basá riba e Palabra di Dios kisas por heridá e orguyo di un ser kerí cu a cometé un eror, pero a lo largu lo e por salba su bida!

Lealtad Apesar di Persecucion

18, 19. (a) Kico Acab tabata kier di Nabot, i pakico Nabot a nenga? (b) E lealtad di Nabot tabata bal e prijs? Splica.

¹⁸ Tin biaha e atakenan di Satanas riba nos lealtad ta directo. Considerá e caso di Nabot. Ora Rey Acab a pone presion riba dje p’e bende su cunucu di wijndruif, el a contestá: “Ta inconcebibel di mi parti, for dje punto di bista di Jehova, pa mi duná bo e posesion hereditario di mi antepasadonan.” (1 Reynan 21:3) Nabot no tabata cabesura; e tabata leal. E Ley di Moises a manda pa ningun israelita bende un posesion hereditario of tera pa semper. (Levítico 25:23-28) Nabot siguramente tabata sa cu e rey malicioso aki por a laga mat’é, pasobra Acab ya caba a laga su esposa, Jezabel, mata hopi profeta di Jehova! Tog Nabot a para firme.—1 Reynan 18:4.

¹⁹ Tin biaha lealtad ta exigí un prijs. Jezabel, cu yudansa di algun “homber cu no ta sirbi pa nada,” a trama un acusacion contra Nabot pa un crímen cu e no a cometé. Como resultado, e i su yu hombernan a ser ehecutá. (1 Reynan 21:7-16; 2 Reynan 9:26) Esei ta nificá cu Nabot su lealtad tabata ekibocá? No! Nabot ta entre e hopi homber i muhernan leal cu ta ‘bibu’ den memoria di Jehova awor aki, durmiendo den siguridad den graf te n’e tempu di resureccion.—Lucas 20:38; Echonan 24:15.

20. Con speransa por yuda nos mantené nos lealtad?

²⁰ E mésun promesa ta duna garantia na Jehova su lealnan awe. Nos sa cu nos lealtad por sali nos caru den e mundu aki. Jesucristo a paga pa su lealtad cu su bida, i el a bisa su siguidónan cu nan lo no ser tratá mihó. (Juan 15:20) Mescos cu su speransa pa futuro a sosten’é, asina nos speransa ta sostené nos. (Hebreonan 12:2) Pues nos por keda leal apesar di tur forma di persecucion.

21. Ki garantia Jehova ta ofrecé na su lealnan?

²¹ Ta cierto cu relativamente poco di nos awe ta sufri atakenan directo asina riba nos lealtad. Pero e pueblo di Dios por hañ’é cu mas persecucion promé cu e fin yega. Con nos por ta sigur cu nos lo mantené nos lealtad? Esei ta dor di mantené nos lealtad awor. Jehova a duna nos un gran comision—predicá i siña otronan tocante su Reino. Laga nos perseverá lealmente den e trabou vital aki. (1 Corintionan 15:58) Si nos nenga di laga imperfeccion humano caba cu nos lealtad n’e organisacion di Jehova i si nos vigilá contra formanan sutil di deslealtad tal como lealtad ekibocá, e ora ei nos lo ta mihó prepará si nos lealtad haña un prueba mas severo. Sea cual sea e caso, nos por ta semper sigur cu Jehova ta infaliblemente leal na su sirbidónan leal. (2 Samuel 22:26) Sí, lo e protehá su lealnan!—Salmo 97:10.

[Nota]

Con Lo Bo Contestá?

◻ Con nos por evitá di laga imperfeccion di otronan hiba nos na deslealtad?

◻ Den ki maneranan nos mes imperfeccionnan por hiba nos na conducta desleal?

◻ Con nos por resistí e tendencia di kibocá den nos lealtad?

◻ Kico lo yuda nos keda leal asta den tempu di persecucion?

[Kuadro na página 9]

Sirbiendo Lealmente na Betel

“Laga tur cos tuma lugá decentemente i segun areglo.” Asina apostel Pablo a skirbi. (1 Corintionan 14:40) Pablo tabata sa cu pa un congregacion funcioná, lo tabatin mester di “areglo,” organisacion. Di igual manera awe, ancianonan tin cu tuma decisionnan riba cosnan práctico, manera asigná miembronan di congregacion na vários sitio di studio di buki, haci areglo pa reunionnan pa sirbishi di veld i controlá con e teritorionan ta ser trahá. Areglonan asina tin biaha por pone nos lealtad na prueba. Nan no ta mandamentunan inspirá pa Dios, i nan no por cumpli cu e preferencianan di tur individuo.

Bo ta haña ta difícil, tin biaha, pa ser leal na algun dje areglonan práctico cu ta ser hací den e congregacion cristian? Si ta asina, tal bes ta bon pa bo considerá e ehempel di Betel. Tur e 104 sucursalnan di Sociedad Watch Tower, incluyendo e sede na Merca, yama Betel, un término hebreo cu ta nificá “Cas di Dios.”* E boluntarionan cu ta biba i traha na complehonan di Betel kier pa e lugánan aki reflehá reverencia i temor pa Jehova. Esaki ta rekerí lealtad di parti di cada un.

Hopi biaha bishitantenan di Betel ta comentá tocante e ordu i limpiesa cu nan ta mira ei. E trahadónan ta organisá i contentu; nan forma di papia i maneranan i asta nan aparencia ta reflehá un concenshi cristian maduro, bíblicamente entrená. Tur miembro di un famia di Betel ta pega lealmente n’e normanan dje Palabra di Dios.

Ademas, e Cuerpo Gobernante ta duna nan un manual titulá Dwelling Together in Unity (Bibando Huntu den Unidad), cu den un manera bondadoso ta describí algun areglo práctico necesario pa un famia grandi asina traha bon huntu. (Salmo 133:1) Por ehempel, e ta trata cu acomodacion, cuminda, higiena, bistí i areglo personal, i cosnan por estilo. Miembronan di famia di Betel ta sostené i ta pega lealmente na areglonan asina, asta ora nan preferencianan personal ta bai den un otro direccion. Nan ta mira e manual aki, no como un lista largu di regla i regulacionnan rígido, sino como un conhunto di guia útil diseñá pa promové unidad i armonia. Superintendentenan ta sostené lealmente e proceduranan aki basá riba Bijbel, i nan ta usa nan den un manera positivo pa fortalecé i animá e famia di Betel pa cumpli cu nan sirbishi sagrado di Betel.

* No ta e complehonan aki di fábrica, oficina i residencia ta forma e gran tempel spiritual, of cas, di Dios. E tempel spiritual di Dios ta su areglo pa adoracion puru. (Mikéas 4:1) Como tal, e no ta limitá na ningun structura físico riba tera.

[Kuadro na página 10]

E Lealista i e Legalista

Aya na 1916 e Encyclopædia of Religion and Ethics a remarcá cu “e distincion aki entre e lealista i e legalista por ser hañá den tur tempu i na tur lugá.” El a splica: “E legalista ta haci loke nan bis’é, e no ta kibra cu regla; e ta pega fielmente n’e palabra skirbí. E lealista ta haci esaki pero bo por . . . conta mas riba dje, pasobra e ta pone henter su mente den su tarea, ta forma su actitud na armonia cu e spiritu dje propósito cu mester ser sirbí.” Mas despues, e mésun enciclopedia aki a comentá: “Ser leal ta nificá muchu mas cu pega na ley. . . . E hende leal ta distinguí su mes for di esun cu ta pega na ley como unu cu ta sirbi cu henter su curason i mente . . . E hende leal ta soru p’e no cometé picá boluntario, ni di omision ni di ignorancia.”