Laga Nos Mustra Apresio Memorial Lo Ta Riba 17 di Aprel

1. Ki sintimentu di e salmista ta kuadra ku e temporada di Memorial?

¹ E echo ku Yehova hopi bes a mustra miserikòrdia na su pueblo i a liberá nan, a motivá e salmista pa puntra: “Kiko lo mi duna SEÑOR pa tur su benefisionan na mi?” (Sal. 116:⁠12) Awe, Dios su sirbidónan tin asta mas motibu pa ta gradisidu. Hopi siglo despues ku e salmista a skirbi e palabranan ei bou di inspirashon, Yehova a duna humanidat e regalo di mas grandi: e reskate. Miéntras nos ta prepará pa konmemorá Kristu su morto riba 17 di aprel, nos tin bon motibu pa mustra gratitut.​—⁠Kol. 3:⁠15.

2. Ki motibunan nos tin pa mustra apresio pa e reskate?

² Bendishonnan Ku e Reskate Ta Trese: Debí na e reskate, nos por haña “pordon di [nos] pikánan.” (Kol. 1:​13, 14) Esaki ta hasi posibel ku nos por adorá Yehova ku un konsenshi limpi. (Heb. 9:​13, 14) Pues, nos por aserká Yehova den orashon ku konfiansa, esta ku frankesa. (Heb. 4:​14-⁠16) Ademas, esnan ku tin fe den e reskate lo tin e maravioso speransa di biba pa semper!​—⁠Juan 3:⁠16.

3. Kon nos por mustra Yehova ku nos ta apresiá e reskate?

³ Demostrá Apresio: Un manera ku nos por demostrá nos apresio profundo ta dor di lesa e porshon di Beibel pa e temporada di Memorial kada dia i meditá riba dje. Den E Toren di Vigilansia di 1 di febrüari 2011 tin e artíkulo “Bo Ta Prepará pa e Dia Mas Importante di Aña?” ku ta yuda nos spesialmente ku esei. Ademas, nos por bisa Yehova den orashon sinsero kuantu nos ta balorá e reskate. (1 Tes. 5:​17, 18) Nos ta mustra nos gratitut tambe ora nos obedesé e mandato di Hesus i asistí na Memorial. (1 Kor. 11:​24, 25) Ademas, nos por imitá e amor inkomparabel di Yehova i invitá mas tantu hende posibel pa asistí huntu ku nos.​—⁠Isa. 55:​1-⁠3.

4. Kiko mester ta nos determinashon?

⁴ Sirbidónan apresiativo di Yehova lo no mira Memorial komo djis un reunion mas. Esaki ta e reunion di mas importante di henter aña! Segun ku Memorial ta yega serka, laga nos ta determiná pa hasi meskos ku e salmista, kende a bisa: “Bendishoná SEÑOR, o mi alma, i no lubidá ni un di su benefisionan.”​—⁠Sal. 103:⁠2.