Pakico Tin un Crisis di Confiansa?

‘BO POR ègt confia un hende awendia?’ Kisas bo a tende un persona frustrá haci e pregunta aki. Of kisas bo mes a haci e pregunta aki ora un suceso den bo bida a perturbá bo.

Bo no por nenga cu rond mundu tin un falta di confiansa den institucionnan i den otro hende. Hopi biaha, e falta di confiansa aki ta hustificá. Hende di berdad ta spera cu mayoria político lo cumpli cu tur e promesanan cu nan a haci promé cu eleccion? Un encuesta tené na 1990 bou di 1.000 studiante na Alemania a indicá cu miéntras 16,5 porciento di nan tabata sigur cu políticonan por a resolvé problemanan di mundu, dos biaha mas tantu a expresá dudanan serio. I e mayoria a bisa cu nan no tabatin confiansa den e capacidad di políticonan pa solucioná problemanan ni tampoco den nan boluntad pa haci esei.

E korant Stuttgarter Nachrichten a lansa e keho: “Muchu hopi político tin promé nan mes interes na mente, i despues, cu un posibilidad chikitu, esnan di nan votadónan.” Hende den otro paisnan tin mésun opinion. E korant The European a bisa di un pais: “E sarcasmo cu hóbennan tin pa cu políticonan ta bon fundá i nan grandinan tambe tiné.” El a skirbi cu ‘regularmente e electorado ta saca partidonan político for di gobiernu cu nan voto.’ E korant a bisa mas aleu: “Ken cu pasa tempu den e hóbennan [einan] ta ripará mesora nan falta di confiansa i nan sentido di a perde guia.” Pero, sin confiansa dje pueblo, un gobiernu democrático no por logra mashá. Ex-presidente mericano John F. Kennedy a yega di bisa: “E base pa un gobiernu eficas ta confiansa dje pueblo.”

Relacioná cu confiansa den e mundu financiero, contratempunan económico repentino i plannan pa bira ricu lihé cu a fracasá, a pone hopi hende cuminsá vacilá. Ora bolsanan di balor rond mundu tabata fluctua pa loco na october 1997, un revista noticiero a papia tocante “un falta di confiansa extraordinario i tin biaha iracional” i tambe di “e epidemia di falta di confiansa.” Tambe el a bisa cu “[na un pais asiático] hende a perde asina tantu confiansa cu . . . esei a parce di menasá e existencia mes dje gobiernu na mando.” Resumiendo, el a declará loke ta bisto: “Economianan ta dependé di confiansa.”

Religion tampoco ta inspirá confiansa. E revista religioso aleman Christ in der Gegenwart ta lamentá: “E nivel di confiansa cu pueblo ta pone den Iglesia ta sigui baha.” Entre 1986 pa 1992, e cantidad di aleman cu hopi, of por lo ménos un bon midí di confiansa den iglesia a cai for di 40 pa 33 porciento. De facto, na ex-Oost Alemania, el a baha te bou di 20 porciento. Di otro banda, hende cu tabatin poco of ningun confiansa den iglesia a aumentá for di 56 te na 66 porciento na loke tabata West Alemania i te na 71 porciento na ex-Oost Alemania.

Ta bisto cu hende a perde confiansa tambe den camponan cu no ta política, finansa i religion—e tres pilarnan di sociedad humano. Un otro ehempel ta cumplimentu cu ley. Buracunan den código criminal, dificultad den aplicá ley corectamente i decisionnan di corte cu ta cuestionabel a sagudí hende su confiansa seriamente. Segun revista Time, “e frustracion di ciudadanonan i polis a alcansá un punto unda hende no tin confiansa den un sistema cu bes tras bes ta laga criminalnan peligroso los bek riba caya.” Pa motibu di acusacionnan di corupcion i brutalidad policial, confiansa asta den polis a baha te na suela.

Pa loke ta política internacional, combersacionnan di pas cu ta ser interumpí i ‘paronan-di-fuego’ cu ta ser kibrá, ta subrayá un falta di confiansa. Bill Richardson, embahador mericano na Nacionnan Uní, a pone dede riba e tropieso principal pa alcansá pas na Medio Oriente, bisando simplemente: “Tin un falta di confiansa.”

Miéntras tantu riba un nivel mas personal, hopi hende ta falta confiansa asta den famia i amigu yegá, net esnan na ken hende normalmente ta acudí pa comprension i consuelo ora nan tin problema. E ta parce mashá e situacion cu e profeta hebreo Mikéas a describí: “No pone boso fe den un compañero. No cifra boso confiansa den un amigu íntimo. For di esun cu ta drumi den bo pechu, wardá bo dje aperturanan di bo boca.”—Mikéas 7:5

Un Señal di Tempu

Recientemente un revista a cita loke e sicólogo aleman Arthur Fisher a bisa: “Confiansa den desaroyo di sociedad i den bo futuro personal en realidad a baha drásticamente riba tur frontera. Hende hóben ta duda cu institucionnan di sociedad por yuda nan. Nan confiansa ta bai asina leu te cu e no ta existí mas, sea ta político, religioso of cualkier otro organisacion.” Nada straño cu e sociólogo Ulrich Beck ta papia di un “cultura di duda” pa cu autoridad, institucion i expertonan cu t’ei hopi tempu caba.

Den un cultura asina, hende tin tendencia di hala atras, di rechasá tur autoridad, di biba segun normanan personal, i di tuma decisionnan sin tene cuenta cu conseho of guia di otronan. Algun ta demasiado desconfiá, i posiblemente ta asta mustra falta di consideracion, ora di trata cu hende cu nan ta sinti cu nan no por confia mas. E actitud aki ta fomentá un clima insaludabel, manera Bijbel ta describí: “Den e último dianan lo presentá tempu crítico, duru pa trata cuné. Pasobra hende lo ta stimadó di nan mes, stimadó di placa, presumido, halsá, blasfemadó, desobediente na mayornan, malagradecí, desleal, sin cariño natural, no dispuesto na ningun acuerdo, calumniadó, sin dominio propio, feros, sin amor pa bondad, traicionero, cabesura, hinchá cu orguyo, stimadó di placer mas bien cu stimadó di Dios, teniendo un forma di debocion piadoso pero resultando falsu na su poder.” (2 Timoteo 3:1-5; Proverbionan 18:1) Di berdad e crísis di confiansa djawe ta un señal di tempu, un señal di “e último dianan.”

Den un mundu cu ta sufri di un crísis di confiansa, i cu ta yen di hende manera esnan describí ariba, hende no por disfrutá completamente di bida. Pero ta realístico pa pensa cu cosnan lo cambia? Por vence e crísis di confiansa djawe? Si ta asina, con i na ki tempu?