“Edificá Bo Famia di Cas”
1 Ta obvio cu den tur cultura rond parti mundu, bida di famia ta desintegrando. E mundu di Satanas ta entregá na engaño i inmoralidad. (1 Juan 5:19) Esaki ta subrayá e urgencia pa nos ‘edificá nos famia di cas’ i siña otronan con nan por haci mescos pa di nan.—Pro. 24:3, 27.
2 Principionan Bíblico Ta un Proteccion: E secreto pa berdadero felicidad den famia ta ser hañá den aplicacion di principionan bíblico. E berdadnan poderoso aki ta beneficiá tur miembro dje famia di cas den tur aspecto di bida. E famia cu ta aplicá nan lo ta felis i lo disfrutá di pas divino.—Compará cu Isaías 32:17, 18.
3 E principionan cu por yuda nos edificá nos famia di cas ta ser describí den forma compacto den e buki nobo, E Secreto pa Felicidad den Famia. Cada capítulo ta concluí cu un cuadro di siñansa práctico cu ta enfatisá principionan cu miembronan di famia tin cu corda. Mayoria dje cuadronan aki ta cuminsá cu e pregunta, “Con e principionan bíblico aki por yuda . . . ?” Esaki ta hala atencion n’e pensamentunan di Dios di manera cu nos ta haña sa con e ta pensa tocante e tópico cu ta ser considerá.—Isa. 48:17.
4 Familiarisá bo cu e buki. Siña localisá e principionan cu por ta un yudansa ora vários problema presentá. E buki ta considerá asuntunan manera esakinan: kico bo mester busca den un persona ora bo ta pensando pa scoge un prospectivo casá (capítulo 2), cua clavenan vital ta contribuí na felicidad matrimonial duradero (capítulo 3), con mayornan por cria nan yunan tiener pa ta adultonan responsabel i temeroso di Dios (capítulo 6), con pa protehá e famia di influencianan destructivo (capítulo 8), principionan pa yuda famianan di un solo mayor pa tin éxito (capítulo 9), yudansa spiritual pa famianan afligí pa alcoholismo i violencia (capítulo 12), kico pa haci ora lasonan matrimonial ta na punto di kibra (capítulo 13), kico por haci pa onra mayornan di edad avansá (capítulo 15), i con pa sigurá un futuro duradero pa bo famia (capítulo 16).
5 Haci Pleno Uso dje Buki Nobo: Si bo no a haci esei ainda, pakico no studia e buki Felicidad den Famia huntu como un famia? Tambe, ki ora cu bo famia ta ser confrontá cu problemanan nobo of situacionnan difícil, repasá e capítulonan den e buki cu ta trata cu esakinan, i compañá pa oracion considerá con pa aplicá e conseho. Ademas, durante mart, sea generoso den programá tempu pa e ministerio di veld di manera cu bo por haci esfuerso pa laga e buki E Secreto pa Felicidad den Famia den man di mas tantu hende posibel.
6 Famianan cu ta practicá debocion piadoso lo ser fortalecé i uní spiritualmente i lo ta bon prepará pa trata cu e atakenan di Satanas. (1 Tim. 4:7, 8; 1 Ped. 5:8, 9) Ki gradicidu nos ta cu nos tin instruccion divino for dje Originador di famia!