Agradá Jehova Ta Mi Interes Primario
MANERA THEODOROS NEROS A RELATA
Porta di mi cel a zwai habri, anto un oficial a grita: “Ken ta Neros?” Ora cu mi a identificá mi mes, el a ordená mi: “Lanta ariba. Nos ta bai ehecutá bo.” Esaki a sosodé den un campo militar na Corinto, Grecia, na 1952. Di con mi bida tabata cologá na un hilu? Promé cu mi splica, lagá mi contá bo algu di mi pasado.
ROND di 1925, studiantenan di Bijbel (manera tabata yama Testigonan di Jehova e tempu ei) a topa cu mi tata. Den poco tempu el a bira un di nan i a compartí su creencianan cu su ocho rumannan. Tur a aceptá e berdad di Bijbel, i su mayornan tambe. Despues el a casa, anto na 1929 ami a nace na Agrinio, Grecia.
Tabata poco aña teribel pa Grecia! Pa cuminsá, tabatin e dictadura cruel di General Metaxas. Ademas, na 1939 Guera Mundial II a cuminsá, i pronto despues nazinan tabata ocupá e pais. Tur caminda tabatin malesa i hamber. Ta den garoshi chikitu nan tabata bai cu e cadavernan hinchá dje mortonan. Maldad den mundu tabata masha bisto, i tur hende por a mira e necesidad pa Dios su Reino bini.
Un Bida di Sirbishi Dedicá
Dia 20 di augustus 1942, segun cu algun di nos tabata yegando pa un reunion pafó di Tesalónica, nos superintendente presidente a mustra riba e avionnan di guera británico cu tabata basha bom riba e stad i a enfatisá con nos obedencia na e exhortacion pa ‘no bandoná nos reunimentu huntu’ a protehá nos. (Hebreonan 10:25) Na tal ocasion nos a reuní cantu di laman, i ami tabata un di esnan cu a presentá pa bautismo. Ora nos a sali for di awa, nos a para na rij i nos rumannan cristian a canta un cantica pa nos den cua nan a encomendá nos pa e decision cu nos a tuma. Esei sí tabata un dia inolvidabel!
Poco despues, ora ami cu un otro mucha homber tabata bishitá hende den nos sirbishi di cas pa cas, polis a arestá nos, hiba nos warda di polis. Pa nan enfatisá cu nan a considerá nos comunista, i cu nos trabou di predicá tabata prohibí, nan a bati nos, bisando: “Jehova ta mescos cu Stalin, idiotnan!”
Guera civil tabatin Grecia aribabou e tempu ei, i fanatismo anti-comunista tabata hopi fuerte. Siguiente dia nan a pone nos marcha pasa dilanti nos casnan cu nos mannan di bui, manera criminal. Pero no ta eseinan ta e único pruebanan cu mi a enfrentá.
Pruebanan di Fe na Scol
Na comienso di 1944 mi tabata mucha di scol ainda, i ketu bai nazinan tabata ocupá Tesalónica. Un dia na scol, un pastor ortodox griego, nos meneer di godsdienst, di cu mi cu e ta bai ‘overhoor’ mi e les di e dia ei. E otro muchanan di: “E no ta ortodox cristian.”
E meneer a puntra: “Kico e ta?”
Ami a contestá: “Mi ta un Testigo di Jehova.”
El a grita: “Un lobo entre e carnénan,” anto a gará mi i pasá mi un wanta.
Den mi mes mi a pensa: ‘Con ta posibel cu un carné ta morde un lobo?’
Poco dia despues, nos tabata un grupo di como 350 mucha sintá na mesa pa cuminda di merdia. E supervisor di: “Neros ta bai gradicí p’e cuminda.” Mi a ripití e asina yamá ‘Nos Tata,’ e oracion cu Jesus a siña su siguidónan, manera ta pará na Mateo 6:9-13. E supervisor no a gusta. For di caminda cu e tabata sintá el a puntrá mi rabiá: “Di con bo a haci e oracion asina?”
Mi di: “Pasobra mi ta un Testigo di Jehova.” Ora el a tende esei, e tambe a gará mi i pasá mi un wanta. Mas lat riba e dia ei un otro meneer di scol a yamá mi den su oficina pa bisá mi: “Bo a haci bon, Neros, tene duru na loke bo ta kere aden, i no entregá.” Anochi, mi tata a curashá mi cu e palabranan aki di apostel Pablo: “Tur esnan cu ta deseá di biba cu debocion piadoso den asociacion cu Cristo Jesus lo ser persiguí tambe.”—2 Timoteo 3:12.
Ora mi a caba scol secundario, mi mester a scoge cua carera lo mi sigui. Dor di e conflicto civil na Grecia, mi tabatin cu enfrentá e cuestion di neutralidad cristian tambe. (Isaías 2:4; Mateo 26:52) A resultá cu, na comienso di 1952, nan a sentenciá mi na 20 aña di prizon dor cu mi a nenga di bringa durante e periodo difícil ei di Grecia su historia.
Mi Neutralidad Cristian na Prueba
Durante cu mi tabata detení den camponan militar na Mesolóngion i Corinto, mi tabatin e oportunidad di splica e comandantenan militar cu mi concenshi bíblicamente entrená lo no permití mi bira un soldá cu ta sostené causanan político. Mi a splica nan cu “mi ta un soldá di Jesus caba”, refiriendo na 2 Timoteo 2:3. Ora nan a urgí mi pa reconsiderá mi decision, mi di cu mi no a tum’é bou di emocion, sino despues cu mi a pensa seriamente riba dje, i en bista di mi dedicacion na Dios pa haci su boluntad.
Como resultado, mi mester a haci trabou forsá, keda sin come cada pasa un dia pa 20 dia largu, i drumi riba un flur di cement cu tabata midi un meter di hanchu i dos di largu. Anto mi tabata compartí e cel aki cu dos otro Testigo! Ta den e temporada aki, tempu mi tabata den e campo na Corinto, nan a yamá mi for di mi cel pa ehecutá mi.
Segun cu nos tabata bai e lugá di ehecucion, e oficial a puntrá mi: “Bo no ta bai bisa nada?”
Mi a contestá: “No.”
“Bo no ta bai skirbi bo famia?”
Mi a bolbe contestá: “No. Nan ta conciente caba cu lo mi por ser ehecutá aki.”
Nos a yega n’e patio, i nan a ordená mi para contra e muraya. Anto, na lugá di manda e soldánan tira, e oficial a manda: “Hib’é paden.” Henter e ehecucion tabata un triki diseñá pa test mi determinacion.
Despues, nan a mandá mi e isla di Makrónisos, caminda cu nan no a permití mi tin ningun literatura cu no ta un Bijbel. Diestres Testigo tabata detení den un cas chikitu, separá di e casi 500 prezunan criminal. Tog, di un manera of otro nos tabata haña literatura di contrabanda. Por ehempel, un dia nan a mandá mi un caha di loukoúmia (un mangel popular). E inspectornan tabata asina ansioso pa purba e loukoúmia cu nan no a ripará e revista Toren di Vigilancia cu tabata scondí bou di nan. Un Testigo a remarcá: “E soldánan a come e loukoúmia, pero nos a ‘come’ e Toren di Vigilancia!”
Nos a logra ricibí un copia dje buki What Has Religion Done for Mankind? (Kico Religion A Haci pa Humanidad?) cu a caba di sali e tempu ei, anto un prezu Testigo cu tabata sa ingles a traducié. Nos tabata studia E Toren di Vigilancia huntu tambe, reuní den secreto. Nos a considerá prizon como un scol, como un oportunidad pa fortalecé nos spiritualidad. Mas cu tur cos, nos tabata felis, pasobra nos tabata sa cu nos curso di integridad tabata agradá Jehova.
E último prizon cu nan a cerá mi aden tabata na Týrintha, na oost di Pelopónnisos. Mi a nota un wardadó di prezu einan cu tabata observá cu masha atencion ora mi tabata studia Bijbel cu un otro prezu. Mi a keda masha sorprendí di topa e wardadó di prezu ei añanan despues na Tesalónica! E tempu ei ya el a bira un Testigo. Despues nan a manda un di su yunan prizon, no pa traha como wardadó di prezu sino como prezu mes. El a bai cerá p’e mésun motibu cu ami.
Actividad Renobá Despues di Sali Liber
Mi a sinta tres aña so di mi sentencia original di 20 aña. Despues di a sali liber mi a dicidí di bai biba na Aténas. Pero, poco tempu despues mi a bira malu cu un tipo di inflamacion di pechu, i mi a hañá mi ta bolbe Tesalónica. Mi a keda dos luna largu na cama. Despues mi a topa un mucha muher leuk cu yama Koula, anto nos a casa na december 1959. Na 1962 el a cuminsá sirbi como pionero, manera ta yama ministernan di tempu completo di Testigonan di Jehova. Tres aña despues mi por a uni cuné den e trabou di pionero.
Na januari 1965 nan a asigná nos na e trabou di circuito pa nos bishitá congregacionnan pa fortalecé nan spiritualmente. E zomer ei nos tabatin e privilegio di bishitá nos promé congreso di distrito grandi tambe, na Viena, Austria. E tabata otro for di esnan cu nos tabata tene na Grecia den mondi na secreto, dor cu nos obra tabata prohibí. Pa fin di 1965 nan a invitá nos pa bai traha na e sucursal di Testigonan di Jehova na Aténas. Pero, dor cu algun di mi famianan a haña problema di salú, nos mester a bolbe Tesalónica na 1967.
Aunke nos tabata percurá pa responsabilidad di famia, nos a keda masha ocupá den e trabou di evangelisá. Un biaha, papiando cu mi primu Kostas, mi a describí na dje e bunitesa di Dios su organisacion, i e amor, unidad i obedencia na Dios cu ta existí den dje. E di: “E cosnan ei lo tabata masha dushi si sikiera Dios a existí.” El a aceptá mi invitacion pa examiná si Dios ta existí of no. Mi a cont’é cu nos tabata bai asistí na un congreso internacional di Testigonan di Jehova na Nuremberg, Alemania, na augustus 1969. El a puntra si e por a bai cu nos, i su amigu Alekos, cu tambe tabata studia Bijbel cu nos, tambe kier a bai.
E congreso na Nuremberg tabata un espectáculo extraordinario! A tene e congreso den e stadion enorme caminda Hitler a yega di celebrá su victorianan militar. Nos asistencia a alcansá un máximo di mas cu 150.000 hende, i Jehova su spiritu tabata bisto den henter su desaroyo. Poco despues, tantu Kostas como Alekos a bautisá. Awor, tur dos ta sirbi como anciano cristian, i nan famianan tambe ta Testigo.
Mi a cuminsá un studio cu un señora interesá. Su casá a laga sa cu e kier investigá nos creencianan, i poco despues el a lagá mi sa cu el a invitá un cierto meneer Sakkos, un teólogo ortodox griego, pa un debate. E esposo kier a laga nos tur dos contestá algun pregunta. Meneer Sakkos a bini huntu cu un pastor. E homber cu nos tabata bishitá a cuminsá na bisa: “Promé, mi kier pa meneer Sakkos contestá tres pregunta.”
El a tene e traduccion di Bijbel cu nos tabata usa pa nos consideracionnan na haltu, anto bisa: “Pregunta number unu: E Bijbel aki ta genuino, of ta Bijbel di Testigonan e ta?” Meneer Sakkos a contestá cu e ta un traduccion reconocí, i el a describí Testigonan di Jehova como “stimadó di Bijbel” tambe.
Continuando, e homber a bisa: “Pregunta number dos: Testigonan di Jehova ta hende decente?” Loke e kier a sa ta ki sorto di hende su casá a cuminsá anda cuné. E teólogo a contestá cu definitivamente nan ta hende decente.
“Di tres pregunta,” e homber a sigui: “Testigonan di Jehova ta ricibí un salario?” E teólogo a contestá: “No.”
E homber a concluí bisando: “Mi a haña contesta riba mi preguntanan, i mi a tuma mi decision.” Despues di esei, el a sigui cu su studio di Bijbel, i no a tarda mashá cu el a bautisá como un Testigo di Jehova.
Un Bida Ricu i Recompensador
Mi a cuminsá sirbi bek como superintendente di circuito na januari 1976. Un seis aña despues mi tabatin e privilegio di tuma parti den cuminsá un forma nobo di predicá na Grecia: testificacion riba caya. Anto, na october 1991, ami cu mi casá a cuminsá sirbi como pionero special. Un par di luna despues, mi a hañá mi ta haci un operacion di “quadruple bypass” na curason cu, danki Dios, a bai bon. Awor mi salú ta hopi bon, i mi por a cuminsá bek cu e trabou di predicá tempu completo. Ademas, mi ta sirbi como anciano den un dje congregacionnan di Tesalónica, i mi ta traha cu e Comité local di Contacto cu Hospital, pa asistí esnan cu tin problema médico.
Mirando bek riba con mi bida a bai, mi ta realisá cuantu satisfaccion mi a saca di haci loke ta agradá nos Tata celestial. Mi ta masha contentu cu hopi tempu pasá mi a aceptá su invitacion urgente: “Sea sabí, mi yu, i alegrá mi curason, pa mi por contestá esun cu ta desafiá mi cu desprecio.” (Proverbionan 27:11) Mi curason ta alegrá mashá di mira con e cantidad di hende sincero cu ta bini na Jehova su organisacion ta crece rond mundu. Ta un berdadero privilegio pa participá den libra hende pa medio di berdad bíblico i duna nan e prospecto di bida eterno den un hustu mundu nobo!−Juan 8:32; 2 Pedro 3:13.
Semper nos ta purba animá sirbidónan hóben di Jehova pa pone sirbishi di tempu completo como nan meta, pa dedicá nan tempu i nan vigor na dje. Di berdad, confia den Jehova i haña deleite exkisito den haci su curason alegrá ta e bida cu ta duna mas satisfaccion!−Proverbionan 3:5; Eclesiástes 12:1.
[Plachinan na página 21]
(Di robes pa drechi)
Sirbiendo den cushina di Betel na 1965
Dunando un discurso na 1970, tempu cu nos trabou di predicá tabata prohibí
Cu mi casá na 1959
[Plachi na página 23]
Cu mi casá, Koula