Kon Mi Ta Kuminsá?

Kiko por yuda bo disfrutá di bo lesamentu di Beibel i saka mayor probecho for di dje? Tuma nota di sinku sugerensia ku a yuda hopi hende.

Lesa den un ambiente agradabel. Buska un lugá ketu. Evitá kosnan ku por distraí bo i stroba bo di paga atenshon na loke bo ta lesa. Lesa kaminda tin sufisiente lus i bon ventilashon pa bo por konsentrá bon.

Lesa ku un mente habrí. Ya ku Beibel ta bini di nos Tata selestial, lo bo saka mas benefisio si bo tin e aktitut di un mucha ku ta kla pa siña di su tata ku ta stim’é. Pone kualke prehuisio òf pensamentu negativo ku bo por tin tokante Beibel un banda pa asina bo por laga Dios siña bo.—Salmo 25:4.

Hasi orashon promé ku bo kuminsá lesa. Beibel ta kontené e pensamentunan di Dios, pues ta lógiko ku nos mester di su yudansa pa komprondé su Palabra. Dios ta primintí ku e ta duna “spiritu santu na esnan ku pidié.” (Lukas 11:13) E spiritu santu ei por yuda bo komprondé e pensamentunan di Dios. Ku tempu, lo e habri bo mente pa bo komprondé “asta e kosnan profundo di Dios.”—1 Korintionan 2:10.

Lesa di un manera ku bo ta komprondé. No djis lesa ariba ariba. Pensa profundamente riba loke bo ta lesa. Hasi bo mes preguntanan manera: ‘Ki kualidat mi ta mira den e persona ku mi a lesa tokante dje? Kon mi por apliká loke mi a lesa?’

Pone metanan spesífiko. Pa bo por benefisiá di bo lesamentu di Beibel, hasi esfuerso pa siña algu ku por mehorá bo bida. Bo por pone meta pa, por ehèmpel, siña mas tokante Dios, bira un mihó persona òf bira un mihó kasá. Despues, skohe algun porshon di Beibel ku por yuda bo logra e metanan ei.a

E sinku sugerensianan akí lo yuda bo kuminsá lesa Beibel. Pero kon bo por hasi bo lesamentu di Beibel aun mas interesante? E siguiente artíkulo lo duna bo algun sugerensia.