Yudando Famianan Sigurá un Futuro Duradero
1 “Golosidad ta saludabel,” un experto di finansa a conta un klas graduando di universidad, agregando: “Bo por ta golos i tog sinti bon tocante bo mes.” Esei ta típico dje manera cu mundu ta promové interes propio como e manera pa sigurá un persona su futuro. Na contraste skerpi, Jesus a siña cu un cristian tin cu “nenga su mes . . . pasobra di ki probecho lo ta pa un hende si e gana henter e mundu pero ta perde su alma?” (Mat. 16:24-26) Pa sigurá un futuro duradero, un persona tin cu concentrá henter su bida riba hacimentu dje boluntad di Dios—e meta mas importante pa famianan djawe. (Sal. 143:10; 1 Tim. 4:8) E mensahe ei ta ser transmití den e capítulo final dje buki E Secreto pa Felicidad den Famia. E publicacion nobo aki ta yuda hende mira loke realmente ta importante den bida i con nan por actua n’e beneficio di nan famia. Segun cu nos ta sigui predicá e bon nobo tur caminda, kico nos por bisa cu lo animá hende cu nos ta topa pa lesa e buki Felicidad den Famia? Ata aki algun sugerencia:
2 Tantu na porta como riba caya, lo bo por purba usa e tratado “Disfrutá di Bida di Famia” pa cuminsá combersacionnan. Lo bo por puntra:
◼ “Cu tur e ansiedadnan cu bida moderno ta trece riba nos, bo ta kere cu ta posibel pa tin un bida di famia realmente felis? [Permití contesta.] E tratado aki ta sigurá nos cu esei ta posibel. Lo bo kier les’é?” Si e ser aceptá, lo bo por sigui dor di bisa: “Ya cu bo ta interesá den e tópico aki, kisas lo bo disfrutá tambe dje buki aki cu ta percurá conseho detayá en cuanto con pa haña felicidad den e círculo di famia.” Mustra e tabla di contenido den e buki Felicidad den Famia. Mustr’é un par di título dje capítulonan cu ta atractivo. Bai na página 10, i lesa e último frase di §17 te na fin di §18. Ofrecé e buki, i mencioná e contribucion. Splica cu bo tin mas cos di compartí, i puntra ki dia lo bo por bolbe bishit’é bek.
3 Na bo siguiente bishita lo bo por sigui riba bo combersacion inicial tocante bida di famia felis dor di bisa:
◼ “Mi kier a mustrá bo algu den e buki cu bo a haña cu mi ta pensa lo bo apreciá. E último capítulo ta enfocá riba e berdadero secreto pa felicidad den famia. [Lesa §2 na página 183.] Ripará cu traha huntu pa haci e boluntad di Dios ta e clave. Nos ta recomendá pa famianan studia Bijbel huntu pa haña sa kico ta e boluntad di Dios i con pa aplik’é den e famia di cas. Nos ta ofrecé un curso di studio di Bijbel grátis cu ta tuma solamente un par di luna pa completá. Si bo permití mi, lo mi mustrá bo con e ta ser conducí.” Bolbe bek cu e foyeto Kico Dios Ta Rekerí di Nos? of e buki Conocimentu, esun cu ta mas apropiado.
4 Ora di papia cu compañeronan di klas na scol of cu hóbennan den e teritorio, lo bo por haña un reaccion faborabel n’e pregunta aki:
◼ “Con importante ta pa mayornan i nan yunan por comunicá abiertamente cu otro? [Permití contesta.] Tuma nota di loke e manual aki pa bida di famia ta bisa tocante e tópico di ‘Comunicacion Onesto i Franco.’ [Lesa henter §4 i e promé frase di §5 na página 65 for dje buki Felicidad den Famia.] E paragrafnan cu ta sigui ta percurá sugerencianan práctico en cuanto con pa mehorá comunicacion den un famia. E buki aki ta titulá E Secreto pa Felicidad den Famia. Si bo kier les’é i ta primintí di hacié, bo por haña e copia aki pa un contribucion chikitu.” Splica cu lo bo bolbe bek despues pa haña su comentario riba loke e lesa.
5 Lo bo por sigui desaroyá bo combersacion inicial cu un hóben tocante comunicacion entre mayor i yu dor di bisa esaki:
◼ “Mi a apreciá e interes cu bo a mustra den e importancia di tin bon comunicacion den bo famia. Cua, segun bo, ta e tópico di mas importante cu mayornan i yunan mester considerá?” Permití contesta. Caba bai na página 68 den e buki Felicidad den Famia, i lesa e contesta cu ta ser hañá den e promé mitar di §11. “Teniendo un studio di Bijbel semanal ta un manera excelente pa adkerí conocimentu di Dios.” Presentá e foyeto Kico Dios Ta Rekerí di Nos? Splica cu su 16 lesnan ta percurá un descripcion básico dje mensahe di Bijbel. Lesa e introduccion na página 2, i despues considerá huntu e promé les.
6 Si bo topa un mayor den e trabou di cas-pa-cas, of kisas na un parke of na un speeltuin, lo bo por lanta interes dor di bisa:
◼ “Mi ta sigur cu lo bo ta di acuerdo cu criamentu di yu awe ta hopi difícil. Kico bo ta pensa por protehá bo famia for di influencianan insaludabel? [Permití contesta.] Ata aki algun conseho excelente cu ami a apreciá.” Relatá e ilustracion den §1 i lesa §2 na página 90 for dje buki Felicidad den Famia. Splica con e buki ta duna guia balansá cu realmente ta eficas pa protehá famianan for di influencianan destructivo. Ofrecé un copia, i haci bo mes disponibel pa contestá cualkier pregunta cu por lanta.
7 Na bo di dos bishita cerca un mayor cu a aceptá e buki “Felicidad den Famia,” lo bo por sigui e combersacion den e manera aki:
◼ “Promé biaha cu nos a topa, mi por a mira cu bo ta berdaderamente interesá den bo yunan i cu bo kier haci tur loke bo por pa protehá nan di mal influencianan. Kisas bo no a les’é ainda, pero tin un comentario masha importante den e buki cu mi a laga cu bo, cu bo mester mira. [Lesa §19 na página 59.] Pa desaroyá un relacion cu Dios nos mester yega na conoc’é mediante e páginanan di su Palabra skirbí, Bijbel. Lo bo kier pa mi mustrá bo con nos ta studia Bijbel como famia?”
8 Conseheronan mundano no por mustra famianan e caminda na felicidad i siguramente lo laga nan keda desapuntá. Laga nos duna e buki Felicidad den Famia un distribucion amplio di manera cu por yuda hende tur caminda mediante e Palabra di Dios pa sigurá un futuro duradero.—1 Tim. 6:19.