Extendé un Invitacion na Tur Hende Cu Tin Sed
1 Manera profeta Amos a predicí, e famia humano awe ta sufriendo di “sed, no di awa, sino pa tende e palabranan di Jehova.” (Amos 8:11) Pa yuda hende den e condicion aki di sed spiritual, nos ta conta nan tocante e percuracionnan di Dios pa libra hende obediente for di picá i morto, cua ta ser describí den e último capítulo di Revelacion como “un riu di awa di bida.” Nos tin e privilegio di extendé na tur hende cu tin sed pa husticia un invitacion pa “tuma e awa di bida grátis.” (Rev. 22:1, 17) Con nos por haci esaki durante februari? Dor di ofrecé e buki Revelacion—su gran culminacion ta cerca! na esnan interesá. Kisas bo kier purba e presentacionnan aki:
2 Siendo cu hopi hende ta preocupá cu asuntunan di salú, lo bo por haña e introduccion aki eficas:
◼ “Hopi hende ta preocupá cu e aumento den costo di cuido di salú di calidad. Kisas bo a pensa un poco riba e asuntu aki. [Permití contesta.] Tin un solucion permanente pa e problema aki? [Warda riba un contesta.] Ata aki un prospecto maraviyoso.” Lesa Revelacion 22:1, 2. Anto habri e buki Revelacion su culminacion na e plachi na página 308-9, i usa §22 na página 311 pa splik’é. Concluí dor di bisa: “E publicacion aki ta splica tur versículo den Revelacion.” Si e doño di cas mustra interes, ofrecé e buki i mencioná e contribucion p’e. Haci areglo pa bolbe.
3 Ora di haci e rebishita, lo bo por reanudá bo consideracion dor di bisa:
◼ “Ultimo biaha cu mi tabata aki, nos a papia tocante un solucion permanente pa problemanan di salú. Bo ta kere cu un dia lo yega ora cu ningun hende lo ta malu? [Permití contesta.] Tuma nota dje declaracion sorprendente aki.” Lesa Isaías 33:24. Anto bai na les 5 den e foyeto Rekerí, i considerá §5-6, haciendo e preguntanan corespondiente na comienso dje les i busca un par dje textonan citá. Mencioná cu eliminacion di malesa i morto ta parti dje cumplimentu di Dios su propósito original pa e tera. Haci areglo pa bolbe bek pa considerá §1-4 i 7 dje mésun les.
4 Si tur hende ta pensando riba un noticia actual cu ta trata di un morto trágico, lo bo por purba e introduccion aki:
◼ “Por ta bo a tende di [mencioná e noticia]. Ora bida ser cortá trágicamente asina, hopi hende ta puntra nan mes ki consuelo por duna famia dje víctimanan. Kico abo ta pensa?” Permití contesta. Anto habri e buki Revelacion su culminacion na página 299, i mustra e esena di resureccion cu tin pintá. Sigui dor di bisa: “Hopi hende ta keda sorprendí ora nan haña sa cu tantu hende hustu como inhustu lo resucitá den Paradijs riba tera. [Lesa Echonan 24:15 manera e ta citá den §9 na página 297, anto duna e splicacion hañá den §10.] E buki aki ta considerá hopi otro detaye interesante tocante e propósito di Dios pa futuro. Si bo kier siña mas tocante esei, bo por haña e ehemplar aki.” Haci areglo pa bolbe, anotando e interes i preocupacionnan specífico dje persona.
5 Ora bo bolbe, adaptá bo presentacion na e doño di cas. Kisas lo bo por bisa:
◼ “Ultimo biaha cu nos a papia, mi a apreciá un comentario cu bo a haci tocante e propósito di Dios pa e tera. [Ripití e comentario.] Mi a haña algun informacion cu mi ta pensa lo bo haña interesante.” Habri e foyeto Rekerí na les 5. Lesa i considerá mas tantu paragraf posibel den e les, tanten cu e doño di cas ta mustra interes. Despues di palabrá un ora pa bolbe bek pa sigui e les, bisa e doño di cas dje dia i oranan di reunion dje congregacion. Splica tocante e Reunion Público, i invit’é pa asistí.
6 Si bo ta preferá un presentacion simpel cu un tratado, lo bo por bisa esaki:
◼ “Mi kier pa bo ricibí e tratado aki titulá Ki speranza tin pa stimánan cu a fayece?” Entregu’é n’e doño di cas, i invit’é pa siguí bo segun bo ta lesa e promé paragraf. Permitié contestá e pregunta cu e último frase ta haci. Lesa e di dos paragraf, i despues habri e buki Revelacion su culminacion n’e plachi na página 299. Sigui dor di bisa: “E buki aki ta duna mas detaye tocante resureccion i e otro promesanan maraviyoso cu Bijbel ta mencioná pa futuro.” Bisa e doño di cas cu e por haña un ehemplar pa solamente un contribucion chikitu, i haci areglo pa un rebishita.
7 E echo cu nos ta extendé un invitacion atractivo na otronan por pone nan bini n’e awa di bida, cu Jehova ta haci disponibel awor. P’esei, laga nos bisa na tur hende cu tin sed: “Bin!”—Rev. 22:17.