Caha Di Pregunta

◼ Kico nos tin cu tene na mente relacioná cu lesamentu di paragraf n’e reunionnan?

Hopi dje tempu asigná pa e Studio di E Toren di Vigilancia i e Studio di Buki di Congregacion ta ser usá pa lesa e paragrafnan. Esaki ta nificá cu e ruman homber asigná como lesador ta carga un responsabilidad pisá como maestro. E mester lesa den un manera cu lo ‘duna nificacion’ n’e material di manera cu e oyentenan no solamente lo comprend’é sino tambe lo ser motivá na accion. (Neh. 8:⁠8) Pues, e lesador tin cu prepará bon pa su asignacion. (1 Tim. 4:13; mira studio 6 dje buki Guía para la Escuela.) Ata aki algun punto esencial pa lesamentu público cu ta transmití nificacion.

Usa e Enfasis Apropiado cu Ta Comunicá Sentido: Determiná di antemano cua palabra of frasenan tin cu ser enfatisá afin di transmití e comprendimentu corecto.

Pronunciá Palabranan Corectamente: Pronunciacion corecto i articulacion cla ta necesario pa e auditorio por comprendé expresionnan cu ta aparecé den e publicacion. Busca palabranan desconocí of poco usá den un diccionario, of scucha n’e grabacionnan di caset dje Sociedad.

Papia cu Volúmen i Entusiasmo: Papiando cu un bos fuerte i cla i na moda entusiasmá ta lanta interes, ta conmové emocion i ta motivá e oyente.

Lesa na Moda Caluroso i Estilo di Combersacion: Naturalidad ta bini ora bo ta lesa cu afluencia. Cu preparacion i práctica, e lesador por ta relahá i esaki lo resultá den un lesamentu cu ta atractivo en bes di monótono i laf.​—⁠Hab. 2:⁠2.

Lesa e Material Manera e Ta Imprimí: Notanan na pia di página i tambe informacion entre paréntesis generalmente ta ser lesá na bos haltu si nan ta clarificá loke ta pará skirbí. E único excepcionnan ta referencianan cu simplemente ta indicá e fuente dje informacion. Un nota na pia dje página mester ser lesá n’e momento cu ta ser referí na dje den e paragraf, i ta introducié dor di bisa: “E nota na pia dje página ta bisa . . .” Despues di les’é, simplemente sigui cu e resto dje paragraf.

Ora lesamentu público ta bon hací, e ta un dje maneranan vital cu nos por ‘siña otronan pa warda tur loke’ nos Gran Maestro a manda.​—⁠Mat. 28:⁠20.