Yuda Otro Hende Benefisiá di e Reskate
Konmemorashon di e Morto di Kristu Lo Tuma Lugá Dia 12 di Aprel
1 “Laga nos gradisí Dios pa su regalo ku no por deskribí ku palabra.” (2 Kor. 9:15, Beibel na papiamentu koriente) E palabranan aki ta ekspresá bon kla loke nos ta sinti tokante e bondat i amor leal ku Dios ta ekstendé na su pueblo mediante su Yu Hesukristu. Nos gratitut na Dios lo ta bisto spesialmente ora nos reuní huntu dia 12 di aprel pa konmemorá e morto di Kristu.
2 Tur aña mas o ménos 10 mion hende ku no ta Testigu ta asistí n’e selebrashon di e Memorial huntu ku e sirbidónan di Yehova. Asina e otro personanan aki ta demostrá ku nan tin un grado di apresio pa e sakrifisio di Kristu. Sin embargo, pa nan benefisiá di e reskate, nan tin ku ehersé fe den dje. (Juan 3:16, 36) Kon nos por yuda nan kultivá e fe ei? Durante e temporada aki di Memorial, nos por animá nan pa aseptá un estudio personal di Beibel i pa asistí na e reunionnan semanal di kongregashon. Konsiderá e siguiente sugerensianan.
3 Estudio di Beibel: Ora bo ta invitá personanan interesá pa Memorial, pakiko no purba kuminsá un estudio di Beibel ku nan den e buki Beibel Ta Siña? Ofresé nan pa duna un splikashon tokante e selebrashon di Memorial a base di e tópiko “E Sena di Señor—Un Konmemorashon Ku Ta Onra Dios” na página 206-8. Lo bo por konsiderá e informashon ei durante un òf dos bishita, kisas komo un estudio di Beibel na porta. Ora bo kaba e informashon ei, e persona podisé ta dispuesto pa konsiderá kapítulo 5, “Dios Su Regalo di Mas Grandi: E Reskate.” Asina ku un estudio regular keda establesí, bai dilanti bèk den e buki i konsiderá e promé kuater kapítulonan.
4 Ku ken nos por kuminsá un estudio di Beibel usando e método aki? Podisé algun di bo kompañeronan di trabou, di skol òf bisiñanan lo bai di akuerdo pa bo konsiderá e informashon ei ku nan. Rumannan hòmber por aserká e kasánan no-kreyente di rumannan muhé den e kongregashon. I no lubidá bo propio famianan ku no ta Testigu. Ademas, nos lo ke hasi un esfuerso spesial pa invitá na Memorial esnan ku un tempu tabata asosiá aktivamente ku e kongregashon. (Luk. 15:3-7) Laga nos hasi esfuerso pa yuda tur e personanan ei benefisiá di e reskate.
5 Reunionnan di Kongregashon: Pa hopi studiante di Beibel i otro personanan interesá, Memorial ta e promé reunion na kua nan ta asistí. Pero kon nos por animá nan pa asistí i benefisiá di nos otro reunionnan di kongregashon? Nos Ministerio di Reino di aprel 2005, página 8, ta duna e siguiente sugerensianan: “Menshoná e tema di e siguiente diskurso públiko. Mustra nan e informashon ku lo ser konsiderá den e Estudio di Toren di Vigilansia i na e Estudio di Buki di Kongregashon. Deskribí e Skol di Ministerio Teokrátiko i e Reunion di Sirbishi. Ora bo tin un parti den e skol, kisas bo por repas’é ku nan. Konta nan di puntonan sobresaliente ku a bin padilanti na e reunionnan. Usa plachinan den nos publikashonnan pa yuda nan visualisá loke ta tuma lugá. Invitá nan na reunion for di e promé bes ku bo studia ku nan.”
6 Ora personanan sinsero tin un estudio di Beibel regular i ta asistí regularmente na e reunionnan, hopi bes nan ta progresá lihé spiritualmente. P’esei, laga nos animá otro hende pa probechá di e provishonnan spiritual aki i benefisiá di Dios su regalo di mas grandi: e reskate.
[Study Questions]
1. Den ki manera e pueblo di Dios ta ekspresá nan apresio pa e reskate?
2. Ken ta asistí na Memorial huntu ku e sirbidónan di Yehova, i kiko nan tin mester pa benefisiá di e reskate?
3. Kon nos por kuminsá un estudio di Beibel ora nos ta invitá un persona pa Memorial?
4. Ku ken nos por kuminsá un estudio di Beibel durante e temporada aki di Memorial?
5. Kon nos por animá studiantenan di Beibel i otro personanan interesá pa asistí na nos reunionnan semanal di kongregashon?
6. Kua ta e dos maneranan ku nos por yuda hende sinsero benefisiá di e reskate?