Ta Bale la Pena pa Bo Ta Leal?
“BO TA pagando muchu hopi sèn pa bo seguro médiko,” Karl,a un bendedó di seguro a bisa. “Si bo pasa pa mi kompania, bo ta spar 15 euro pa luna, lokual ta bastante.”
“Por ta bo tin rason,” Jens a kontestá. “Pero mi tin mi seguro médiko ku e mesun kompania pa hopi aña kaba. Nan a yuda mi bon den pasado, i mi ke keda leal na nan.”
“Lealtat ta un bunita kualidat,” Karl a kontestá. “Pero bo lealtat ta kosta bo plaka!”
Karl tabatin rason. Hopi bes, e echo ku bo ta leal, òf fiel, na un otro persona por kosta bo plaka.b Tambe e ta eksigí tempu, energia i kompromiso emoshonal. Ta bale la pena pa bo ta leal?
Hopi Ta Balor’é, Ma Poko Ta Praktik’é
Den un enkuesta ku e Instituto di Sondeo di Opinion Allensbach a efektuá na Alemania, 96 porshento di e personanan entrevistá a mira fieldat komo un kualidat deseabel. Un di dos enkuesta ku Allensbach a efektuá bou di personanan di 18 pa 24 aña a mustra ku 2 di kada 3 di nan ta mira “fieldat” komo algu “in,” es desir, algu positivo.
Hopi hende ta konsiderá lealtat òf fieldat komo bon kualidatnan, pero loke realmente ta konta ta pa ser fiel òf ser leal. Den vários pais europeo, por ehèmpel, masha poko pareha kasá òf miembro di famia ta leal na otro. E situashon entre amigu tambe ta meskos. Masha poko di nan sa ta ègt leal na otro. I e lealtat ku tabata eksistí un tempu entre doño di trabou ku trahadó òf entre negoshi ku su klientenan básikamente a bai pèrdí. Kon bin?
Tin biaha e bida drùk ku nos ta hiba ta kaba ku tur e tempu i fortalesa emoshonal ku nos mester tin pa por kumpli ku kompromisonan ku ta eksigí lealtat. Hende ku ta sinti ku otronan a laga nan na kaya kisas awor no ke ta fiel na ningun hende mas. Tal bes otronan ta preferá di hiba un bida liber di kompromiso, djis pa nan no tin nodi di ta leal.
Sea kual sea e motibu, hopi hende ta konsiderá lealtat un birtut, pero masha poko di nan ta praktik’é. P’esei, laga nos konsiderá e siguiente preguntanan: Ta bale la pena pa ta leal? Si ta asina, na ken nos mester ta leal, i den ki manera? Kiko ta e benefisionan di lealtat?
[Nota]
a A kambia algun nòmber den e artíkulo aki i den esun siguiente.
b Ounke “lealtat” i “fieldat” no ta ser usá semper den e mesun konteksto, den e artíkulonan aki tin biaha nos ta usa esun na lugá di e otro.
[Komentario na página 3]
Hopi hende ta konsiderá lealtat un birtut, pero masha poko di nan ta praktik’é