Disfrutá di “e Berdadero Bida”

JEHOVA Dios a duna hende e nocion di eternidad. (Eclesiástes 3:11) Esaki ta pone hende sinti nan impotente ora nan ta enfrentá morto pero, na mésun tempu, ta lanta den nan un deseo intenso pa biba.

E Palabra inspirá di Dios, Bijbel Santu, ta duna nos un gran speransa. (2 Timoteo 3:16) No ta posibel cu Jehova, kende ta e esencia di amor, a traha hende cu e abilidad di comprendé e concepto di eternidad, anto conden’é na biba djis un par di aña. Crea nos pa laga nos suerte den bida tormentá nos, simplemente no ta pas cu Dios su personalidad. E no a crea nos manera “animalnan sin tinu cu di naturalesa a nace pa ser atrapá i destruí.”—2 Pedro 2:12.

Ora Jehova Dios a crea Adam cu Eva cu un sentido natural di eternidad, el a crea algu “hopi bon”; el a traha nan cu e potencial di biba pa semper. (Génesis 1:31) Pero lamentablemente, e promé pareha a malusá nan boluntad liber, desobedeciendo un prohibicion specífico dje Creador, i asina a perde nan perfeccion original. Como resultado, nan a muri, i nan a transmití imperfeccion i morto na nan desendientenan.—Génesis 2:17; 3:1-24; Romanonan 5:12.

Pa Bijbel, no tin misterio rondó dje propósito di bida i loke morto ta nificá. E ta bisa cu den morto “no tin trabou ni formacion di proyecto ni conocimentu ni sabiduria,” i cu e mortonan “no ta conciente di nada en absoluto.” (Eclesiástes 9:5, 10) Cu otro palabra, e mortonan ta morto. E doctrina dje alma inmortal no ta bíblico, di manera cu no tin ningun misterio profundo pa resolvé tocante e condicion dje mortonan.—Génesis 3:19; Salmo 146:4; Eclesiástes 3:19, 20; Ezekiel 18:4.a

Dios tabatin un propósito; e no a crea e tera “simplemente pornada.” El a form’é pa hende perfecto ‘habit’é’ den condicionnan paradísico, i Dios no a cambia su propósito. (Isaías 45:18; Malakías 3:6) Pa realisá esei, el a manda su Yu na tera. Dor di a keda fiel te na morto, Jesucristo a percurá e medio pa rescatá humanidad for di picá i morto. De facto, Jesus a bisa: “Dios a stima mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno.”—Juan 3:16.

Hopi tempu pasá, Dios a primintí cu lo el a crea “shelu nobo i un tera nobo.” (Isaías 65:17; 2 Pedro 3:13) Esei lo a encerá scoge un grupo chikitu di cristian fiel pa biba den shelu. Huntu cu Jesucristo, nan ta forma un gobiernu central. Bijbel ta referí na esaki como “e reino di shelu,” of “reino di Dios,” cu lo administrá “e cosnan riba tera.” (Mateo 4:17; 12:28; Efesionan 1:10; Revelacion 5:9, 10; 14:1, 3) Despues cu Dios destruí tur maldad riba nos planeta i purifik’é, lo e introducí un hustu sociedad humano nobo, esta, un “tera nobo.” Esaki lo incluí hende cu Dios lo protehá atrabes dje binidero destruccion dje mal sistema di cosnan aki. (Mateo 24:3, 7-14, 21; Revelacion 7:9, 13, 14) Esnan cu lo biba atrobe pa via di e resureccion primintí, lo djoin nan.—Juan 5:28, 29; Echonan 24:15.

E Ora ei “e Berdadero Bida”

Confirmando e descripcion emocionante di bida riba e futuro tera paradísico, Dios ta bisa: “Mira! Mi ta haci tur cos nobo.” (Revelacion 21:5) Ta imposibel p’e mente humano comprendé completamente e obranan maraviyoso cu Dios lo efectuá pa humanidad. Dios lo crea un paradijs mundial, parecido na Eden. (Lucas 23:43) Mescos cu den Eden, bunitesa, color i zonido agradabel, i dushi smak lo ta abundante. Lo no tin pobresa ni scarcedad di cuminda mas, pasobra relacioná cu e tempu ei Bijbel ta bisa: “E cosnan anterior a pasa bai.” (Revelacion 21:4; Salmo 72:16) Ningun hende lo no bisa mas, “mi ta malu,” ya cu lo eliminá enfermedad pa semper. (Isaías 33:24) Sí, tur causa di dolor lo disparcé, incluyendo humanidad su enemigu di hopi tempu, esta, morto. (1 Corintionan 15:26) Den un vision asombroso dje “tera nobo,” cu ta e sociedad humano nobo bou dje mando di Cristo, apostel Juan a tende un bos bisa: “[Dios lo] seca tur lágrima di nan wowo, i lo no tin morto mas, ni lo no tin lamento ni sclamacion ni dolor mas.” Kico lo por trece mas consuelo i goso cu cumplimentu dje promesa divino aki?

Ora Bijbel ta describí e futuro bida, e ta enfatisá particularmente e condicionnan cu lo satisfacé hende su aspiracionnan moral i spiritual. Tur e idealnan hustu pa cua te awor humanidad a lucha en bano, lo ser alcansá completamente. (Mateo 6:10) Entre esakinan tin e deseo pa husticia, cu hende no a logra realisá, hopi bes debí n’e afliccion causá pa opresornan cruel cu a dominá e débilnan. (Eclesiástes 8:9) E salmista a skirbi proféticamente di condicionnan cu lo existí bou dje mando di Cristo: “Den su tempu hustisia lo bona, pas profundo lo reina.”—Salmo 72:7, Beibel na papiamentu koriente.

Igualdad ta un otro aspiracion pa cua hopi hende a haci sacrificio. Den e “re-creacion,” Dios lo eliminá discriminacion. (Mateo 19:28) Tur hende lo tin e mésun dignidad. Esaki lo no ta igualdad imponé pa un of otro gobiernu cruel. Al contrario, lo eliminá e causanan di discriminacion, entre nan, e golosidad i orguyo cu ta hiba hende na busca pa dominá otro hende of na acumulá enorme cantidad di posesion. Isaías a profetisá: “Nan siguramente lo construí casnan i ocupá nan; i nan siguramente lo planta hofi di wijndruif i come nan fruta. Nan lo no traha cas i otro hende biba aden; nan lo no planta i otro hende come.”—Isaías 65:21, 22.

Cuantu hende a sufri dor di dramamentu di sanger den guera personal i colectivo! Esaki a cuminsá for dje asesinato di Abel bini abou te n’e gueranan dje tempu actual. Esta hopi tempu hende a spera i warda, aparentemente en bano, pa pas por ser establecé riba tera! Den e Paradijs restorá, tur hende lo ta pacífico i mansu; nan lo “haña nan deleite exkisito den e abundancia di pas.”—Salmo 37:11.

Isaías 11:9 ta bisa: “E tera siguramente lo ta yená cu e conocimentu di Jehova mescos cu e awanan ta cubri laman mes.” Pa motibu di, entre otro, imperfeccion heredá, no ta posibel pa nos awe capta e nificacion completo dje palabranan ei. Con conocimentu perfecto di Dios lo uni nos cuné i con esei lo resultá den pleno goso, nos lo tin cu mira ainda. Pero ya cu e Scritura ta informá nos cu Jehova ta un Dios maraviyoso den poder, sabiduria, husticia i amor, nos por tin sigur cu lo e tende tur oracion cu e habitantenan dje “tera nobo” haci.

“E Berdadero Bida” Ta Algu Sigur—Gar’é!

Pa hopi hende, bida eterno den un mihó mundu ta djis un soño of un ilusion. Sin embargo, pa esnan cu berdaderamente tin fe den e promesa di Bijbel, e speransa aki ta algu sigur. E ta manera un anker pa nan bida. (Hebreonan 6:19) Mescos cu un anker ta wanta un barcu firme i ta strob’é di move pa loco, e speransa di bida eterno ta haci hende stabil, ta duna confiansa i ta permití nan confrontá e dificultadnan serio den bida i asta vence nan.

Nos por ta sigur cu Dios lo cumpli cu su promesanan. El a asta duna un garantia dor di declará un huramentu, un compromiso irevocabel. Apostel Pablo a skirbi: “Dios, ora e tabatin e propósito di demostrá mas abundantemente na heredero dje promesa e incambiabilidad di su conseho, a bin cu un huramentu, pa asina, mediante dos cos incambiabel den cua ta imposibel pa Dios gaña, nos . . . por tin un estímulo fuerte pa gara e speransa poné dilanti nos.” (Hebreonan 6:17, 18) E ‘dos cosnan incambiabel’ cu Dios no por anulá nunca, riba cua nos ta basa nos expectativanan, ta su promesa i su huramentu.

Fe den Dios su promesanan ta duna gran consuelo i fortalesa spiritual. Hosué, un lider dje pueblo di Israel, tabatin un fe asina. Ora Hosué a duna su discurso di despedida n’e israelitanan, e tabata bieu i tabata sa cu e tabata cerca di muri. Tog, el a expresá fortalesa i lealtad inkebrantabel, cu a brota for di pleno confiansa den Dios su promesanan. Despues cu el a bisa cu e ta bayendo “den e caminda di henter e tera,” e caminda cu ta hiba tur hende na morto, Hosué a declará: “Boso sa bon cu tur boso curason i cu tur boso alma cu ni un solo palabra di tur e bon palabranan cu Jehova boso Dios a papia cu boso a faya. Nan tur a ser realisá pa boso. Ni un solo palabra di nan a faya.” Sí, tres bes Hosué a ripití cu semper Dios ta cumpli cu tur su promesanan.—Hosué 23:14.

Abo tambe por tin e mésun fe den Dios su promesa di un mundu nobo cu pronto lo ser establecé. Dor di studia Bijbel cu sinceridad, lo bo bin comprendé ken Jehova ta i pakico e ta merecé bo pleno confiansa. (Revelacion 4:11) Abraham, Sara, Isaac, Jacob i otro personanan fiel di antigwedad tabatin un fe inkebrantabel, basá riba nan conocimentu íntimo dje Dios berdadero, Jehova. Nan a permanecé firme den speransa, apesar dje echo cu nan “no a obtené e cumplimentu dje promesanan” tempu nan tabata na bida. Tog, “nan a mira nan di leu i a ricibí nan cu gustu.”—Hebreonan 11:13.

Awor cu nos ta comprendé profecia di Bijbel, nos ta mira “e gran dia di Dios e Todopoderoso” ta acercando, e dia durante cua lo haci e tera limpi di tur maldad. (Revelacion 16:14, 16) Mescos cu hende fiel di antigwedad, nos tin cu keda den expectativa sigur di futuro sucesonan, motivá pa fe i tambe pa amor pa Dios i pa “e berdadero bida.” E echo cu e mundu nobo ta cerca di bini, ta un incentivo fuerte pa esnan cu ta ehercé fe den Jehova i cu ta stim’é. Hende tin cu cultivá tal fe i amor pa por gana Dios su fabor i proteccion durante su gran dia, cu ta acercando.—Sofonías 2:3; 2 Tesalonicensenan 1:3; Hebreonan 10:37-39.

Pues, abo stima bida? I bo ta deseá asta mas ainda “e berdadero bida”—bida como un sirbidó aprobá di Dios, cu e prospecto di un futuro felis, sí, cu mira riba bida eterno? Si esei ta loke bo ta busca, tuma e exhortacion di apostel Pablo na pechu, kende a skirbi cu nos mester ‘pone nos speransa, no den rikesa insigur, sino den Dios.’ Pablo a continuá: ‘Sea ricu den obranan excelente,’ loke ta onra Dios, pa asina “haña un gara firme riba e berdadero bida.”—1 Timoteo 6:17-19.

Dor di aceptá e oferta di studia Bijbel cu Testigonan di Jehova, bo por gana conocimentu cu “ta nificá bida eterno.” (Juan 17:3) Amorosamente, Bijbel ta contené e invitacion paternal aki na tur hende: “Mi yu, no lubidá mi ley, i laga bo curason warda mi mandamentunan, pasobra largura di dianan i añanan di bida i pas lo ser agregá na bo.”—Proverbionan 3:1, 2.

[Nota]