“Hasi Esaki na Mi Rekuerdo”
Lo Konmemorá e Morto di Hesus Dia 2 di Aprel
1 Dia 2 di aprel 2007, miónes di hende rònt mundu lo reuní pa konmemorá Hesus su morto komo sakrifisio. Hesus a muri pasobra el a apoyá e soberania di su Tata selestial. Asina el a duna prueba ku Satanas e Diabel a lansa un akusashon falsu ora el a pretendé ku hende ta sirbi Dios solamente pa motibunan egoista. (Jòb 2:1-5) Ademas, e Sena di Señor ta rekordá nos ku mediante Hesus su morto komo un hende perfekto i sin piká, el a “duna su bida komo preis di reskate pa hopi.” (Mat. 20:28) P’esei Hesus a bisa su disipelnan: “Hasi esaki na mi rekuerdo.” (Luk. 22:19) Nos apresio pa e regalo presioso aki di Dios a motivá nos pa kuminsá hasi preparashon pa konmemorá e akto supremo di amor aki?—Juan 3:16.
2 Prepará Bo Kurason: Nos por prepará nos kurason pa e selebrashon di Memorial dor di konsiderá loke a pasa riba kada un di e último dianan di Hesus su bida komo hende. (Esd. 7:10, NW) Pa yuda nos ku esaki, den e foyeto Eksaminando e Skritura Diariamente—2007 i riba e Kalènder 2007 tin un programa spesial di lesamentu di Beibel. E dianan den e programa di lesamentu riba kua e susesonan relashoná ku e morto di Hesus a tuma lugá, ta kore kasi paralelo ku e dianan segun nos kalènder djawe. E dianan i fechanan ku e relatonan bíbliko ta referí na dje ta basá riba e kalènder hudiu; segun e kalènder hudiu un dia ta kore for di un bahada di solo te na e siguiente bahada di solo. A tene kuenta ku e diferensia aki i bo por ripar’é den e programa di lesamentu di Beibel pa Memorial. Ora nos repasá e informashon aki i meditá ku orashon riba e profundidat di Dios su amor, esaki lo yuda nos benefisiá plenamente di e selebrashon di Memorial.
3 Invitá Otro Hende pa Asistí: E suplemento di Nos Ministerio di Reino di febrüari a anunsiá un kampaña spesial pa invitá hende na e evento importante aki. Bo a prepará pa partisipá plenamente den e kampaña aki? Bo a traha un lista di bo konosínan ku bo ke invitá? Bo a kuminsá tuma kontakto ku nan? Plania pa bo t’ei sufisiente trempan riba e anochi di Memorial pa bo duna un bonbiní na bo invitadonan i na otro hende interesá. Podisé bo por sinta banda di nan i hasi sigur ku nan tin un Beibel i buki di kantika. Introdusí nan na otro rumannan di kongregashon. Despues di e reunion, tuma tempu pa kontestá nan preguntanan. Invitá nan pa asistí na e diskurso públiko spesial ku lo ta dia 15 di aprel. Ansianonan spesialmente lo ta interesá pa hasi sigur ku personanan ku tabata asosiá ku e kongregashon pero ku a bira inaktivo ta haña un invitashon pa Memorial i p’e diskurso spesial.
4 Yuda Hende Resien Interesá i Esnan Inaktivo Progresá: E oradó na Memorial lo splika brevemente nos areglo di estudio di Beibel i animá personanan resien interesá pa sigui siña di Yehova. Bo por usa su komentarionan komo base pa ofresé mas yudansa spiritual na hende ku bo a invitá. Si nan no ta studiando Beibel aktualmente, hasi sigur di bishitá nan pronto despues di Memorial i laga nan mira kon un estudio di Beibel grátis ta bai. Pa nan por progresá spiritualmente, nan tin ku asistí tambe na e reunionnan di kongregashon. (Heb. 10:24, 25) Ku esaki na mente, animá nan pa kuminsá asistí regularmente. Ansianonan mester bishitá kristiannan inaktivo ku a bini Memorial i yuda nan sigui pensa riba loke a bin padilanti den e diskurso. Esaki lo por animá nan pa bolbe bira aktivo den e kongregashon.
5 E selebrashon di Memorial ta duna nos un oportunidat pa reflekshoná seriamente riba loke Yehova i Hesus a hasi pa nos. E meditashon ei ta profundisá nos amor pa nan i ta influensiá nos kondukta. (2 Kor. 5:14, 15; 1 Juan 4:11) Awor ta e tempu pa nos kuminsá prepará nos mes i personanan interesá pa e okashon importante aki durante kua nos “ta proklamá e morto di Señor.”—1 Kor. 11:26.
[Study Questions]
1. Dikon 2 di aprel 2007 ta un fecha importante?
2. Kon nos por prepará nos kurason pa Memorial?
3. Kon nos por yuda hende interesá i esnan inaktivo benefisiá di Memorial?
4. Kon nos por yuda hende ku asistí na Memorial sigui progresá spiritualmente despues di e konmemorashon?
5. Ki efekto e selebrashon di Memorial lo por tin riba nos?