Lo Parti Invitashon di Memorial Rònt Mundu!

1. Ki kampaña spesial ta bai tin rònt mundu promé ku Memorial?

¹ Hesus a bisa, sigui “hasi esaki na mi rekuerdo.” (Luk. 22:⁠19) Riba 30 di mart 2010, adoradónan di Yehova huntu ku hende interesá lo obedesé e mandamentu pa konmemorá Hesus morto. Nos lo parti un invitashon spesial di Memorial rònt mundu. Nos lo hasi esaki for di 13 di mart te ku 30 di mart.

2. Kon nos por hasi e invitashon?

² Kon pa Invitá Hende: Kisas lo bo por mustra e doño di kas e plachi parti dilanti riba e invitashon, i bis’é: “Djamars anochi 30 di mart, miónes di hende rònt mundu lo reuní pa konmemorá e morto di Hesus. Mi a trese e invitashon akí pa abo ku bo famia. Bo amigunan tambe ta bon biní. Riba e invitashon bo ta mira e ora i sitio kaminda lo tene Memorial.” Dependé di e sirkunstansia, bo por opta pa lesa Lukas 22:19 for di Beibel pa mustr’é e mandamentu bíbliko. Pero kòrda sí ku nos no tin hopi dia pa kubri e teritorio i p’esei ta mihó pa nos ta breve.

3. Ken nos por invitá?

³ Si boso kongregashon tin un teritorio grandi, e ansianonan por duna instrukshon pa laga e invitashon kaminda no tin hende na kas na e promé bishita. Ora ta apropiá, ofresé e revistanan huntu ku e invitashon. Kòrda invitá bo rebishitanan, studiantenan di Beibel, koleganan di trabou, kompañeronan di skol, famianan, bisiñanan i konosínan.

4. E echo ku Yehova amorosamente a proveé e reskate, ta konmové nos pa hasi kiko?

⁴ Prepará pa Partisipá Plenamente: Durante temporada di Memorial nos tin un ekselente oportunidat pa hasi mas den sirbishi. Bo por ahustá bo programa pa traha pionero ousiliar? Bo tin yu òf studiante di Beibel ku ta hasiendo progreso spiritual? Si ta asina, aserka e ansianonan pa wak si e yu òf studiante di Beibel ta kualifiká pa traha huntu ku nos komo publikadó no-batisá den e kampaña spesial akí. Yehova amorosamente a proveé e reskate pa nos. Esei ta konmové nos no solamente pa ta presente na Memorial sino tambe pa invitá mas tantu hende posibel pa reuní ku nos.​—⁠Juan 3:⁠16.