Testigonan di Jehova—Berdadero Evangelisadó
1 Jesucristo a pone e responsabilidad di evangelisá riba tur su disipelnan, mandando nan specíficamente pa predicá e bon nobo dje Reino. (Mat. 24:14; Echo. 10:42) Su disipelnan di promé a pone e patronchi den esaki ora nan a papia tocante e Reino sin stop—no solamente na lugánan di adoracion, sino tambe unda cu nan a topa hende den lúganan público i ora nan a bai di cas pa cas. (Echo. 5:42; 20:20) Como Testigo di Jehova awe, nos a duna prueba di ta berdadero evangelisadó cristian, predicando e mensahe di Reino den 232 pais i bautisando mas cu un miyon disipel nobo den solamente e último tres añanan! Di con nos trabou di evangelisá tabatin asina tantu éxito?
2 E Bon Nobo Ta Excitá Nos: Evangelisadónan ta predicadó, of mensaheronan, di bon nobo. Como tal, nos tin e privilegio excitante di anunciá e Reino di Jehova—e único berdadero bon nobo cu por ofrecé na humanidad afligí. Nos ta entusiasmá di sa for di awor caba di un shelu nobo cu den husticia lo goberná un tera nobo cu lo consistí di hende fiel den e binidero Paradijs. (2 Ped. 3:13, 17) Nos ta e úniconan cu a aceptá e speransa aki, i nos ta ansioso pa compartié cu otronan.
3 Amor Berdadero Ta Motivá Nos: Evangelisá ta un trabou cu ta salba bida. (Rom. 1:16) Ta p’esei nos ta experenciá hopi goso den plama e mensahe di Reino. Como berdadero evangelisadó, nos stima hende, i esei ta motivá nos pa compartí e bon nobo cu nan—nos famia, bisiña, conocí, i hopi otro hende mas. Un dje mihó maneranan den cua nos por expresá nos berdadero amor pa otronan ta dor di haci e trabou aki di henter alma.—1 Tes. 2:8.
4 E Spiritu di Dios Ta Apoyá Nos: E Palabra di Dios ta sigurá nos cu ora nos haci nos trabou di planta i muha e simia di Reino, Jehova ta esun cu “ta hacié crece.” Esei ta exactamente loke nos ta mira ta tuma lugá den nos organisacion awe. (1 Cor. 3:5-7) Ta e spiritu di Dios ta apoyá nos den nos actividad di evangelisá i ta duna nos gran éxito.—Joël 2:28, 29.
5 En bista dje animacion na 2 Timoteo 4:5 pa “haci e trabou di un evangelisadó,” i debí na nos amor pa tur hende, laga nos ta motivá pa compartí e excitante bon nobo di Reino na tur oportunidad, teniendo e siguridad cu Jehova lo sigui bendicioná nos trabou.