Siña Hende Ku No por Lesa Muchu Bon

1. Ki desafio nos sa haña nos kuné den sirbishi?

¹ Den sirbishi tin biaha nos ta topa hende ku tin problema ku lesamentu. Ta un desafio pa siña nan e bèrdat. Kiko nos por hasi?

2. Kon i dikon nos ta mustra rèspèt pa esnan ku no por lesa muchu bon?

² Mustra Rèspèt pa Nan: Loke ta konta pa Yehova ta un hende su kurason i no su edukashon. (1 Sam. 16:⁠7; Pro. 21:⁠2) P’esei, nos no ta menospresiá hende ku no por lesa muchu bon. Nan lo ta mas dispuesto pa aseptá yudansa si nos ta respetá nan i tene pasenshi ku nan. (1 Ped. 3:⁠15) Esei ta enserá ku nos lo no insistí pa e persona lesa un teksto bíbliko òf un paragraf. Segun ku un hende ta siña mas di e bèrdatnan presioso di Beibel, mas ansioso e ta bira pa mehorá su abilidat di lesa pa e por eksperensiá e goso di lesa e Palabra di Dios “na bos abou di dia i anochi.”​—⁠Sal. 1:​2, 3, NW.

3. Ki método nos por usa pa siña esnan ku no por lesa muchu bon?

³ Diferente Manera Ku Bo Por Siña Studiantenan di Beibel: Un método ekselente pa siña hende i yuda nan kòrda loke nan a siña ta dor di usa plachi. Bo por puntra e studiante kiko e ta mira riba e plachi den e publikashon ku boso ta usando. Despues hasié pregunta spesífiko pa yud’é komprondé kiko e plachi ke siña nos. Usa tekstonan di Beibel ku ta siñ’é sierto punto spesífiko di e plachi. Kisas bo por usa plachi pa hasi repaso tambe. No kubri demasiado informashon den un solo biaha. Konsentrá riba e tema i e puntonan prinsipal di e lès, i evitá di bin ku informashon ku no ta al kaso. Lesa e tekstonan direktamente for di Beibel, i hasi pregunta pa wak si e studiante realmente a komprondé loke a ser lesá. Esei por oumentá su deseo di mehorá su lesamentu pa asina e mes por bai buska mas bèrdatnan bíbliko.

4. Kon nos por yuda nos studiantenan mehorá nan lesamentu?

⁴ Yudansa pa Mehorá Lesamentu: Hende ku no por lesa muchu bon òf ku no tabatin e oportunidat pa siña lesa bon kisas tin e abilidat sí pa komprondé i retené informashon. Den kasonan asina, ta bon pa bo animá nan pa skucha grabashon di nos publikashonnan ku ta disponibel òf pa skucha bon lesadónan atentamente, siguiendo e lesamentu den e publikashon imprimí, asta ripitiendo e palabranan na bos abou. Esei lo yuda nan mehorá nan lesamentu. Den algun área, ansianonan por programá lèsnan di lesamentu den e kongregashon. E sugerensianan práktiko akí por ta útil pa nos yuda esnan ku no por lesa muchu bon komprondé “e skrituranan santu” ku ta duna nan sabiduria ku ta hiba na salbashon.​—⁠2 Tim. 3:⁠15.