“Un Tempu pa Pas” Ta Tras di Porta!

“Pa tur cos tin un tempu señalá, . . . un tempu pa guera i un tempu pa pas.”—ECLESIASTES 3:1, 8.

1. Ki situacion irónico a existí durante siglo 20 relacioná cu guera i pas?

MAYORIA hende ta anhelá pas, i cu bon motibu. Siglo 20 a experenciá ménos pas cu tur otro siglo den historia. Esei ta un ironia, pasobra nunca promé hende a haci asina tantu pa garantisá pas. Na 1920 a forma e Liga di Nacionnan. Na 1928, “casi tur nacion di mundu . . . a bai di acuerdo pa no usa guera como un instrumento di política nacional” i a apoyá e Tratado di Kellogg-Briand, cu un obra di referencia a yama “e intento mas ambicioso den un seri di intento pa mantené pas despues di Guera Mundial I.” Anto, na 1945 a establecé e organisacion di Nacionnan Uní pa reemplasá e desaparecido Liga di Nacionnan.

2. Segun Nacionnan Uní, kico ta nan meta, i te na ki grado e tabatin éxito?

² Mescos cu e Liga, Nacionnan Uní a declará cu su meta ta pa garantisá pas mundial. Pero su éxito tabata limitá. Ta cierto cu awor aki ningun caminda na mundu tin guera n’e escala dje dos gueranan mundial. No obstante, ainda decenas di conflicto chikitu ta horta cientos di miles di hende di nan pas mental, di nan pertenencianan, i hopi bes asta di nan bida. Nos por risca spera cu Nacionnan Uní por combertí siglo 21 den “un tempu pa pas”?

Base pa Berdadero Pas

3. Pakico berdadero pas no por existí banda di odio?

³ Pas entre pueblo i nacionnan ta rekerí mas cu djis tolerancia. Un hende por ta ègt na pas cu un persona cu e ta odia? No segun 1 Juan 3:15: “Tur cu ta odia su ruman ta un matadó.” Manera historia recien ta demostrá, odio profundo ta escalá fácilmente den actonan di violencia.

4. Ken so por experenciá pas, i pakico?

⁴ Siendo cu Jehova ta “e Dios cu ta duna pas,” ta solamente hende cu tin amor pa Dios i respet profundo pa su principionan hustu por experenciá pas. Ta claro cu Jehova no ta otorgá pas na tur hende. “‘No tin pas,’ mi Dios a bisa, ‘p’e malbadonan.’” Esaki ta pasobra e malbadonan ta nenga di laga e spiritu santu di Dios, di cua un fruta ta pas, guia nan.—Romanonan 15:33; Isaías 57:21; Galationan 5:22.

5. Kico ta impensabel pa cristiannan berdadero?

⁵ Hopi bes, foral den e siglo 20 aki, cristiannan falsu a bringa guera contra nan próhimo. Pero esei ta algu impensabel pa cristiannan berdadero. (Santiago 4:1-4) Ta berdad cu nan ta bringa contra siñansanan cu ta representá Dios falsamente, pero e guera aki ta diseñá pa yuda individuonan, no pa haci nan daño. Persiguí otro hende pa motibu di diferencianan religioso of causa daño físico pa motibunan nacionalista ta un contraste skerpi cu berdadero cristianismo. “Si ta posibel, cuantu cu ta dependé di boso,” Pablo a instruí e cristiannan na Roma, “sea pacífico cu tur hende.”—Romanonan 12:17-19; 2 Timoteo 2:24, 25.

6. Unda so nos por haña berdadero pas awe?

⁶ Awe bo por haña e pas cu Dios ta duna solamente entre e berdadero adoradónan di Jehova Dios. (Salmo 119:165; Isaías 48:18) Ningun desacuerdo político ta stroba nan unidad, ya cu tur caminda nan ta neutral den asuntunan político. (Juan 15:19; 17:14) Pa motibu cu nan ta “aptamente uní den e mésun mente i den e mésun forma di pensa,” no tin desacuerdo religioso cu por menasá nan pas. (1 Corintionan 1:10) E pas cu Testigonan di Jehova ta disfrutá di dje ta un milager di tempu moderno, un pas cu Dios ta producí na armonia cu su promesa: “Lo mi nombra pas como bo superintendentenan i husticia como esnan cu ta asigná tarea na bo.”—Isaías 60:17; Hebreonan 8:10.

Pakico “un Tempu pa Guera”?

7, 8. (a) Apesar di nan posicion pacífico, con Testigonan di Jehova ta mira e tempu actual? (b) Kico ta e arma principal dje guera cristian?

⁷ Apesar di nan posicion pacífico, tog Testigonan di Jehova ta considerá e tempu actual predominantemente “un tempu pa guera.” Naturalmente, no un guera literal ya cu nan no ta forsa ningun hende aceptá e mensahe di Bijbel. Esei lo contradicí Dios su invitacion pa “laga ken cu kier tuma e awa di bida grátis.” (Revelacion 22:17) Pues, no ta obligá ningun hende pa combertí! E guera cu Testigonan di Jehova ta bringa ta unu estrictamente spiritual. Pablo a skirbi: “E armanan di nos guera no ta carnal, sino ta poderoso pa medio di Dios pa tumba cosnan fuertemente ancrá.”—2 Corintionan 10:4; 1 Timoteo 1:18.

⁸ “E spada di e spiritu, esta, e palabra di Dios,” ta e arma principal entre “e armanan di nos guera.” (Efesionan 6:17) E spada aki ta poderoso. “E palabra di Dios ta bibu i ta ehercé poder i ta mas skerpi cu cualkier spada di dos fila i ta penetrá asta pa separá alma i spiritu, i djoint i nan tuti, i por dicerní pensamentunan i intencionnan di e curason.” (Hebreonan 4:12) Dor di usa e spada aki, cristiannan por “tumba razonamentunan i tur cos halsá cu ta lanta contra e conocimentu di Dios.” (2 Corintionan 10:5) E ta yuda nan desenmascará doctrina falsu, práctica perhudicial i filosofia cu ta reflehá sabiduria humano en bes di esun divino.—1 Corintionan 2:6-8; Efesionan 6:11-13.

9. Pakico no por tin descanso den nos guera contra e carni pecaminoso?

⁹ Un otro tipo di guera spiritual ta esun cu nos ta bringa contra e carni pecaminoso. Cristiannan ta sigui e ehempel di Pablo, kende a admití: “Mi ta dominá mi curpa i ta hib’é manera un esclabo, pa, despues cu mi a predicá na otronan, mi mes no bira desaprobá di algun manera.” (1 Corintionan 9:27) E apostel a amonestá e cristiannan na Colósas pa mata nan “miembronan di curpa cu ta riba tera pa loke ta fornicacion, impuresa, apetit sexual, deseo perhudicial, i cudishi, loke ta idolatria.” (Colosensenan 3:5) I un escritor di Bijbel, Hudas, a spierta cristiannan pa “hiba un lucha duru pa e fe cu una bes pa semper a ser entregá n’e santunan.” (Hudas 3) Pakico nos tin cu haci esei? Pablo ta contestá: “Si boso biba di acuerdo cu e carni boso lo muri sigur; pero si dor di e spiritu boso mata e custumbernan di curpa, boso lo biba.” (Romanonan 8:13) En bista dje declaracion claro aki, no por tin descanso den nos guera contra mal inclinacion.

10. Kico a sosodé na 1914, i na kico esei ta hiba den futuro cercano?

¹⁰ Pero un otro motibu pakico nos por mira e tempu actual como un tempu pa guera ta e echo cu “e dia di vengansa di parti di nos Dios” ta inminente. (Isaías 61:1, 2) Na 1914, Jehova su tempu señalá a yega pa establecé e Reino Mesiánico i pa autoris’é pa bringa un guera activo contra e sistema di Satanas. E periodo di tempu cu Dios a permití hende experimentá cu gobernacion humano, sin interferencia divino, a expirá n’e tempu ei. En bes di aceptá Dios su Gobernante Mesiánico, mayoria hende ta sigui rechas’é, mescos cu mayoria hende a haci den promé siglo. (Echonan 28:27) Consecuentemente, debí na oposicion dje Reino, Cristo a ser forsá pa ‘bai dominá meimei di su enemigunan.’ (Salmo 110:2) Afortunadamente, Revelacion 6:2 ta primintí cu lo e “completá su victoria.” Lo e haci esaki durante “e guera dje gran dia di Dios e Todopoderoso . . . , cu ta ser yamá na hebreo Har-Magedon.”—Revelacion 16:14, 16.

Awor Ta un “Tempu pa Papia”

11. Pakico Jehova tabatin masha hopi pacenshi, pero kico lo sosodé finalmente?

¹¹ Desde 1914, e aña crucial den asuntunan humano, 85 aña a pasa. Jehova tabatin masha hopi pacenshi cu humanidad. El a haci su Testigonan completamente conciente dje urgencia dje situacion. Miyones di bida ta den wega. E multitudnan aki ta merecé pa ser spiertá pasobra “Jehova . . . no ta deseá pa ningun hende ser destruí, sino ta deseá pa tur alcansá repentimentu.” (2 Pedro 3:9) No obstante, “e revelacion di e Señor Jesus for di shelu cu su angelnan poderoso” lo yega pronto. E ora ei, tur esnan cu deliberadamente a rechasá e mensahe dje Reino di Dios lo experenciá e “vengansa” cu Jesus lo trece “riba esnan cu no conocé Dios i esnan cu no ta obedecé e bon nobo tocante nos Señor Jesus.”—2 Tesalonicensenan 1:6-9.

12. (a) Pakico no tin sentido pa speculá ki dia e tribulacion grandi lo dal aden? (b) Contra ki peliger relacioná cu esaki Jesus a spierta?

¹² Na ki tempu e pacenshi di Jehova lo caba finalmente? No tin sentido pa speculá ki dia e “tribulacion grandi” lo dal aden. Jesus a bisa masha cla: “En cuanto e dia i ora ei ningun hende no sa.” Di otro banda, el a spierta: “P’esei, sigui vigilá, pasobra boso no sa riba ki dia boso Señor ta bini. . . . Demostrá cu boso ta cla, pasobra na un ora cu boso no ta pensa cu e ta, e Yu di hende ta bini.” (Mateo 24:21, 36, 42, 44) Bisá senciyamente, esaki ta nificá cu tur dia nos mester sigui vigilá sucesonan di mundu i pensa riba e cuminsamentu dje tribulacion grandi. (1 Tesalonicensenan 5:1-5) Ki peligroso ta pa pensa cu nos por baha man, hiba un asina yamá bida normal, wardando pa mira con cosnan lo desaroyá! Jesus a bisa: “Presta atencion na boso mes pa boso curason nunca bira cargá debí na comementu di mas i bebementu di mas i ansiedadnan di bida, i di ripiente e dia ei ta riba boso instantáneamente manera un las.” (Lucas 21:34, 35) Nos por ta sigur di esaki: E ‘cuater angelnan’ di Jehova cu actualmente ta wantando e “cuater bientunan” di destruccion, lo no haci esei pa semper.—Revelacion 7:1-3.

13. Kico casi seis miyon persona a reconocé?

¹³ En bista dje dia di regla cuenta aki cu ta acercando rápidamente, e palabranan di Sálomon tocante “un tempu pa papia” ta haña nificacion special. (Eclesiástes 3:7) Despues di a reconocé cu awor en berdad ta un tempu pa papia, casi seis miyon Testigo di Jehova ta papiando celosamente tocante e gloria dje gobernacion di Dios i ta dunando spiertamentu di su dia di vengansa. Nan ta ofrecé nan mes di buena gana riba e dia aki di Cristo su forsa militar.—Salmo 110:3; 145:10-12.

Esnan Cu Ta Papia di “Pas, Ora No Tin Pas”

14. Ki clase di profetanan falsu a existí durante siglo 7 P.E.C.?

¹⁴ Durante siglo 7 P.E.C., Dios su profetanan Jeremías i Ezekiel a pronunciá mensahenan divino di huicio contra Jerusalem pa su curso terco di desobedencia na Dios. E destruccion cu nan a profetisá a tuma lugá na 607 P.E.C., maske lidernan religioso prominente i cu influencia a contradicí Dios su mensaheronan. Nan a resultá di ta “profetanan estúpido [cu] . . . a engañá [Dios su] pueblo, bisando: ‘Tin pas!’ ora no tin pas.”—Ezekiel 13:1-16; Jeremías 6:14, 15; 8:8-12.

15. Tin profeta falsu awe tambe? Splica.

¹⁵ Mescos cu e “profetanan estúpido” dje tempu ei, awe mayoria lider religioso tampoco no ta spierta hende di Dios su binidero dia di huicio. Na lugá di esei, nan ta pinta un cuadro optimista den cua gruponan político finalmente lo alcansá pas i siguridad. Mas ansioso pa agradá hende cu Dios, nan ta bisa nan parokianonan loke eseinan kier tende en bes di splica nan cu e Reino di Dios a ser establecí i cu pronto e Rey Mesiánico lo completá su victoria. (Daniel 2:44; 2 Timoteo 4:3, 4; Revelacion 6:2) Como profeta falsu, nan ta papia tambe di “pas, ora no tin pas.” Pero pronto nan conviccion lo cambia di ripiente bira spantu ora nan haña nan tin cu enfrentá e furia di Esun cu nan a representá falsamente i riba kende su nomber nan a trece masha hopi reproche. E lidernan dje imperio mundial di religion falsu cu Bijbel ta describí como un muher inmoral, lo haña un golpi mortal net ora nan ta pronunciá nan gritunan engañoso di pas.—Revelacion 18:7, 8.

16. (a) Testigonan di Jehova a duna prueba di kico? (b) Den ki sentido nan ta diferente for di esnan cu ta grita “pas, ora no tin pas”?

¹⁶ Aunke mayoria lider prominente i cu influencia ta persistí den nan promesa hipócrita di pas, esei no ta sagudí e confiansa di esnan cu tin fe den Dios su promesa di berdadero pas. Pa mas cu un siglo caba, Testigonan di Jehova a duna prueba di ta defensornan leal dje Palabra di Dios, oponentenan balente di religion falsu i apoyadónan decididu dje Reino di Dios. Leu for di yaya hende manda soño cu labiamentu tocante pas, nan ta haci esfuerso diligente pa spierta nan p’e realidad cu awor aki ta tempu pa guera.—Isaías 56:10-12; Romanonan 13:11, 12; 1 Tesalonicensenan 5:6.

Jehova Ta Kibra Su Silencio

17. Kico kier men cu pronto Jehova lo kibra su silencio?

¹⁷ Tambe Sálomon a bisa: “E Dios berdadero lo husga tantu e hustu como e malbado, pasobra tin un tempu pa tur asuntu.” (Eclesiástes 3:17) Sí, Jehova tin un tempu señalá pa ehecutá huicio riba religion falsu i riba “e reynan di tera [cu] ta tuma nan posicion . . . contra Jehova i contra su ungí.” (Salmo 2:1-6; Revelacion 16:13-16) Una bes e tempu ei yega, Jehova su dianan di keda “ketu” lo a pasa. (Salmo 83:1; Isaías 62:1; Jeremías 47:6, 7) Mediante su Rey Mesiánico entronisá, Jesucristo, lo e “papia” den e único idioma cu su opositornan ta comprendé aparentemente: “Manera un homber poderoso Jehova mes lo sali. Manera un guerero lo e spierta celo. Lo e grita, sí, lo e dal un gritu di guera; riba su enemigunan lo e mustra su mes mas poderoso. ‘Mi a keda ketu pa un tempu largu. Mi a sigui den silencio. Mi a sigui ehercé dominio propio. Manera un muher cu ta dunando lus mi ta bai keña, ansha i lucha pa hala rosea na mésun tempu. Lo mi destruí ceru i ceritu, i tur nan vegetacion lo mi seca. I lo mi cambia riu den isla, i plasnan di awa cu caña lo mi seca. I lo mi haci e ciegunan cana den un caminda cu nan no a conocé; den un berea cu nan no a conocé lo mi haci nan trapa. Lo mi cambia un lugá scur dilanti nan den lus, i tereno brutu den tera plat. Esakinan ta e cosnan cu lo mi haci pa nan, i lo mi no bandoná nan.’”—Isaías 42:13-16.

18. Den ki sentido pronto Dios su pueblo lo “keda ketu”?

¹⁸ Ora Jehova ta “sali” na defensa di su Divinidad, su pueblo lo no tin nodi papia mas den nan mes defensa. Lo ta nan turno pa “keda ketu.” Mescos cu tabata e caso den pasado, e palabranan aki ta aplicá na Dios su sirbidónan awe tambe: “Boso lo no tin cu bringa n’e ocasion aki. Tuma boso posicion, para ketu i mira e salbacion di Jehova na fabor di boso.”—2 Crónicanan 20:17.

19. Ki privilegio Cristo su rumannan spiritual lo haña djis aki?

¹⁹ Ki un derota aplastante pa Satanas i su organisacion! E rumannan glorificá di Cristo lo participá den producí un victoria sobresaliente pa husticia, na armonia cu e promesa: “Di su parti, e Dios cu ta duna pas lo aplastá Satanas bou di boso pianan pronto.” (Romanonan 16:20) Por fin e tempu tan sperá pa pas a yega.

20. E tempu pa kico lo yega pronto?

²⁰ Ki un bendicion pa bida di tur hende riba tera cu ta sobrebibí e gran manifestacion di Jehova su poder! Djis despues, homber i muhernan fiel di pasado, kende nan tempu señalá pa resureccion a yega, lo djoin e sobrebibientenan. Cristo su Reinado di Mil Aña lo ta berdaderamente un “tempu pa planta . . . un tempu pa cura . . . , un tempu pa construí . . . , un tempu pa hari . . . , un tempu pa bula rond . . . , un tempu pa brasa i . . . un tempu pa stima.” Sí, i pa semper lo ta un “tempu pa pas”!—Eclesiástes 3:1-8; Salmo 29:11; 37:11; 72:7.

Kico Ta Bo Contesta?

◻ Kico ta e base pa pas duradero?

◻ Pakico Testigonan di Jehova ta considerá e tempu actual un “tempu pa guera”?

◻ Ki ora e pueblo di Dios mester “papia,” i ki ora nan mester “keda ketu”?

◻ Con i na ki tempu Jehova lo kibra su silencio?

[Kuadro/Plachinan na página 13]

Jehova Tin un Tempu Señalá pa

◻ provocá Gog pa atacá e pueblo di Dios.—Ezekiel 38:3, 4, 10-12

◻ hinca den curason di gobernantenan humano pa destruí Babilonia e Grandi.—Revelacion 17:15-17; 19:2

◻ efectuá e matrimonio dje Lamchi.—Revelacion 19:6, 7

◻ cuminsá e guera di Har–​Magedon.—Revelacion 19:11-16, 19-21

◻ mara Satanas pa asina Jesus por cuminsá su Reinado di Mil Aña.—Revelacion 20:1-3

E sucesonan aki ta mencioná simplemente den e órden den cua e Scritura ta referí na nan. Nos por ta sigur cu tur cincu suceso lo tuma lugá den e órden cu Jehova determiná i exactamente n’e tempu cu e determiná.

[Plachinan na página 15]

Cristo su Reinado di Mil Aña lo ta berdaderamente un tempu . . .

pa hari . . .

pa brasa . . .

pa stima . . .

pa planta . . .

pa bula rond . . .

pa construí . . .