Bida Despues di Morto—Con, na Unda, na ki Tempu?

HENDE su Creador i Dunador-di-Bida ta duna su garantia personal cu morto di hende no necesariamente ta terminá bida pa semper. Ademas, Dios ta sigurá nos cu ta posibel pa no solamente biba atrobe pa un periodo adicional di bida limitá, sino pa biba cu e expectativa di nunca enfrentá morto atrobe! Apostel Pablo a declará senciyamente, pero tog cu confiansa: “El [Dios] a duna un garantia na tur hende dor di a resucit’é [Cristo Jesus] for di morto.”—Echonan 17:31.

Naturalmente, esaki ainda ta laga tres pregunta básico sin contesta: Con un persona morto ta bolbe bek na bida? Na ki tempu esaki lo tuma lugá? Unda e bida nobo ei ta bini na existencia? Rond parti di mundu, un variedad di contesta a ser duná n’e preguntanan aki, pero un clave vital pa determiná e berdad dje asuntu ta pa comprendé cu exactitud loke ta sosodé cu hende ora nan muri.

Inmortalidad Ta e Contesta?

Un creencia prevalente ta cu tur hende tin un parti cu ta inmortal i cu ta solamente nan curpa ta muri. Siguramente bo a tende tal afirmacion. E parti aki cu supuestamente ta inmortal ta ser yamá un biaha “alma,” otro biaha “spiritu.” Hende ta bisa cu e no ta muri huntu cu e curpa i ta sigui biba un otro caminda. Francamente, un creencia asina no a originá cu e Bijbel. Ta cierto cu personahenan di antigwedad mencioná den e Scritura Hebreo a spera cu anhelo bida despues di morto, pero no mediante sobrebibencia di un of otro parti inmortal di nan. Cu confiansa nan a spera cu anhelo un regreso den futuro na bida riba tera mediante e milager di un resureccion.

E patriarca Abraham ta un ehempel sobresaliente di un persona cu tabatin fe den un futuro resureccion dje mortonan. Describiendo con Abraham tabata dispuesto pa ofrecé su yu Isaac como sacrificio, Hebreonan 11:17-19 ta conta nos: “Pa medio di fe Abraham, ora el a ser probá, casi a ofrecé Isaac, . . . pero el a considerá cu Dios por a lant’é asta for di morto; i for di ei el a ricibié tambe den un manera di ilustracion,” ya cu Dios no a rekerí pa Isaac ser sacrificá. Dunando mas prueba dje creencia di promé entre e israelitanan di cu nan lo bini bek na bida atrobe na un tempu mas despues (en bes di un continuacion inmediato di bida den un region di spiritu), e profeta Oséas a skirbi: “For dje man di Sheol [e graf comun di humanidad] lo mi rescatá nan; for di morto lo mi recobrá nan.”—Oséas 13:14.

Pues na ki tempu e idea di inmortalidad humano inherente a drenta den pensamentu i creencia hudiu? E Encyclopaedia Judaica ta admití cu “tabata probablemente bou di influencia griego cu e doctrina di inmortalidad dje alma a drenta den hudaismo.” No obstante, hudiunan deboto te cu e tempu di Cristo ainda tabata kere i tabata spera cu anhelo un resureccion den futuro. Nos por mira esaki claramente for di Jesus su combersacion cu Marta ora su ruman homber Lázaro a muri: “P’esei Marta a bisa Jesus: ‘Señor, si bo tabata aki mi ruman lo no a muri.’ . . . Jesus a bis’é: ‘Bo ruman lo lanta.’ Marta a bis’é: ‘Mi sa cu lo e lanta den e resureccion riba e último dia.’ ”—Juan 11:21-24.

Condicion dje Mortonan

Aki atrobe, nos no tin nodi rei tocante e asuntu. E berdad simpel di Bijbel ta cu e mortonan ta “na soño,” inconciente, cu absolutamente ningun sintimentu of conocimentu. E berdad ei no ta ser presentá den Bijbel den un manera complicá of difícil pa comprendé. Considerá e textonan bíblico aki fácil pa comprendé: “E bibunan ta conciente cu nan lo muri; pero en cuanto e mortonan, nan no ta conciente di nada en absoluto . . . Tur loke bo man haña pa haci, hacié cu bo forsa mes, pasobra no tin trabou ni formacion di proyecto ni conocimentu ni sabiduria den Sheol, e lugá unda bo ta bayendo.” (Eclesiástes 9:5, 10) “No pone bo confiansa den e noblenan, ni den e yu di hende terenal, na ken ningun salbacion ta pertenecé. Su spiritu ta sali, e ta bolbe na su suela; den e dia ei su pensamentunan en berdad ta perecé.”—Salmo 146:3, 4.

Ta comprendibel, anto, pakico Jesucristo a referí na morto como soño. Apostel Juan ta registrá un combersacion entre Jesus i su disipelnan: “El a bisa nan: ‘Lázaro nos amigu a bai sosegá, pero mi ta bai ei pa lant’é for di soño.’ P’esei e disipelnan a bis’é: ‘Señor, si el a bai sosegá, lo e bira bon.’ Sin embargo, Jesus a papia tocante su morto. Pero nan a kere cu e tabata papiando tocante sosiegu di soño. P’esei, n’e momento ei Jesus a bisa nan francamente: ‘Lázaro a muri.’ ”—Juan 11:11-14.

Henter e Persona Ta Muri

E proceso di morto di hende ta enbolbé henter e persona, no djis morto dje curpa. Segun declaracionnan claro di Bijbel, nos mester concluí cu hende no tin un alma inmortal cu por sigui biba despues di morto di su curpa. E Scritura ta indicá claramente cu un alma por muri. “Mira! Tur alma—nan ta pertenecé na mi. Tantu e alma di e tata como e alma di e yu—nan ta pertenecé na mi. E alma cu ta peca—e mes lo muri.” (Ezekiel 18:4) Ningun caminda e palabranan “inmortal” of “inmortalidad” ta ser usá como algu inherente pa hende.

E New Catholic Encyclopedia ta suministrá e informacion interesante aki riba e palabranan hebreo i griego traducí como “alma” den Bijbel: “Alma den e TB [Testament Bieu] ta nepeš, den e TN [Testament Nobo] [psy·kheʹ]. . . . Nepeš ta bini di un palabra básico cu probablemente ta nificá hala rosea, i pues . . . siendo cu rosea ta distinguí e bibunan for dje mortonan, nepeš a bin haña e nificacion di bida of e persona mes of simplemente bida individual. . . . No tin ningun dicotomia [division den dos parti] dje curpa i alma den e TB. E israelita a mira asuntunan concretamente, den nan totalidad, i pues el a considerá hende como personanan completo i no como consistiendo di partinan distinto. E término nepeš, aunke traducí cu nos palabra alma, nunca ta nificá alma como algu distinto for dje curpa of dje persona individual. . . . E término [psy·kheʹ] ta e palabra di TN cu ta corespondé cu nepeš. E por nificá e fuente principal di bida, bida mes of e ser bibiente.”

Asina bo por mira anto cu na ora di morto, e persona cu anteriormente tabata na bida, of e alma bibu, ta stop di existí. E curpa ta bai bek na “stof” of n’e elementonan dje tera, sea gradualmente dor di entiero i siguí pa putrimentu, of acelerá dor di cremacion. Jehova a bisa Adam: “Stof bo ta i na stof lo bo bolbe.” (Génesis 3:19) Con, anto, bida despues di morto ta posibel? Esei ta pasobra Dios tin su mes recuerdo dje persona cu a muri. Jehova tin e poder i abilidad milagroso pa crea hende, pues no mester sorprendé nos cu e por conserbá den su memoria un registro dje patronchi di bida dje persona. Sí, tur speransa pa e persona ei biba atrobe ta den man di Dios.

Esaki ta e sentido dje palabra “spiritu,” di cua Bijbel ta bisa ta bolbe bek na e Dios berdadero cu a dun’é. Describiendo e resultado aki, e escritor inspirá dje buki di Eclesiástes ta splica: “Anto e stof ta bolbe n’e tera mescos cu el a sosodé di ta i e spiritu mes ta bolbe na e Dios berdadero cu a dun’é.”—Eclesiástes 12:7.

Dios so por pone un hende biba. Ora Dios a crea homber den Eden i a supla den su nanishi “e rosea di bida,” ademas di yena e pulmonnan di Adam cu aire, Jehova a causa p’e forsa di bida duna vitalidad na tur e celnan den su curpa. (Génesis 2:7) Debí cu e forsa di bida aki por ser pasá di mayornan pa yunan mediante e proceso di concepcion i nacementu, un bida humano por ser atribuí corectamente na Dios aunke, naturalmente, e ta ser ricibí via e mayornan.

Resureccion—Un Tempu Felis

Resureccion no mester ser confundí cu reencarnacion, locual no tin apoyo den e Scritura Santu. Reencarnacion ta e creencia cu despues cu un persona muri, e ta nace di nobo den un of mas existencia tras di otro. Nan ta bisa cu esaki ta sosodé sea riba un nivel di existencia mas haltu of un nivel mas abou compará cu e persona su bida anterior, dependiendo di ki registro e persona supuestamente a traha durante e bida anterior ei. Segun e creencia di reencarnacion aki, un persona por “nace di nobo” sea como un hende of como un bestia. Esaki ta completamente na conflicto cu loke Bijbel ta siña.

E palabra “resureccion” ta ser traducí for dje palabra griego a·naʹsta·sis, cu literalmente ta nificá “lanta para atrobe.” (Traductornan hebreo dje idioma griego a traducí e palabra a·naʹsta·sis cu e palabranan hebreo techi·yathʹ ham·me·thimʹ, cu ta nificá “rebibamentu dje mortonan.”) Resureccion ta enbolbé reactivá e patronchi di bida dje persona, cua patronchi di bida Dios a retené den su memoria. Segun e boluntad di Dios p’e individuo, e persona ta ser restorá cu sea un curpa humano of un curpa spiritual; pero tog e ta retené su identidad personal, teniendo e mésun personalidad i recuerdonan cu ora el a muri.

Sí, Bijbel ta papia di dos clase di resureccion. Un ta un resureccion pa shelu cu un curpa spiritual; esaki ta pa relativamente poco persona. Jesucristo a ricibí un resureccion asina. (1 Pedro 3:18) I el a indicá cu personanan scogí entre su siguidornan cu a cana den su pasonan, cuminsando cu e fiel apostelnan, lo experenciá esei. Na eseinan el a duna e promesa: “Mi ta bai mi caminda pa prepará un lugá pa boso. . . . Mi ta bini atrobe i lo mi ricibí boso na cas cerca mi mes, pa unda cu mi ta boso tambe por ta.” (Juan 14:2, 3) Bijbel ta referí na esaki como “e promé resureccion,” promé den tempu i den rango. E Scritura ta describí esnan resucitá asina na bida celestial como siendo sacerdotenan di Dios i gobernando como rey huntu cu Cristo Jesus. (Revelacion 20:6) E “promé resureccion” aki ta pa un cantidad limitá, i e Scritura mes ta revelá cu ta solamente 144.000 persona lo ser tumá for di entre homber i muhernan fiel. Nan lo a demostrá nan integridad na Jehova Dios i Cristo Jesus te na nan morto, despues di tabata activo den duna testimonio na otronan tocante nan fe.—Revelacion 14:1, 3, 4.

Sin duda, e resureccion dje mortonan ta un tempu di felicidad sin límite pa esnan resucitá na bida den shelu. Pero e felicidad no ta caba ei, pasobra tambe tin e promesa di un resureccion na bida aki riba tera mes. Esnan resucitá ei lo djoin un cantidad ilimitá di persona cu lo sobrebibí e fin dje mal sistema di cosnan actual. Despues di mira e cantidad chikitu di esnan cu ta cualificá pa un resureccion celestial, apostel Juan a ricibí un vision di “un multitud grandi, cu ningun hende por a conta, for di tur nacion i tribu i pueblo i lenga.” Ki un tempu felis esei lo ta ora miyones, posiblemente miles di miyones di hende, bini bek na bida aki riba tera!—Revelacion 7:9, 16, 17.

Na ki Tempu Esei Lo Ta?

Cualkier goso i felicidad lo ta di poco duracion si e mortonan a bini bek na un tera cu lo tabata yen di pleitu, dramamentu di sanger, contaminacion i violencia—manera e situacion ta awe. No, e resureccion mester warda e establecimentu di “un tera nobo.” Imaginá bo, un planeta limpiá di hende i institucionnan cu te cu awor ta parce determiná pa ruiná e tera i daña su bunitesa puru, pa no papia mes dje miseria indescriptibel cu nan a trece riba e tera su habitantenan.—2 Pedro 3:13; Revelacion 11:18.

Obviamente, e tempu pa e resureccion general di humanidad ta den futuro ainda. Tog e bon noticia ta cu e no ta masha leu. Ta cierto cu e mester warda e fin dje actual sistema malbado di cosnan aki. Sin embargo, evidencia abundante ta proba cu e tempu pa e inicio di ripiente dje “tribulacion grandi” ta cerca, culminando den “e guera dje gran dia di Dios Todopoderoso”—comunmente yamá Armagedon. (Mateo 24:3-14, 21; Revelacion 16:14, 16) Esaki lo soru p’e eliminacion di tur maldad for dje dushi planeta aki, Tera. Despues di esei lo bin Cristo Jesus su Reinado di Mil Aña, ora cu e tera progresivamente lo ser transformá den un estado di paradijs.

Bijbel ta revelá cu durante e reinado aki di Mil Aña, e resureccion di hendenan morto lo tuma lugá. E ora ei e promesa cu Jesus a haci tempu e tabata riba tera lo ser cumplí: “No straña boso riba esaki, pasobra e ora ta bini den cua tur esnan cu ta den grafnan conmemorativo lo tende su bos i lo sali . . . pa un resureccion.”—Juan 5:28, 29.

Efecto dje Speransa di Resureccion

Ki un speransa maraviyoso pa futuro e expectativa aki di un resureccion ta—un tempu ora e mortonan lo bolbe bek na bida! Cuantu esei ta animá nos segun cu nos ta enfrentá e experencianan duru di edad avansá, enfermedad, calamidadnan inesperá i tristesa, i simplemente presionnan diario i problemanan di bida! E ta kita e dolor cu morto ta causa—e no ta eliminá tristesa tur-tur pero sí e ta separá nos for di esnan cu no tin ningun speransa pa futuro. Apostel Pablo a reconocé e efecto consolador aki dje speransa di resureccion den e palabranan aki: “Rumannan, nos no kier pa boso ta ignorante en cuanto esnan cu ta drumí den morto; pa boso no pena manera e otronan cu no tin speransa tambe ta pena. Pasobra si nos fe ta cu Jesus a muri i a lanta atrobe, asina, tambe, esnan cu a bai drumi den morto mediante Jesus, Dios lo trece cuné.”—1 Tesalonicensenan 4:13, 14.

Tal bes ya caba nos a experenciá e berdad di un otro observacion cu e homber oriental Job a haci: “Hende ta caba na nada manera algu putrí, manera un bistí cu mot a come. Hende, nací di muher, tin poco dia i yen di problema. E ta sali manera un flor i ta marchitá; manera un sombra pasahero, e no ta dura hopi.” (Job 13:28–14:2, New International Version) Nos tambe ta conciente dje insiguridad di bida i e realidad tristu cu “tempu i suceso imprevisto” por sosodé cu cualkier un di nos. (Eclesiástes 9:11) Siguramente, ningun di nos ta gusta e idea di enfrentá e proceso di muri. Tog, e speransa sigur di un resureccion sí ta yuda kita e temor aplastante di morto.

P’esei, tuma curashi! Mira mas ayá di un posibel soño den morto na un bolbementu bek na bida mediante e milager di resureccion. Mira padilanti cu confiansa n’e speransa di un bida sin fin den futuro, i agregá na esaki e goso di sa cu un tempu bendicioná asina ta den e futuro cercano.