For di Flatnan Haltu pa Desierto di Tundra—Bai Cerca e Hendenan

NI AWACERU ni sneu ni hagel ni lobo ni leon di ceru ni teritorio hostil por a fria nan spiritu di determinacion. Cu velocidad asombroso, nan tabata galopiá 3.000 kilometer crusando sabana habrí, riunan turbulento i vayenan hundu pa hiba post urgente na Costa West di Merca. Ken nan tabata?

Nan tabata e balente ginetenan yong dje pony express.a Kico a chispa un spiritu intenso asina den e hombernan yong aki? Probablemente e desafio, e aventura i e satisfaccion di soru p’e post yega. Interesantemente, cada ginete tabatin un Bijbel den su sacu di sia huntu cu e cartanan cu tabatin prioridad.

Mas cu un siglo despues, mas cu 113.000 proclamadó deboto di Reino rond Cánada ta manifestá un mayor spiritu di determinacion, entusiasmo i debocion. Kico ta nan motivacion? Amor pa Dios i pa próhimo ta inspirá nan pa entregá e berdad di Reino via literatura i via palabra di boca. E berdad dunador di bida aki ta muchu mas urgente cu cualkier post cu e pony express a entregá. Sí, e ta e precioso mensahe di Reino dje Bijbel Santu, e mésun buki cu tabata den e sacu di sia dje ginetenan dje pony express.—Proverbionan 2:21, 22; Isaías 2:2-4; 61:2; Mateo 22:37-39; 24:14.

Motivá dor di Amor pa Jehova i pa Hende

Testigonan di Jehova ta gusta papia cu hende tocante e Reino. Bo por haña nan ta haci esei den flatnan haltu den stad, den comunidadnan remoto di tundra, na terminalnan di aeropuerto, riba caya i na otro lugánan público, i via telefon. Pakico den asina tantu diferente lugá?

Condicionnan económico i demográfico cu ta cambia hende su estilo di bida ta presentá un tremendo desafio pa haña hende na cas. Den hopi caso, tantu esposo como esposa ta traha pa percurá p’e necesidadnan material básico dje famia, hopi biaha neglishando e necesidadnan spiritual. Meimei dje presionnan i stres ei, desesperadamente nan tin mester di un mensahe caluroso di speransa. Gustosamente Testigonan di Jehova ta respondé. Usando discrecion i bondad, nan ta crea oportunidadnan pa trece bon noticia na tur clase di hende den un manera atractivo i cu ta pone nan pensa.—1 Timoteo 2:3, 4.

Den Otro Idiomanan: Ora Jesus a manda su siguidónan pa ‘bai i haci disipel,’ el a laga pa nan mes mustra iniciativa i determinacion den hiba e mensahe di speransa na hende di tur idioma. (Mateo 28:19) Mescos cu hopi pais, Cánada a bira un sociedad di diferente cultura i idioma, i hopi publicadó di Reino a adaptá nan mes dor di siña idiomanan nobo.

Por ehempel, un pareha, cu ta minister di tempu completo na Edmonton, Alberta, a mira den nan stad e necesidad pa alcansá hende cu a papia chines mandarin. Sin embargo, promé, e pareha tabatin cu siña e idioma, di manera cu nan a topa un studiante di universidad cu tabata papia mandarin. El a bai eens pa siña nan e idioma i na mésun tempu siña e berdadnan di Bijbel for di nan. Ki un situacion ideal! Den 24 luna e dos proclamadónan di Reino deboto aki a cualificá pa siña otronan na mandarin. Na mésun tempu, nan maestro/studiante a cualificá pa bautismo cristian.

Proclamadónan di Reino den otro stadnan ta disfrutá di experencianan similar segun cu nan, motivá pa amor, ta siña idiomanan nobo manera polaco, ruso i vietnames.

Riba Caminda: Mescos cu e ginetenan di pony express dje siglo pasá, cu tabata core nan so, algun proclamadó di Reino den e parti interior di British Columbia ta core nan so den truck. Nan ta pasa gran parti di nan tempu na nan trabou seglar di manehá trucknan potente di carga palu dor di mondi pa fábricanan di palu. Esaki ta rekerí contacto constante cu otro shofernan di truck riba radio CB (citizens band), comunicando tocante fluho di tráfico i peligernan riba caminda.

Di un manera creativo, e proclamadónan di Reino aki ta usa nan radio CB den un manera único. Nan ta cuminsá combersacionnan riba CB dor di papia tocante tópiconan di noticia coriente. Despues cu tacto nan ta referí na Bijbel. Na un ocasion un colega shofer di truck a respondé na loke Bijbel ta bisa tocante un speransa p’e mortonan. (Juan 5:28, 29; Echonan 24:15) E morto di un colega shofer den un accidente riba caretera a molesti’é profundamente. Cu gratitud el a aceptá un studio di Bijbel i awor por tend’é ta proclamá e bon nobo na coleganan di trabou i amigunan. Ademas, algu cu tabata motibu di goso p’e ta cu e biuda di su amigu defuntu a cuminsá studia Bijbel. Ki un recompensa pa a tuma e iniciativa pa presentá e mensahe dunador di bida dje berdad den e manera no-comun aki!

Via Aire: Ora ta toca entregá e mensahe precioso dje berdad, proclamadónan di Reino celoso ta bai caminda e hendenan ta, ‘drentando pueblonan’ cu avioneta. (Mateo 10:11, 12) Un poco tempu pasa, dos grupo cu a biaha den avioneta, motivá pa celo pa declará e bon nobo i riba nan mes gastu, a bula bai n’e hendenan plamá riba e inmenso área di desierto di tundra. Cada grupo a bula rond di 3.000 kilometer i a aterisá den 14 diferente comunidad, yegando te na 250 kilometer di Polo Norte. E proclamadónan incansabel aki a sigui shete dia completo pa alcansá hendenan isolá dor di distancianan grandi.

I tur esei tabata bale la pena? Djis pensa riba e impacto positivo cu e mensahe di Bijbel tabatin riba e comunidadnan aki. Ora e ministernan bishitante a splica Jehova su propósito pa un paradijs terenal den futuro cercano, nan a yuda yena un necesidad spiritual vital. (Mateo 5:3) Hopi despues cu e hibadónan di mensahe a bai, e hendenan di curason onrado den e comunidadnan ei lo por lesa for dje 542 Bijbel i bukinan pa studia Bijbel i 3.000 revista cu a ser lagá cerca nan.—Compará cu Echonan 12:24.

Via Telefon: Miles di habitante di stad ta biba den flatnan haltu cu tin sistemanan di siguridad di alta tecnologia. Asina mes, proclamadónan di Reino dedicá ta dal bai cu celo i discrecion. Con nan ta haci bai caminda e hendenan aki ta? Aunke nan ta preferá e contacto cara-cara, hopi biaha nan ta usa e intercom den lobi dje edificio cu éxito. Ora esaki no ta posibel, nan ta laga nan dedenan haci e trabou dor di yama hende via telefon.

Un mainta un señora grandi caba a contestá su telefon. Despues di un saludo breve i cortes, e proclamadó di Reino a puntr’é si e ta kere cu lo yega un tempu ora hende lo por cana trankil riba caya anochi. A lesa textonan pa sigur’é cu pas lo ta abundante den futuro. (Salmo 37:10, 11; Daniel 2:44; Mateo 6:9, 10) El a bai eens pa un combersacion via telefon e siguiente siman n’e mésun ora pa considerá pakico nos por kere e promesanan di Dios. Despues di a studia Bijbel pa un luna via telefon, lesando paragrafnan for di un publicacion pa studia Bijbel i haciendo preguntanan apropiado, e proclamadó di Reino a ricibí elogio for dje señora pa a presentá asina tantu diferente sermon tur siman. Tabata tempu pa describí e buki di studio i pa ofrecé e señora un ehemplar personal. E ora ei nan dos a haci areglo pa topa otro personalmente. Sí, Testigonan di Jehova a demostrá nan amor pa hende, i hende ta respondiendo, reconociendo cu Jehova ta cu e predicadónan cristian aki.—Compará cu 1 Corintionan 14:25.

Via Literatura: Proclamadónan di Reino den e provincia di Quebec caminda e idioma frances ta dominá, tambe ta bai caminda e hendenan ta. Un minister biahero a comentá: “Pa añanan largu e rumannan tabata haña cu nan no tabata haci progreso pa motibu dje oposicion intenso di parti dje iglesia. Pero dor dje trabou incansabel dje rumannan i nan frecuente bishitanan, Bijbel, cu tabata un buki prácticamente desconocí i cu solamente e minoria tabata lesa, awor tin su lugá den mayoria cas.”

E rumannan ta logra resultadonan excitante segun cu evangelisadónan nobo ta bini for di tur nivel dje sociedad di Quebec, incluyendo e comunidad médico. Esei ta caso cu un dokter. Su esposa, e mes un proclamadó di Reino, tabata papia bes tras bes cuné dje speransa di Bijbel. Un anciano di congregacion alerto a tuma iniciativa pa invitá e dokter n’e reunion di congregacion durante e tempu ora e foyeto Con Sanger Por Salba Bo Bida tabata ser studiá. El a bini i asta a participá. Impresioná p’e calidad i profundidad spiritual dje consideracionnan, el a aceptá su mes studio personal di Bijbel. Awor e tambe ta un proclamadó di Reino.

Uso eficas dje revistanan a hunga un papel importante den atraé hende na Bijbel. Bo no sa nunca cua artículo lo ta e catalisador pa atraé un hende na e berdad. Un proclamadó di Reino a ofrecé un edicion di Spierta! na un bisiña cu no kier a scucha e mensahe pero cu sí tabata interesá den e mundu di insecto. E potret den e artículo “Malesa di Chagas—Un Sunchi di Morto” den e Spierta! (ingles) di 22 di november, 1992, a intrigu’é. Impresioná cu loke el a lesa, el a pidi mas revista. A cuminsá un studio di Bijbel cuné, i den seis luna e tabata duna testimonio na otronan.

Na Lugánan Público: Ley canades ta permití hende papia libremente den lugánan público, manera aeropuerto. N’e Aeropuerto Internacional Halifax, proclamadónan di Reino ta acercá biaheronan discretamente entre vuelonan i ta enbolbé nan den combersacion. Nan ta usa preguntanan guiador oportuno pa dirigí e combersacion na Bijbel. Ya cu nan tin un Bijbel tamaño di sacu i literatura huntu cu nan, nan por respondé na necesidadnan spiritual. Ciruhano, científico, abogado, piloto, clero, polis, shofer di taxi, ingeniero, maestro, personal militar i político for di paisnan stranhero ta entre esnan cu den e manera aki a tende e mensahe di Reino i a hiba simianan dje berdad pa spruit den lugánan leu.—Colosensenan 1:6.

Un mainta trempan n’e aeropuerto, un homber a aceptá e revistanan Toren di Vigilancia i Spierta! Anto el a bisa cu un stem calmu i lento: “Ai no, no Testigonan di Jehova!” Pakico un reaccion asina? E homber tabata un moslim deboto cu a caba di resa den e kapel dje aeropuerto. El a roga Dios pa mustr’é sabiduria, perspicacia i berdad. E idea cu Testigonan di Jehova tabata un contesta instantáneo riba su oracion a simplemente lagu’é asombrá.

En berdad, e proclamadónan di Reino yen di curashi na Cánada no ta laga nada stroba nan di presentá e mensahe precioso dje Reino. Nan no ta permití idioma straño, ni caminda di tera yen di buracu, ni comunidadnan remoto, ni flatnan haltu di alta siguridad impedí nan. Nan ta dicididu pa entregá Dios su mensahe di bida na buscadónan dje berdad di curason onrado. Huntu cu nan hermandad mundial di co-trahadónan, nan ta obedecé inegoistamente e mandamentu di Jesus pa ‘bai i haci disipel.’—Mateo 28:19.

[Nota]

[Kuadro na página 27]

Proclamadónan di Reino Exitoso Ta Usa Telefon

Algun a bisa: “Halo. Mi nomber ta [duna nomber]. Mi ta papiando brevemente cu hende den boso edificio tocante con por alcansá pas. Bo ta kere cu un dia lo yega di tin pas rond mundu? [Permití contesta.] Pa trankilisá bo, mi no ta haciendo un encuesta ni bende nada. Mas bien, mi ta compartiendo e pensamentu for dje Scritura Santu cu Dios sí lo trece pas.” Despues e combersacion por sigui cu un consideracion bíblico corticu.

Otronan a bisa: “Bon nochi. Mi nomber ta [duna nomber]. Mi ta un boluntario den bo área. Mi ta buscando opinion di individuonan cu ta biba den boso edificio. Hopi hende ta preocupá tocante siguridad personal en bista dje violencia i crímen cu ta escalando den nos área. Esaki ta algu cu ta preocupá bo? [Permití contesta.] Bo ta kere cu lo yega un dia ora henter e mundu lo sinti su mes sigur?” Permití un contesta, i sigui cu un mensahe bíblico.