Beneficiá dje Scol di Ministerio Teocrático pa 1996—Parti 1
1 Bo a lesa e instruccionnan cu a ser percurá huntu cu e “Programa pa Scol di Ministerio Teocrático pa 1996”? Bo a tuma nota di algun cambio? Di januari te cu april, Parti Num. 3 lo ta basá riba “Temas bíblicos para consideración” manera e ta ser hañá den e Traducción del Nuevo Mundo, i di mei pa december, lo e ta basá riba e buki recientemente publicá Conocimentu. Parti Num. 4 lo ta basá riba e buki Razonamiento.
2 Partinan di Studiante: Parti Num. 3 ta ser duná na un ruman muher. Ora e ta basá riba e “Temas bíblicos” e marco di circunstancia mester enbolbé testificacion di cas-pa-cas of informal. Ora e ta basá riba e buki Conocimentu, mester present’é como un rebishita of un studio di Bijbel na cas. Esaki lo resultá di ta masha útil, ya cu e buki Conocimentu lo ser usá extensamente pa conducí studionan di Bijbel na cas.
3 Si e marco di circunstancia ta un studio di Bijbel na cas, tur dos ruman muher por ta sintá. Bai direct den e studio dor di haci comentarionan breve di introduccion i despues haci e pregunta imprimí. E papel dje doño di cas mester ser hungá di manera realístico. Por busca i lesa e textonan citá segun tempu ta permití. E ruman muher mester haci uso dje arte di siña dor di saca afó e punto di bista dje doño di cas mediante preguntanan i dor di razoná riba e textonan usá.
4 Kico mester haci si tin mas texto bíblico citá den e parti cu loke por ser considerá den cincu minuut? Scoge textonan clave cu ta resaltá e puntonan principal. Si tin solamente un par di texto, puntonan principal den e les por ser considerá mas extensamente. De bes en cuando, un paragraf of un frase for dje buki por ser lesá anto despues consider’é cu e doño di cas.
5 E cuadro titulá “Test Bo Conocimentu,” cu ta ser hañá na final di cada capítulo dje buki Conocimentu, por ser repasá brevemente dor dje publicador kende su parti ta abarcá e paragraf final dje capítulo. Cuadronan di informacion cu ta cai dentro dje paragrafnan asigná tambe por ser considerá segun tempu ta permití. Si un cuadro di informacion ta presentá entre dos asignacion, e ruman muher cu ta encargá cu e promé asignacion por consider’é. Por comentá riba e plachinan den e buki ki ora cu nan ta aplicá na e material cu ta ser considerá.
6 Parti Num. 4 lo mester ta masha interesante i práctico. Tur siman lo e considerá informacion cu lo por ser usá den un manera adecuá den sirbishi di veld. Ta p’esei esun asigná lo no solamente lesa e textonan un pa un sino tambe lo haci berdadero esfuerso pa presentá un splicacion i aplicacion claro dje material. Esaki ta nificá cu mester haci un seleccion dje textonan bíblico apropiado cu ta relacioná cu e tema.
7 Si nos probechá plenamente di e entrenamentu cu ta ser percurá den e scol, nos lo ta mihó ekipá pa “predicá e palabra” den un manera cu ta demostrá e excelente “arte di siña.”—2 Tim. 4:2.