Ta Busca—400 Pionero Auxiliar
Bo Por Traha Como Pionero Auxiliar na Mart? April? Mei?
1 “Ta Busca 1.000 Predicador” tabata e título di un artículo publicá den e edicion di april 1881 di e Watch Tower. E artículo a contené un apelacion na tur hende homber i hende muher dedicá, “na ken Señor a encargá un conocimentu di Su berdad,” pa usa cualkier tempu cu nan tabatin pa plama berdad bíblico. Esnan cu por a duna mitar of mas di nan tempu exclusivamente na e trabou di Señor a ser animá pa ofrecé nan mes boluntariamente como evangelisadornan colporteur—e predecesornan dje pioneronan djawe.
2 Aunke tempu a cambia desde e añanan 1800, un echo ta keda mescos—e sirbidornan dedicá di Dios kier sigui usa mas tantu tempu cu ta posibel den plama e bon nobo. Sirbiendo como pionero auxiliar ta haci posibel pa publicadornan di congregacion mehorá nan eficacia segun cu nan ta dedicá extra tempu den e ministerio di Reino.—Col. 4:17; 2 Tim. 4:5.
3 Desde su comienso, cientos di miles di rumannan homber i muher a disfrutá di traha como pionero auxiliar. Entusiasmo pa e rasgo aki dje ministerio di pionero a crece te n’e grado cu a alcansá un máximo di mas cu 230 pionero auxiliar den e teritorio dje sucursal di Curaçao na april 1996! Siguramente e potencial t’ei pa ripití e esfuerso excelente aki durante primavera di 1997.
4 Nos ta animá boso pa pone e meta di traha pionero auxiliar durante un of mas dje lunanan di mart, april i mei. Pakico incluí mart? Pasobra e aña aki e Memorial dje morto di Cristo ta cai riba diadomingo, 23 di mart. No tin un manera mas mihó pa usa e simannan promé cu Memorial cu no ta dor di participá celosamente den e trabou di predicacion di Reino cu nos Señor i Salbador, Jesucristo, a instituí. Segun cu nos ta duna un testimonio grandi na mart, nos por invitá hopi persona interesá pa djoin nos den e conmemoracion di Cristo su morto. Tambe mart lo ta special dor cu, pa promé biaha, nos lo presentá e buki nobo, E Secreto pa Felicidad den Famia. Ademas, e luna di mart ta contené cincu diasabra i cincu diadomingo, loke ta permití actividad intensivo di sirbishi di veld den fin di siman. Naturalmente, durante e lunanan di april cu mei, un esfuerso celoso continuo den e ministerio lo permití nos rebishitá esnan cu a mustra interes i cuminsá studionan nobo di Bijbel, usando e foyeto Kico Dios Ta Rekerí di Nos? Tambe nos lo cubri nos teritorio cabalmente, particularmente den finnan di siman, cu e edicionnan actual i oportuno di E Toren di Vigilancia i Spierta!
5 Ken Ta Cualificá pa Traha Como Pionero Auxiliar?: Organisá pa Cumpli cu Nos Ministerio, página 113, ta splica: “Sea cual sea bo circunstancianan personal, si bo ta bautisá, den bon condicion moral, por planea pa yena e rekisito di dedicá 60 ora pa luna den e ministerio di veld i bo ta kere cu bo por sirbi un of mas luna como pionero auxiliar, e ancianonan dje congregacion gustosamente lo considerá bo aplicacion p’e privilegio di sirbishi aki.” Bo por traha lugá p’e privilegio aki na mart? april? mei?
6 Un actitud positivo di parti di cuerponan di anciano huntu cu e apoyo di henter curason dje resto di publicadornan mester haci e reaccion n’e yamada aki pa 400 pionero auxiliar un éxito rotundo. (Heb. 13:7) Tur cabes di famia ta ser animá pa averiguá cuantu persona di nan cas por djoin e fila di pioneronan auxiliar durante un of mas dje lunanan binidero.—Sal. 148:12, 13; compará cu Echonan 21:8, 9.
7 No sea lihé pa concluí cu sirbishi di pionero auxiliar ta fuera di bo alcanse debí na bo trabou seglar ‘full-time,’ orario di scol, responsabilidadnan di famia of otro obligacionnan bíblico. Pa algun publicador kisas lo no ta fácil pa participá; no obstante, cu bon organisacion i e bendicion di Jehova, nan por tin éxito. (Sal. 37:5; Pro. 16:3) Laga e deseo pa participá den e sirbishi di pionero controlá bo circunstancianan; no laga bo circunstancianan controlá bo deseo di traha pionero. (Pro. 13:19a) Pues, cu un amor fuerte pa Jehova i pa próhimo, ta posibel pa hopi ruman ahustá nan rutina semanal di bida pa asina cada tantu tempu expandé nan ministerio pa un luna. (Luc. 10:27, 28) Tin hopi bendicion ta spera esnan cu ta haci esfuerso vigoroso den e sirbishi di Reino.—1 Tim. 4:10.
8 Loke Traha Como Pionero Auxiliar Ta Logra: E esfuerso di henter alma cu miles di sirbidornan di Dios ta haci pa traha como pionero auxiliar ta resultá den un gran gritu di alabansa na Jehova. Segun cu e proclamadornan aki di Reino ta haci esfuerso pa plama e bon nobo na mas hende, nan personalmente ta hala mas cerca di Jehova pasobra nan ta siña dependé mas riba dje pa su spiritu i bendicion.
9 Teniendo pioneronan auxiliar, regular i special activo meimei di nos ta producí un spiritu refrescante di vitalidad den e congregacion. Nan entusiasmo ta contagioso segun cu nan ta papia tocante nan experencianan den veld. Esaki ta motivá otronan pa reevaluá nan propio prioridadnan i potencial pa tin un participacion mas grandi den e trabou sumamente importante dje ministerio. Un ruman muher kende a bautisá na e edad di 70 aña mesora a cuminsá traha como pionero auxiliar riba un base continuo. Ora nan a puntr’é algun aña despues pakico, na su edad, ainda e tabata haciendo asina tantu esfuerso den e ministerio como un pionero auxiliar tur luna, el a bisa cu e tabata sinti como si fuera e promé 70 añanan di su bida a ser malgastá, i e no kier a malgastá ningun di su añanan di bida cu a resta!
10 Cada participante den e trabou di pionero auxiliar ta desaroyá un mihó abilidad den e ministerio. Un Testigo hóben a admití: ‘Durante mi infancia mi tabatin custumber di compañá mi mayornan den nan actividad di predicá. Sirbishi di veld di berdad tabata leuk. Sin embargo, cu tempu, mi a realisá cu na scol mi a resaltá como diferente dje otro alumnonan. E ora ei mi a cuminsá sintí mi incómodo pa papia cu otro alumnonan tocante e berdad. Ora di predicá di cas pa cas, e idea di topa un hende cu mi a conocé di scol a cuminsá duná mi miedu. Den mi caso mi ta kere cu e problema tabata temor di hende. [Pro. 29:25] Despues di a caba scol, mi a dicidí di purba traha pionero riba un base temporal. E resultado tabata cu predicamentu a atraé mi manera nunca promé. Ya mi no tabata mir’é mas como un actividad pa pasa leuk, ni e no tabata un carga pisá. Ora mi a mira mi studiantenan di Bijbel progresá den e berdad, mi a disfrutá di un sintimentu di profundo satisfaccion p’e evidencia cu Jehova Dios tabata apoyando mi esfuersonan.’ E hóben aki despues a bai na sirbi como pionero regular.
11 Desde un punto di bista práctico, ora hopi ruman ta sirbi como pionero auxiliar den e congregacion, e resultado ta cu e teritorio ta ser cubrí cabalmente. E ruman cu ta encargá cu asigná teritorio por pidi e pioneronan auxiliar pa nan yudansa den cubri e seccionnan masha poco trahá. Hibando almuerso huntu cu nan i dedicando henter un dia den sirbishi lo haci posibel pa e pioneronan auxiliar traha asta e skinanan leu dje teritorio.
12 Ancianonan Tin cu Haci Preparacionnan di Antemano: Durante e siguiente tres lunanan, mester haci areglonan pa programá diferente clase di actividad di testificá na vários ora di siman, incluyendo atardi lat i trempan den anochi, di manera cu mas tantu publicador posibel por tuma parti. Ademas dje trabou regular di cas-pa-cas, incluí oranan pa testificacion riba caya, pa traha teritorio di negoshi i pa bishitá e no-na-casnan. Dor di haci e preparacionnan aki di antemano, ancianonan ta yuda esnan cu ta traha pionero pa participá den sirbishi cu e congregacion na un ora cu lo ta mas práctico i cumbiniente pa e pioneronan. E congregacion mester ta bon informá tocante tur e areglonan di sirbishi di veld. Mester manehá reunionnan pa sirbishi di veld den un manera bon organisá. Ademas, mester haci teritorio adecuá disponibel i mester entregá pedido unbes pa un cantidad amplio di revista i otro artículonan di literatura.
13 Planea Bo Orario Personal pa Sirbishi: Un ruman homber, kende na promé instante tabatin un poco miedu di traha como pionero auxiliar, a bisa: “Realmente, e ta hopi mas fácil di loke mi a pensa. Unico cos cu bo mester, ta un bon orario.” Riba e último página dje suplemento aki, bo ta mira un muestra di un orario pa pionero auxiliar cu lo ta práctico pa bo? Diescincu ora pa siman den e ministerio ta tur e tempu cu ta ser rekerí di pioneronan auxiliar.
14 Afin di sirbi como pionero auxiliar, amanan di cas i rumannan cu ta traha e warda di 4 pa 12 hopi bes por programá nan maintanan pa sirbishi di veld. Muchanan di scol i esnan cu ta traha e warda di 12 pa 8 generalmente por dedicá atardi lat n’e trabou di predicá. Esnan cu ta traha full-time a ripará cu ta posibel pa sea tuma un dia liber pa siman of pa dedicá finnan di siman completo na e ministerio, ademas di bai predicá parti anochi. Hopi di esnan kende nan sirbishi di veld ta mayor parti limitá na actividad den fin di siman ta scoge lunanan cu tin cincu fin di siman completo. E aña aki, esei ta e caso di mart i tambe augustus i november. Usando e orario bashí na página 6 cu ta ser percurá como un guia, pensa cuidadosamente i cu oracion riba loke lo ta pa bo personalmente un programa di sirbishi práctico segun bo situacion individual.
15 Un bentaha dje percuracion di traha pionero auxiliar ta su flexibilidad. Bo por scoge e lunanan cu abo kier traha pionero, i bo por sirbi cuantu biaha cu bo ta deseá. Si bo lo kier traha como pionero auxiliar riba un base continuo pero no por haci esei, bo a pensa riba trah’é cada salta un luna atrabes dje aña? Na otro un banda, ta posibel pa algun ruman sirbi continuamente como pionero auxiliar pa periodonan largu di tempu.
16 ‘Warm-Up’ pa Sirbishi di Pionero Regular: Hopi di esnan cu tin e spiritu di pionero lo kier sirbi como pionero regular, pero nan ta puntra nan mes si nan tin e tempu, e circunstancianan of e resistencia pa esei. Indudablemente mayoria di esnan cu awor ta trahando como pionero regular a usa e sirbishi di pionero auxiliar promé como warm-up pa e trabou di tempu completo. Dor di aumentá bo orario di pionero auxiliar cu solamente un ora pa dia, of un dia completo pa siman, ta posibel pa cumpli cu e orario di pionero regular. Pa haña sa si esei ta posibel pa bo, pakico no purba dedicá 90 ora den e ministerio durante un of mas dje lunanan di sirbishi di pionero auxiliar? Na mésun tempu, lo bo desaroyá rebishita i studionan di Bijbel, locual lo permití bo disfrutá di un ministerio di pionero variá i balansá.
17 Un ruman muher a disfrutá di seis aña di sirbishi continuo di pionero auxiliar. Tur e tempu ei su meta tabata pa drenta e sirbishi di pionero regular. Cu e meta ei, el a purba cuater diferente trabou seglar cu e speransa di crea un situacion cu lo a haci posibel p’e alcansá e rekisito di 90 ora pa pionero regular. Tur luna, el a traha un of dos programa afin di calculá si esei lo por tabata posibel. Pero ora e examiná nan, e tabata sinti cu e ministerio di tempu completo tabata fuera di su alcanse. Tog, el a sigui pidi Jehova pa su guia. Anto un dia segun e tabata prepará pa e Reunion di Sirbishi, el a lesa un artículo den Nos Ministerio di Reino di september 1991 cu a bisa: “En bes di pone indebido énfasis riba e rekisito di ora, pakico no fiha atencion riba e oportunidad adicional pa participá den e trabou di cosecha? (Juan 4:35, 36)” E ta relatá: “Mi a bolbe lesa e frase aki cincu of seis biaha, i mi tabata hopi sigur cu esaki tabata e contesta di Jehova. N’e momento ei mi e tuma e decision di drenta e sirbishi di pionero regular.” Aunke su orario di trabou seglar ‘part-time’ no tabata esun di mas mihó, el a entregá su solicitud pa pionero regular. Un siman despues su orario di trabou a ser cambiá i el a haña oranan di trabou cu tabata net bon p’e. El a concluí, “No ta Jehova su man esaki ta?,” i a agregá: “Ora bo pidi Jehova pa guia i bo ricibié, no rechas’é—acept’é.” Si ta bo deseo sincero pa traha como pionero regular, kisas na final di tres luna di traha pionero auxiliar na mart, april i mei binidero, lo bo keda convencí di cu bo tambe por tin éxito den e ministerio di tempu completo.
18 Nos tin sigur cu Jehova lo bendicioná e celo i lo apoyá e esfuersonan di su pueblo segun cu nan ta publicá e bon nobo di salbacion durante e periodo special aki di actividad di primavera. (Isa. 52:7; Rom. 10:15) Abo lo respondé n’e yamada pa haña 400 pionero auxiliar dor di tin un participacion den mart? april? mei?
[Box on page 3]
Con pa Tin Exito Como un Pionero Auxiliar
■ Sea positivo cu lo bo tin éxito
■ Pidi Jehova den oracion pa bendicioná bo esfuersonan
■ Invitá un otro publicador pa traha pionero huntu cu bo
■ Traha un orario práctico di sirbishi
■ Haci pedido pa un suministro amplio di revista
■ Apoyá areglonan di congregacion pa sirbishi
■ Busca oportunidadnan pa testificá informalmente