Nos Ta Bai Hacié Atrobe?—Un Yamada Mas pa Pioneronan Auxiliar
1 Ta kico nos ta bai haci atrobe? Nos lo traha pionero auxiliar durante e temporada di Memorial? E suplemento di Nos Ministerio di Reino di februari 1997 a capta nos atencion cu e título na letter diki: “Ta Busca—400 Pionero Auxiliar.” Nos tabatin sigur cu boso lo a tuma e yamada ei na serio. Ora nos a compilá e raport p’e tres lunanan tabata un placer pa haña sa cu 561 ruman a inscribí como pionero auxiliar! Nos ta bai hacié atrobe e temporada aki di Memorial?
2 Nos ta encomendá calurosamente tur cu a haci e esfuerso extra pa aumentá nan actividad di sirbishi di veld aña pasa durante e periodo di mart pa mei. Ta bisto cu boso tur a ser motivá dor di amor inegoista pa Jehova Dios i pa boso próhimo. (Luc. 10:27; 2 Ped. 1:5-8) Publicadónan den vários circunstancia di bida a traha lugá pa sirbi como pionero auxiliar. Den un congregacion na Merca, 51 publicadó a traha huntu den e mésun luna, incluyendo mayoria dje ancianonan, un mama cu un yu muher di 15 luna bieu, un ruman muher cu a kita for di su trabou i a haña trabou part-time cu a haci posibel p’e traha pionero, i un ruman muher di edad cu nunca promé a traha pionero. E superintendente di circuito a skirbi: “Un esfuerso tremendo den e trabou di predicá ta tumando lugá. . . . Esaki no solamente tin un impacto riba e teritorio, pero tambe e congregacionnan ta brota cu entusiasmo. Rumannan ta disfrutá di conocé otro mas mihó i tambe di mira resultadonan excelente den e ministerio.”
3 Hóbennan no a keda afó aña pasá. Un publicadó no-bautisá di 13 aña di edad tabata ansioso p’e dia yega cu e por a simbolisá su dedicacion na Jehova. Despues cu el a bautisá na februari, el a skirbi tocante su deseo pa traha pionero auxiliar na mart: “Awor cu no tin nada ta strobá mi, mi a entregá mi papel di solicitud mesora. . . . E hopi experencianan maraviyoso cu nos a disfrutá di dje nunca lo a bira un realidad si no tabata pa boso invitacion amoroso pa traha pionero. Mi ta gradicidu na Jehova di por tabatin e privilegio di ta entre e 100.000 [na Merca] cu a respondé.” El a pone e meta pa hacié atrobe.
4 Kisas abo tabata entre e 257 publicadónan cu a participá den e actividad di pionero auxiliar na mart aña pasá, of e 191 na april, of e 113 na mei. Lo bo hacié atrobe e aña aki? Si bo no por a traha pionero aña pasá, bo por hacié e aña aki sí? Nos lo por surpasá e cantidad di 561 dje periodo di mart pa mei di aña pasá? Esei tabata e cantidad mas grandi di pionero auxiliar den tres luna bou dje sucursal di Curaçao.
5 Concentrá Riba April i Mei: E aña aki, Memorial ta cai riba diasabra, 11 di april, haciendo april un excelente luna pa mas actividad den e ministerio. (2 Cor. 5:14, 15) Durante e promé 11 dianan dje luna, nos lo duna atencion na invitá mas tantu persona interesá posibel pa asistí na Memorial. Si bo tin plan di traha pionero auxiliar, por fabor, entregá bo papel di solicitud basta tempu promé cu e fecha cu bo ta deseá di cuminsá.—1 Cor. 14:40.
6 Como cu mei tin cincu fin di siman completo, publicadónan cu ta bai scol of cu tin un trabou seglar full-time, por haña cu ta mas fácil pa traha pionero auxiliar e luna ei. Dor di programá dies ora den sirbishi di veld cada un dje cincu fin di simannan, lo bo tin cu programá solamente dies ora mas den henter e luna pa alcansá e 60 ora rekerí.
7 Durante tantu april como mei, nos oferta di literatura lo ta abonament riba E Toren di Vigilancia i Spierta! Esaki mester animá asta mas di nos pa haci un esfuerso extra i traha pionero. Di con nos ta bisa esei? E revistanan ta fácil pa presentá i ta dushi pa traha cu nan den e ministerio. Por usa nan bon den tur rasgo di sirbishi—di cas-pa-cas i den trabou di negoshi-pa-negoshi, i tambe ora nos ta acercá hende riba caya, den lugánan di parkeer, i den parkenan i otro marconan di circunstancia informal. Mas importante ainda, E Toren di Vigilancia i Spierta! ta apoyá berdadnan di Reino. Nan ta hala atencion n’e cumplimentu di profecia bíblico, dunando prueba cu e Reino di Dios ta gobernando. Tambe nan ta afectá bida dje lectornan dor di trata comprensivamente cu e berdadero necesidadnan di hende. Si nos corda con e revistanan precioso aki a toca nos bida, nos lo ta motivá pa tuma parti den duna nan distribucion mas amplio posibel durante april i mei.
8 Como preparacion p’e actividad mas intensivo aki cu revista, lo bo saca beneficio dor di repasá e artículonan aki: “E Toren di Vigilancia i ¡Despertad!—Revista Oportuno di e Berdad” (Toren di Vigilancia, 1 di januari, 1994), “Haci e Mihó Uso di Nos Revistanan” (Nos Ministerio di Reino, september 1995) i “Prepará Bo Propio Presentacion di Revista” (Nos Ministerio di Reino, october 1996).
9 Ancianonan Ta Hiba Delantera: Pa acomodá e hopi publicadónan cu a traha pionero aña pasá, e ancianonan den un congregacion a promové un diasabra den e luna como un dia special di actividad di sirbishi pa henter e congregacion. Nan a haci areglo pa reuní na diferente ora durante e dia, dunando tur ruman den e congregacion un oportunidad pa participá den vários forma di testificá. Esakinan a incluí traha teritorio di negoshi, testificá riba caya, yama di cas pa cas, haci rebishita, skirbi carta i testificá via telefon. E reaccion tabata sobresaliente: 117 publicadó a participá den sirbishi di veld durante transcurso dje dia. Nan a traha un total di 521 ora den e ministerio i a laga 617 revista, foyeto i buki! E entusiasmo dje diasabra ei a pasa over pa diadomingo, cu tabatin un asistencia casi récord n’e Reunion Público i Studio di Toren di Vigilancia.
10 Na cada Reunion di Sirbishi durante april i mei, mester recordá e congregacion ki ora i na unda lo tene reunionnan pa sirbishi di veld durante e siman binidero, specialmente si a haci algun areglo adicional fuera di esnan programá normalmente. Nos ta animá pioneronan regular i tambe publicadónan cu no ta pionero auxiliar pa apoyá e areglonan aki di grupo segun nan circunstancia ta permití.
11 E superintendente di sirbishi lo tin cu reuní cu e ruman encargá cu teritorio pa haci areglo pa traha e teritorionan cu no ta ser cubrí cu frecuencia. Por duna mas atencion na e no-na-casnan i na testificá riba caya i di negoshi pa negoshi. Por enfatisá testificacion djanochi, specialmente ora cu ta bira scur mas lat. Mester haci pedido pa suficiente revista tantu pa april como mei den anticipacion di mas actividad.
12 Hopi Publicadó Por Cualificá: E promé frase riba e papel di solicitud pa sirbishi di pionero auxiliar ta declará: “Debí na mi amor pa Jehova i mi deseo pa yuda otronan siña tocante dje i su propósitonan amoroso, lo mi kier a aumentá mi participacion den e sirbishi di veld dor di inscribí mi mes como un pionero auxiliar.” Amor pa Jehova i deseo di yuda otro hende spiritualmente ta e base di nos dedicacion. (1 Tim. 4:8, 10) Pa cualificá pa traha pionero auxiliar, bo mester ta bautisá, den bon condicion moral, i den posicion pa dedicá 60 ora n’e ministerio durante e luna. Considerando nos circunstancianan, algun di nos cu nunca a traha pionero promé, lo por hacié e aña aki na april of mei?
13 Hopi ruman den e congregacion kisas ta realisá cu nan tambe lo por traha pionero ora nan mira otronan, cu tin circunstancia parecido na di nan, inscribí. Muchanan di scol, rumannan di mas edad, rumannan cu trabou seglar full-time, incluso anciano i sirbidónan ministerial, i tambe otro rumannan a traha pionero auxiliar cu éxito. Un ama di cas i mama di dos yu cu un trabou full-time a yega 60 ora, a laga 108 revista i a cuminsá 3 studio bíblico den un luna trahando pionero auxiliar. Con el a logr’é? El a usa su pausa di merdia na trabou pa testificá den un teritorio cerca, el a testificá skirbiendo carta i a participá den testificacion den lugá di parkeer i riba caya. Tambe tur siman el a usa su dia liber di trabou bon dor di sali cu e congregacion den sirbishi di veld. Aunke na promé instante el a pensa cu traha pionero auxiliar tabata un meta inalcansabel, cu animacion di otro rumannan i un programa práctico, el a surpasá e obstáculonan.
14 Jesus a sigurá su disipelnan: ‘Mi yugo ta suave i mi carga ta lihe.’ (Mat. 11:30) Esei tabata e título di un artículo animante den E Toren di Vigilancia di 15 di augustus, 1995. E ta conta tocante un ruman muher cu tabatin un trabou seglar full-time hopi exigente. El a pensa cu traha pionero auxiliar definitivamente no tabata algu p’e? No. De facto, el a logra traha pionero auxiliar tur luna. Pakico? Pasobra el a sinti cu traha pionero en realidad a yud’é mantené su balansa. Yudando hende segun nan a siña e berdad di Bijbel i mira nan cambia nan bida pa gana Dios su aprobacion tabata e mayor fuente di goso den su bida hopi ocupá.—Pro. 10:22.
15 Cualkier sacrificio personal i ahuste cu un hende tin cu haci pa por traha pionero ta ser compensá sobreabundantemente dor dje bendicionnan cu e ta haña. Un ruman muher a skirbi di su experencia trahando pionero auxiliar: “Esei a yudá mi kita mi mente for di mi mes i enfocá mas riba yuda otronan. . . . Mi ta recomend’é na esnan cu por hacié.”
16 Un Bon Programa Ta Necesario: N’e último página dje suplemento aki, nos a copia e muestra di programanan cu a aparecé den Nos Ministerio di Reino di februari 1997. Kisas un di nan ta pas cu bo circunstancia. Segun bo ta repasá nan, pensa riba bo rutina normal di actividad mensual. Ki proyectonan na cas bo por haci promé cu bo traha pionero of por pone un banda temporalmente te despues di traha pionero? Bo por eliminá algun dje tempu cu bo ta dedicá na entretenimentu, recreo of otro actividad di tempu liber? En bes di mira n’e total di 60 ora cu tin mester, planea bo programa riba un base diario of semanal. Tin mester di solamente 2 ora pa dia of 15 ora pa siman pa traha pionero auxiliar. Analisá e muestranan di programa, i cu potlot den man, wak kico bo por hinca den otro pa loke ta un programa personal pa sirbishi cu ta pas mihó pa bo i bo famia.
17 E excelente reaccion i extra apoyo cu e congregacion a mustra p’e ministerio aña pasá a aumentá e entusiasmo di un pionero regular cu a skirbi: “Masha masha danki pa boso animacion amoroso p’e rumannan haci un extra esfuerso pa apoyá e trabou di pionero auxiliar. . . . E programanan cu boso a sugerí a yuda hopi ruman cu nunca promé a traha pionero mira cu nan por hacié. . . . Mi ta asina contentu di ta parti di Jehova su organisacion i di sigui e guia amoroso dje esclabo fiel i discreto.”
18 Proverbionan 21:5 ta sigurá nos: “E plannan di esun diligente ta resultá sigur den bentaha.” Proverbionan 16:3 ta animá nos: “Haci bo obranan lora riba Jehova mes i bo plannan lo ta firmemente establecí.” Sí, si nos incluí Jehova via oracion den nos decision i dependé firmemente riba dje pa yuda nos tin éxito, nos por ta optimista tocante nos plannan pa traha pionero auxiliar. Por ta masha bon cu despues di mira con bon nos programa ta funcioná pa un of dos luna di traha pionero auxiliar, nos lo por marca e hoki riba e papel di solicitud pa sirbishi di pionero auxiliar cu ta bisa: “Pone un marca den e cuadro aki si bo ta deseá di sirbi continuamente como pionero auxiliar te otro aviso.” Di tur manera, nos por planea pa traha pionero auxiliar atrobe den augustus, ora lo tin cincu fin di siman completo. Segun nos ta cera e aña di sirbishi na augustus, lo haci un esfuerso uní pa tur hende participá mas plenamente posibel den e ministerio.
19 Jesus a profetisá: “Esun cu ta ehercé fe den mi, esun ei tambe lo haci e obranan cu mi ta haci; i lo haci obranan mayor cu esakinan.” (Juan 14:12) Ta nos privilegio gososo di sirbi como Dios su compañeronan di trabou awor cu e profecia aki tin su magnífico cumplimentu. Awor ta e momento pa predicá e bon nobo cu mas intensidad cu nunca, cumprando e tempu oportuno pa haci e trabou aki. (1 Cor. 3:9; Col. 4:5) Un manera excelente pa haci nos parti como proclamadó di Reino ta di participá mas tantu biaha posibel den e sirbishi di pionero auxiliar. Nos ta spera ansiosamente pa mira con fuerte e cantica di alabansa di parti dje pioneronan auxiliar lo ta e temporada aki di Memorial. (Sal. 27:6) Pensando riba e resultadonan di aña pasá, nos ta puntra nos mes: ‘Nos ta bai hacié atrobe?’ Nos tin sigur cu sí!
[Box on page 3]
Bo Por Traha Pionero Auxiliar?
“Sea cual sea bo circunstancianan personal, si bo ta bautisá, den bon condicion moral, por planea pa yena e rekisito di dedicá 60 ora pa luna den e ministerio di veld i bo ta kere cu bo por sirbi un of mas luna como pionero auxiliar, e ancianonan dje congregacion gustosamente lo considerá bo aplicacion p’e privilegio di sirbishi aki.”—Organisá pa Cumpli cu Nos Ministerio, página 113-4.
[Box on page 6]
Orarionan pa Pionero Auxiliar
Muestra di Maneranan pa Programá 15 Ora di Sirbishi di Veld pa Siman
Maintanan—Dialuna te cu Diasabra
Por cambia diadomingo pa cualkier otro dia
Dia Periodo Ora
Dialuna Mainta 2 1⁄2
Diamars Mainta 2 1⁄2
Diarason Mainta 2 1⁄2
Diahuebs Mainta 2 1⁄2
Diabierne Mainta 2 1⁄2
Diasabra Mainta 2 1⁄2
Total di Ora: 15
Dos Dia Henter
Por scoge cualkier dos dia di siman
Dia Periodo Ora
Diarason Henter Dia 7 1⁄2
Diasabra Henter Dia 7 1⁄2
Total di Ora: 15
Dos Anochi i e Fin di Siman
Por selectá cualkier dos anochi den siman
Dia Periodo Ora
Dialuna Anochi 1 1⁄2
Diarason Anochi 1 1⁄2
Diasabra Henter Dia 8
Diadomingo Mitar Dia 4
Total di Ora: 15
Dianan den Siman Atardi i Diasabra
Por cambia diadomingo pa cualkier otro dia
Dia Periodo Ora
Dialuna Atardi 2
Diamars Atardi 2
Diarason Atardi 2
Diahuebs Atardi 2
Diabierne Atardi 2
Diasabra Henter Dia 5
Total di Ora: 15
Mi Orario Personal pa Sirbishi
Dicidí riba e cantidad di ora pa cada periodo
Dia Periodo Ora
Dialuna
Diamars
Diarason
Diahuebs
Diabierne
Diasabra
Diadomingo
Total di Ora: 15