Pregunta di Lektor
Den antiguo Israel, kiko e lus milagroso ku tin biaha nan tabata yama Shekina i ku a aparesé den e Santísimo di e tabernakel i e tèmpel a nifiká?
Yehova, e Tata amoroso i Protektor di su pueblo, a manifestá su presensia notablemente den Israel. Un manera ku el a hasi esei tabata pa medio di un nubia resplandesiente ku tabata hopi ligá ku su lugá di adorashon.
E lus ekstraordinario ei a representá Yehova su presensia invisibel. El a aparesé den e Santísimo di tantu e tabernakel komo di e tèmpel ku Salomon a traha. No ta asina sí ku e lus milagroso ei a nifiká ku Yehova tabata físikamente presente einan. Ningun edifisio ku hende traha por kontené e Kreadó. (2 Krónikanan 6:18; Echonan 17:24) E resplandor sobrenatural aki den e santuario di Dios por a duna e sumo saserdote—i mediante dje tur e israelitanan—e konfiansa ku Yehova su presensia a sirbi komo un protekshon pa nan, i ku e lo a perkurá pa nan nesesidatnan.
Despues di e periodo ku Beibel a ser skirbí, nan a yama e lus aki Shekina (shekhi·náh) na arameo, un palabra ku ta nifiká “lokual ta biba” òf “e bibá.” Bo no ta haña e ekspreshon aki den Beibel, pero sí den e tradukshonnan arameo di e Skritura Hebreo, konosí tambe komo e Targum.
Ora Yehova a duna Moisés instrukshon relashoná ku konstrukshon di e tabernakel, el a bis’é: “Bo mester pone e propisiatorio [“tapa,” NW] riba e Arka, i pone e testimonio ku lo mi duna bo den e Arka. I einan lo mi reuní ku bo, i for di ariba di e propisiatorio, for di meimei di e dos kerubinnan ku tin riba e arka di testimonio, lo mi papia ku bo.” (Eksodo 25:21, 22) E Arka menshoná tabata un kaha kubrí ku oro den e Santísimo. Tabatin dos kerubin di oro riba e tapa di e Arka.
For di unda Yehova lo a papia? El a duna e kontesta ora el a bisa Moisés: “Lo mi aparesé den e nubia riba e propisiatorio [tapa].” (Levítiko 16:2) E nubia aki tabata kologá riba e Arka sagrado entre e dos kerubinnan di oro. Beibel no ta revelá kon haltu e nubia ei tabata ni kon haltu riba e kerubinnan el a ekstendé.
E nubia briante aki a iluminá e Santísimo. De echo, e tabata e úniko fuente di iluminashon den e kompartimentu ei. E sumo saserdote por a probechá di e lus aki ora el a drenta e kuarto mas interior ei riba e Dia di Ekspiashon. Ei e tabata den e presensia di Yehova.
E lus milagroso aki tin un ke otro nifikashon pa kristiannan? Apòstel Juan a mira den un vishon un stat den kua “lo no tin anochi.” E stat ei ta Yerusalèm Nobo, i e ta konsistí di kristiannan ungí resusitá pa goberná ku Hesus. E lus di e stat simbóliko aki no ta bini di solo òf luna. Ta e gloria di Yehova Dios ta iluminá e organisashon aki direktamente, meskos ku e nubia di Shekina a iluminá e Santísimo. Ademas, e Lamchi, Hesukristu, ta e “lampi” di e stat. I e “stat” aki, na su turno, ta manda su lus spiritual i aprobashon riba hende reskatá for di tur nashon komo un guia pa nan.—Revelashon 21:22-25.
Pa motibu ku Yehova su adoradónan ta risibí bendishonnan abundante for di ariba, nan por ta sigur ku Yehova ta nan Wardadó i Tata kariñoso.