Implantá den Otronan e Speransa di Bida Eterno
1 Aunke hende a busca maneranan pa tarda e proceso di bira bieu i extendé su duracion di bida, behes i morto ainda ta inevitabel. Ki gradicidu nos ta cu Bijbel ta splica pakico hende ta bira bieu i muri, i tambe con lo anulá e dañonan causá pa behes i eliminá morto. E buki Conocimentu cu Ta Hiba na Bida Eterno ta presentá e berdadnan aki convincentemente. E ta contestá bon cla preguntanan confundidor tocante bida i morto, dirigiendo e lector n’e tempu cu Paradijs lo ta restorá.
2 Durante mart nos lo ofrecé e buki Conocimentu cu e meta di cuminsá studio di Bijbel. (Mat. 28:19, 20) Anto nos lo rebishitá tur esnan cu mustra interes den e mensahe di Reino. Den e manera aki nos por implantá den otro hende e speransa di bida eterno. (Tito 1:2) Pa logra esaki, kisas bo ta haña e siguiente sugerencianan útil.
3 Na e bishita inicial, lo bo por haci e pregunta aki:
◼ “Bo a yega di puntra bo mes pakico hende ta anhelá un bida mas largu? [Permití contesta.] Budista, cristian, hindú, moslim i otronan tur tin speransa di un bida despues di morto.” Habri e buki Conocimentu na capítulo 6, “Pakico Nos Ta Bira Bieu i Muri?” i lesa §3. Razoná riba e textonan citá. Referí na e dos preguntanan na fin dje paragraf, anto puntra e doño di cas si lo e kier mira e contestanan pa su mes. Si e kier esei, sigui considerá e siguiente par di paragrafnan. Bo a cuminsá un studio! Si no, laga e buki cuné p’e lesa, i haci areglo pa bolbe, preferiblemente den un of dos dia, pa considerá e contestanan.
4 Ora di haci rebishita caminda bo a laga e buki “Conocimentu,” lo bo por bisa:
◼ “Mi a bolbe bek pa considerá e dos preguntanan tocante morto cu nos a laga pendiente.” Recordá e doño di cas cua tabata e preguntanan. Anto considerá e informacion den capítulo 6 bou dje subtema “Un Complot Malicioso.” Dependiendo dje circunstancia, sigui e studio of usa e último pregunta na fin di §7 pa pone base p’e siguiente sesion. Haci areglo definitivo pa bolbe bek. Bisa e doño di cas e dianan i oranan di reunionnan di congregacion i splik’é brevemente con nos reunionnan ta bai. Invit’é calurosamente pa asistí.
5 Sea den e trabou di cas-pa-cas of ora di duna testimonio informal, lo bo por cuminsá un combersacion dor di bisa:
◼ “Bo a yega di puntra bo mes kico tin den futuro pa nos i pa e tera? [Permití contesta.] Bijbel ta resumí e futuro den un solo palabra: Paradijs! E ta splica cu na principio, Dios a haci un parti dje tera un paradijs bunita, caminda el a pone e pareha humano cu el a crea. Nan mester a pobla henter e tera, transformand’e gradualmente den un paradijs. Tuma nota dje descripcion aki con bida den e paradijs ei lo mester tabata.” Habri e buki Conocimentu na página 8, i lesa §9, bou dje subtema “Bida den Paradijs.” Anto considerá e puntonan den §10, i lesa e texto citá, Isaías 55:10, 11. Ofrecé pa sigui considerá con bida den e Paradijs restorá lo ta i pa abarcá §11-16 huntu. Of animá e persona pa lesa nan riba su mes, i traha un afsprak pa topa atrobe i considerá nan.
6 Si bo no a establecé un studio n’e promé bishita, lo bo por purba hacié n’e rebishita dor di bisa:
◼ “Manera nos a papia den nos último combersacion, ta Dios su propósito pa henter e tera ser transformá den un paradijs. Esei ta lanta e pregunta: Con Paradijs lo ta?” Habri e buki Conocimentu na capítulo 1, i studia §11-16, bou dje subtema “Bida den e Paradijs Restorá.” Despues di esei mustra e plachi na página 4-5, i puntra e persona si lo e kier biba den un ambiente bunita asina. Anto lesa e promé frase di §17 na página 10. Dependiendo dje circunstancia, continuá e studio of bisa cu na bo siguiente bishita lo bo splica loke ta ser rekerí pa un persona por biba den e Paradijs restorá. Splica e persona e orario di reunion, i invit’é calurosamente pa asistí na Salon di Reino.
7 E buki Conocimentu ta un herment excelente pa usa den revelá na otronan “e bida eterno” cu Dios a primintí. Dor di conducí studio di Bijbel cu hende bo por implantá den nan e speransa magnífico aki cu ta inspirá dor dje Dios “cu no por gaña.”