Nos Lo Kuminsá Parti Invitashon di Memorial Dia 2 di Aprel
1. Durante ki periodo nos ta bai parti invitashon di Memorial e aña akí, i kon importante e kampaña akí ta?
1 For di dia 2 di aprel te ku dia 17 di aprel nos lo parti invitashon pa e evento di mas importante di henter aña: e Konmemorashon di Kristu su morto. Den pasado, hopi hende interesá a aseptá e invitashon durante e kampaña anual akí. Por ehèmpel, un señora a yama sukursal riba e dia di Memorial i a bisa: “Mi a kaba di yega kas i bou di mi porta tabatin un invitashon. Mi kier asistí, pero mi no sa ta kuant’or e evento ta.” E ruman a splik’é unda e por haña e informashon ei riba e invitashon. Na fin di e kòmbersashon e señora a primintí: “Lo mi t’ei presente.”
2. Ora nos duna hende e invitashon, kiko nos por bisa?
2 Kon Nos Ta Bai Hasié? Ya ku e periodo ku nos tin pa kubri e teritorio ta limitá, lo ta mihó pa nos ta breve. Nos por bisa: “Kon ta bai? Nos ke invitá abo i bo famia na un evento anual masha importante ku lo tuma lugá rònt mundu riba djadumingu 17 di aprel. [Duna e doño di kas e invitashon.] Riba e fecha ei nos ta konmemorá e morto di Hesus. Lo tin un diskurso basá riba Beibel ku lo splika kon nos por benefisiá di Kristu su reskate. Entrada ta grátis. E invitashon akí ta menshoná e ora i sitio di e reunion ku lo tuma lugá den nos área.”
3. Kon nos por invitá mas tantu hende posibel?
3 Si e teritorio di kongregashon ta grandi, e ansianonan por duna instrukshon pa laga e invitashon maske no tin hende na kas, kon tal ku e ta kompletamente for di bista di hende. Kòrda invitá bo rebishitanan, famianan, koleganan di trabou, kompañeronan di skol i konosínan. Ora nos ta bai parti invitashon den wikènt, nos por ofresé revista si ta apropiá. Abo por traha pionero ousiliar durante aprel i asina partisipá mas tantu den e kampaña gososo akí?
4. Dikon nos ta deseá pa e hendenan ku ta mustra interes asistí na Memorial?
4 Esaki lo ta un testimonio poderoso pa esnan ku asistí na e evento akí. Nan lo tende tokante e gran amor ku Yehova a mustra ora el a perkurá e reskate. (Juan 3:16) Nan lo haña sa kon Dios su Reino lo benefisiá humanidat. (Isa. 65:21-23) Nan lo ser animá pa aserká e ùshernan i pidi un estudio di Beibel pa nan por siña mas. Nos ta pidi den orashon pa tur hende di kurason sinsero aseptá e invitashon durante e kampaña akí i asistí huntu ku nos na Memorial!