Mustra Interes Amoroso den “Wèrfano”
1 Yehova ta “un tata di wèrfano.” (Sal. 68:5) E mandamentu aki ku el a duna e nashon di Israel di antigwedat ta mustra kuantu interes e tabatin den bienestar di wèrfano: “No afligí ningun biuda ni wèrfano. Si di un òf otro manera bo afligié, i e sklama na mi, lo mi tende su sklamashon sigur.” (Éks. 22:22, 23) Tabatin un areglo tambe den e Lei di Dios pa yuda hende asina den sentido material. (Deu. 24:19-21) Den e areglo kristian, adoradónan berdadero ta ser animá pa “bishitá [òf “kuida,” NW] wèrfano i biuda den nan aflikshon.” (Sant. 1:27) Kon nos por imitá e interes amoroso ku Yehova tin den mucha ku ta krese den famia di un solo mayor, òf den famia dividí den sentido religioso?
2 Entrenamentu Spiritual: Si bo ta un mayor soltero, òf bo kasá no ta kreyente, kisas ta un reto pa dirigí un studio di Beibel regular ku bo yunan. Pero un studio di Beibel regular i ku ta satisfasé e nesesidat di e famia ta esensial pa nan krese bira adultonan balansá i maduro. (Pro. 22:6) Ta vital tambe pa bo kòmbersá tur dia ku nan tokante temanan spiritual. (Deu. 6:6-9) Kisas lo bo sinti bo desanimá de bes en kuando, pero no entregá. Akudí na Yehova p’e duna bo forsa i guia pa bo sigui “lanta nan den e disiplina i instrukshon” di Yehova.—Efe. 6:4.
3 Si bo tin mester di yudansa pa karga bo responsabilidatnan bíbliko, laga e ansianonan sa. Kisas nan por duna bo sugerensia práktiko òf yuda bo forma un bon rutina spiritual pa bo hendenan di kas.
4 Kon Otronan Por Duna un Man: Den promé siglo, Timoteo a bira un sirbidó seloso di Yehova apesar ku el a krese den un famia dividí den sentido religioso. Sin duda, e esfuersonan diligente di su mama i su wela pa siñ’é e skrituranan santu a hunga un papel importante den esaki. (Echo. 16:1, 2; 2 Tim. 1:5; 3:15) Pero el a benefisiá tambe di trata ku otro kristiannan, inkluso apòstel Pablo, kende a yama Timoteo su “yu stimá i fiel den Señor.”—1 Kor. 4:17.
5 Awe tambe ta mashá benefisioso pa rumannan spiritualmente maduro mustra interes amoroso den muchanan wèrfano den e kongregashon. Bo sa nan tur su nòmber? Bo sa papia ku nan na reunion i na otro okashon? Invitá nan pa sali ku bo den sirbishi. Kisas de bes en kuando bo por invitá nan i nan mayor soltero, òf nan mayor kreyente, pa partisipá den boso studio di famia, òf den dibertishon sano. Ora e hóbennan aki ta konsiderá bo nan amigu, tin mas chèns ku nan lo imitá bo ehèmpel i sigui bo konsehonan.—Fil. 2:4.
6 Yehova tin hopi interes den wèrfano, i e ta bendishonando nos esfuersonan amoroso pa yuda nan hasi e bèrdat di nan mes. Hopi ruman ku a krese den famia di un solo mayor òf famia dividí a risibí tal animashon i aktualmente nan ta sirbi fielmente komo pionero, sirbidó ministerial, ansiano, superintendente biahero, misionero i miembro di famia di Bètel. Laga nos tur buska manera pa ‘habri nos kurason’ pa wèrfanonan, meskos ku nos Tata selestial ta hasi.—2 Kor. 6:11-13.