Informe di Proclamadornan di Reino

“Tur Bo Mandamentunan Ta e Berdad”

DJIS promé cu su morto, Moises a exhortá e pueblo di Israel pa obedecé tur e mandamentunan di Jehova. El a bisa: “Tuma na pechu tur e palabranan cu mi ta papiando como spiertamentu na boso awe, pa boso por manda boso yunan pa soru cumpli cu tur e palabranan dje ley aki. Pasobra e no ta palabra sin balor pa boso, sino cu e ta nificá boso bida.”—Deuteronomio 32:46, 47.

Cientos di aña despues, e salmista a resaltá e importancia di tur e siñansanan di Dios ora el a bisa: “Bo ta cerca, O Jehova, i tur bo mandamentunan ta e berdad.” (Salmo 119:151) Den e promé siglo, Jesus mes a haci referencia n’e balor di “tur expresion cu ta sali for dje boca di Jehova.” (Mateo 4:4) I bou di guia di Dios apostel Pablo a skirbi cu “tur Scritura ta inspirá di Dios i ta probechoso.”—2 Timoteo 3:16.

Claramente, Jehova Dios ta spera pa su adoradornan considerá seriamente henter e mensahe cu e páginanan di su Palabra ta transmití na nos. No tin ni un solo pasashi den Bijbel cu ta falta balor. Asina Testigonan di Jehova ta sinti tocante e Palabra di Dios, manera e siguiente experencia for di Maurítius ta ilustrá.

Sr. D—— tabata biba den un pueblo remoto, unda e tabata un guardia djanochi. Pa un tempu largu, e tabata buscando sinceramente p’e manera corecto pa adorá Dios. Anochi durante su warda, el a cuminsá lesa Bijbel. Cu tempu el a les’é di kaft pa kaft. El a siña cu e nomber di Dios ta Jehova—un nomber cu ta aparecé hopi biaha den su Bijbel na idioma hindi. El a haña cu e buki di Revelacion tabata specialmente fasinante.

E ora ei el a puntra su mes si tabatin un religion cu ta sigui Bijbel den su totalidad. El a nota cu e religionnan cu e tabata familiarisá cuné den e mihó dje casonan, tabata meramente sigui partinan di Bijbel. Algun religion a aceptá e Scritura Hebreo i a rechasá e Scritura Griego Cristian. Otro religionnan tabata ignorá e Scritura Hebreo, atribuyendo balor práctico solamente n’e Scritura Griego Cristian.

Un dia Sr. D—— a mira un pareha muha den awaceru i el a invitá nan pa drenta i sconde p’e awa den su cas. Nan tabata Testigonan di Jehova. E esposa tabatin e buki Revelacion—su gran culminacion ta cerca!a den su man. Mesora Sr. D—— a pidi nan e buki. E Testigonan a sinti cu e material riba e profecia di Revelacion tabata muchu profundo p’e, di manera cu nan a ofrec’é un otro publicacion na lugá di esei. Pero Sr. D—— a insistí p’e haña e buki Revelacion.

Ora el a haña su copia, el a lesa e buki lihé. Anto el a aceptá un studio di Bijbel cu Testigonan di Jehova. No a tarda muchu cu el a keda impresioná p’e echo cu e Testigonan a duna masha balor na henter e Bijbel. El a cuminsá asistí regularmente n’e reunionnan n’e Salon di Reino di Testigonan di Jehova, unda tantu e Scritura Hebreo como e Scritura Griego Cristian ta ser studiá cuidadosamente. Awor e ta un proclamador di Reino i un miembro bautisá dje congregacion cristian.

[Nota]