Semper Nos Lo Tin Mester di Ehercito?

EHERCITONAN a consumí un gran parti di recurso humano i a destruí hopi di hende su felicidad. P’esei, algun hende a puntra nan mes: ‘Humanidad por alcansá un dia e clase di siguridad mundial cu ta permití nan disolvé ehércitonan?’ Awor cu armanan cu por causa destruccion masal ta haci e extincion di tur bida posibel, e pregunta ta bira mas urgente. Ta realístico pa spera un mundu sin ehército?

Un cantidad di precedente ta proba cu ora bon relacionnan internacional producí confiansa, e por hiba na algun desarmamentu. Por ehempel, e relacion di amistad entre Cánada i Merca a nificá cu nan frontera cu otro di 5.000 kilometer tin mas cu un siglo i mei caba sin proteccion di ehército. Norwega i Suecia a alcansá un acuerdo similar, mescos cu hopi otro nacion. Un acuerdo entre tur nacion lo por alcansá un mundu sin ehército? Debí n’e horornan di Guera Mundial I, e idea a haña un popularidad sin precedente.

Ora nacionnan a cera pas na 1918, un dje propósitonan dje tratado di pas di Versailles tabata “pa haci posibel e inicio di un limitacion general di armamentu di tur nacion.” Durante e siguiente añanan, política pacifista a bira popular. Algun pacifista tabatin e teoria cu guera ta e peor cos cu por bini riba un nacion i p’esei ta pió cu sufri derota. Oponentenan di política pacifista no tabata di acuerdo, mustrando cu den transcurso di siglonan, hudiunan den áreanan grandi a ofrecé tiki resistencia armá na atacantenan, tog intentonan cruel pa exterminá nan a continuá. Africanonan tabatin tiki oportunidad pa resistí contra esnan cu a trece nan como esclabo na e continente América, i tog nan a ser cruelmente maltratá pa siglonan.

Sin embargo, cu e cuminsamentu di Guera Mundial II, hopi pacifista a concluí cu paisnan mester di proteccion. Pues ora Nacionnan Uní a ser establecé despues di Guera Mundial II, e énfasis tabata ménos riba desarmamentu i mas riba cooperacion internacional pa prevení agresion. E miembronan a spera cu e siguridad cu esei lo a percurá p’e, lo a duna nacionnan confiansa pa desarmá nan mes.

Un otro problema a sali mas i mas na cla. Hopi biaha e esfuersonan di un nacion pa haci su mes sigur a haci su bisiña sinti su mes insigur. E círculo vicioso aki a hiba na un careda di armamentu. Pero mas recientemente, mihó relacion entre e nacionnan principal a fortalecé e speransa di desarmamentu. Sin embargo, despues di esei e Guera di Golfo i e problemanan na ex-Yugoslavia a caba cu speransanan di desarmamentu cu hopi hende tabatin. Rond di cincu aña pasá, revista Time a comentá: “Aunke e guera friu a terminá, mundu a bira un lugá mas peligroso, en bes di ménos peligroso.”

E Deseo pa un “Polis” Mundial

Hopi observadó ta haña cu humanidad mester di un solo autoridad mundial cu un ehército suficiente poderoso pa protehá tur hende. Siendo cu ni e organisacion di Nacionnan Uní ni e potencianan militar importante di mundu ta capas pa haci esaki, algun ta kere cu tin tiki speransa pa futuro. Pero si bo ta aceptá Bijbel como e Palabra di Dios, kisas bo a puntra bo mes si Dios Todopoderoso lo satisfacé e necesidad urgente aki.

Esun cu Bijbel ta yama “e Dios di amor i di pas” lo usa poder militar pa imponé husticia? Si ta asina, cua ehército? Hopi dje ehércitonan djawe ta pretendé di tin e apoyo di Dios, pero nan realmente ta haciendo e boluntad di Dios? Of Dios tin un otro manera pa intervení i percurá pa pas i siguridad?—2 Corintionan 13:11.

Dios Todopoderoso a trata cu e promé rebelion dor di expulsá Adam i Eva for di Eden i posicioná kerubinnan pa stroba nan di drenta bek. Tambe el a anunciá su propósito pa aplastá tur rebelion contra su soberania. (Génesis 3:15) Esei kisas ta encerá cu Dios lo usa un ehército?

Bijbel ta papia di ocasionnan ora Dios en berdad a usa ehércitonan pa ehecutá su huicionan. Por ehempel, e reinonan den e tera di Canan a practicá relacion sexual cu bestia, sacrificio di mucha i gueranan sadístico. Dios a decretá nan destruccion completo i a usa e ehército di Hosué pa ehecutá e sentencia. (Deuteronomio 7:1, 2) Di igual manera, e ehército di Rey David a ehecutá e huicio di Dios contra e filisteonan como un ehempel dje manera cu Dios lo destruí tur maldad den su dia di huicio final.

E sucesonan ei a sirbi como un les. Jehova a demostrá cu e por usa un ehército pa duna hende siguridad. Sí, Jehova tin un tipo di ehército único cu lo trata cu e rebelion cu tin proporcion universal contra su mando.

“Jehova di Ehércitonan”?

Bijbel ta usa e expresion “Jehova di ehércitonan” mas cu 250 biaha. Básicamente e expresion ta referí n’e posicion di Dios como comandante di ehércitonan inmenso di angel. Na un ocasion profeta Micaya a bisa Rey Acab i Rey Jehósafat: “Siguramente mi ta mira Jehova sintá riba su trono i henter e ehército di shelu pará huntu cuné, na su man drechi i na su man robes.” (1 Reynan 22:19) Aki e ta referí na ehércitonan di angel. Jehova a usa e ehércitonan aki pa protehá su pueblo. Ora e stad di Dotan a ser sitiá, e sirbidó di Eliseo a perde speransa. Sin embargo, pa trankilis’é, Dios a dun’é un vision milagroso di su ehército di criaturanan spiritual. “Jehova a habri e wowonan dje sirbidó, di manera cu el a mira; i, mira! e regionnan montañoso tabata yen di cabai i garoshi di guera di candela.”—2 Reynan 6:15-17.

Sucesonan asina ta nificá cu Dios ta apoyá ehércitonan awe? Algun ehército di cristiandad por pretendé di ta ehército di Dios. Hopi a pidi pastornan bendicioná nan. Pero hopi biaha ehércitonan di cristiandad ta bringa contra otro, contra compañeronan creyente. E dos gueranan mundial dje siglo aki a cuminsá entre ehércitonan cu a pretendé di ta cristian. Esaki no por ta e obra di Dios. (1 Juan 4:20) Aunke e ehércitonan militar ei por afirmá cu nan ta bringa pa pas, Jesus a instruí su siguidónan pa organisá ehércitonan asina den un intento pa garantisá pas na mundu?

A surgi un kiebro serio di pas ora un multitud armá a pone man riba Jesus den un hofi caminda e tabata haci oracion huntu cu su disipelnan. Un dje disipelnan a dal un homber den e multitud cu un spada. Jesus a usa e ocasion pa splica un principio importante. El a bisa: “Bolbe bo spada bek na su lugá, pasobra tur esnan cu ta tuma spada lo perecé pa spada. Of bo no ta kere cu mi por apelá na mi Tata p’e duná mi na e momento aki mas cu diesdos legion di angel?” Jesus tabatin un ehército inmenso bou di su mando, pero ni Pedro ni ningun otro hende, no tabata riba e lista di su soldánan. Mas bien, Pedro i e resto di Jesus su siguidónan a ser yamá pa ta “piscadónan di hende.” (Mateo 4:19; 26:47-53) Un par di ora despues, Jesus a clarificá e situacion na Pilato. El a bisa: “Mi reino no ta parti dje mundu aki. Si mi reino tabata parti dje mundu aki, mi sirbidónan lo a bringa pa mi no ser entregá n’e hudiunan. Pero, e caso ta, mi reino no ta dje fuente aki.” (Juan 18:36) Distinto dje reino di David cu a ser establecí riba tera, e Reino cu Dios a duna Jesus ta den shelu i lo trece pas riba tera.

E Ehércitonan di Dios Ta Bai den Bataya

Pronto e ehércitonan di Dios lo tuma accion. Ora Revelacion ta describí e choke cu lo tin den futuro, e ta yama Jesus “E Palabra di Dios.” Nos ta lesa: “E ehércitonan cu tabata den shelu tabata siguié riba cabai blancu, i nan tabata bistí den linen fini, blancu i limpi. I for di su boca ta sali un spada largu i skerpi, p’e por dal e nacionnan cuné.” Bijbel ta bisa cu e bataya aki lo resultá den e fin di “e reynan di tera i nan ehércitonan.” Pa loke ta otronan cu no ta demostrá nan lealtad na Dios, e profecia ta agregá: “E resto a ser matá cu e spada largu di esun sintá riba e cabai.” Asta Satanas e Diabel lo ser poné fuera di combate. Esaki di berdad lo habri caminda pa un mundu di pas sin ehército.—Revelacion 19:11-21; 20:1-3.

Imaginá un Mundu Sin Guera

Bo por visualisá un mundu asina sigur cu no tin mester di ehército? Un salmo bíblico ta bisa: “Boso bini, contemplá e actividadnan di Jehova, con el a establecé sucesonan asombroso riba tera. E ta haciendo gueranan stop te n’e extremidad dje tera.”—Salmo 46:8, 9.

Ki un alivio esaki lo ta! Imaginá e posibilidadnan pa sociedad humano librá por fin dje carga pisá di belasting pa sostené ehércitonan i nan ekipo! Hende lo por dirigí nan energia pa mehorá condicionnan di bida pa tur hende, pa limpia e tera i plant’é di nobo. Lo tin oportunidadnan nobo pa inventá cosnan cu lo ta berdaderamente útil pa humanidad.

E promesa aki lo tin un cumplimentu mundial: “Lo no tende mas di violencia den bo tera, sakeamentu ni kibramentu den bo fronteranan.” (Isaías 60:18) Nunca mas miyones di refugiado desesperá lo hui bai for di zonanan di guera, forsá pa bandoná nan cas i propiedad pa biba den campamentunan di miseria. Nunca mas hende lo yora sernan kerí cu a ser matá of mancá den conflicto entre nacionnan. Jehova su Rey celestial lo establecé pas mundial permanente. “Den su dianan e hustu lo spruit, i e abundancia di pas te ora luna no t’ei mas. For di opresion i for di violencia lo e rescatá nan alma.”—Salmo 72:7, 14.

Bida entre hende cu a siña pa no odia sino pa imitá Dios su camindanan di amor lo ta mas placentero ainda. E Palabra di Dios ta predicí: “Nan lo no haci ningun daño ni causa ningun ruina den tur mi ceru santu; pasobra e tera siguramente lo ta yená cu e conocimentu di Jehova mescos cu e awanan ta cubri laman mes.” Con lo ta pa biba entre hende cu conocé i cu ta stima Jehova? E mésun buki ta profetisá: “E trabou di berdadero husticia mester bira pas; i e sirbishi di berdadero husticia, trankilidad i siguridad te na tempu indefiní. I mi pueblo tin cu biba den un lugá di habitacion pacífico i den residencianan di pleno confiansa i den lugánan di descanso sin disturbio.”—Isaías 11:9; 32:17, 18.

Hende kende nan fe ta basá riba conocimentu di Bijbel ta dicerní cu e ehércitonan di Dios ta cla pa limpia e tera di tur enemigu di pas. E conocimentu aki ta duna nan confiansa pa aplicá loke Bijbel ta bisa “tin cu sosodé den e parti final dje dianan.” Esei ta: “Nan lo tin cu bati nan spada na ploeg i nan lansa na skèr di corta mata. Nacion lo no hisa spada contra nacion, ni nan lo no siña mas di guera.”—Isaías 2:2-4.

Hende for di hopi nacion cu a bira Testigo di Jehova ya caba no ta ‘siña di guera.’ Nan a pone nan confiansa den e proteccion dje ehércitonan celestial di Dios. Dor di studia Bijbel cu nan, abo tambe por desaroyá un confiansa similar.

[Rekonosementu pa Potrèt na página 28]

U.S. National Archives photo