“Keda na Pas ku Tur Hende”
1. Ki konseho di Beibel nos mester kòrda ora un doño di kas rabia ku nos?
1 E pueblo di Yehova ta hende pasífiko ku ta prediká un mensahe di pas. (Isa. 52:7) Sinembargo, tin hende ta rabia ora nos yama na nan porta. Den un situashon asina, kiko por yuda nos keda kalmu i na pas ku e doño di kas?—Rom. 12:18.
2. Dikon ta importante pa nos komprondé reakshon di e doño di kas?
2 Komprondé e Motibu: Tin hende ta rabia pasobra nan ta kontra di e bèrdat, ma otronan ta rabia pa motibunan ku no tin nada di haber ku nos sirbishi. Kisas nos a yama na un mal momento. Òf e doño di kas ta rabiá debí na un problema personal. I asta si ta nos mensahe ta pon’é kunsumí, esei muy probablemente ta debí na loke otro hende a bis’é di nos komo Testigunan. (2 Kor. 4:4) Ora nos komprondé dikon e ta reakshoná asina, esei lo yuda nos keda kalmu i evitá di tuma su reakshon komo algu personal.—Pro. 19:11.
3. Kon nos por mustra rèspèt na e doño di kas?
3 Mustra Rèspèt: Tin hopi hende den teritorio ku ta masha pegá na nan kreensianan. (2 Kor. 10:4) Nan tin derecho di disidí si nan ke skucha òf nò. Hamas nos lo ke falta rèspèt pa e doño di kas su kreensianan òf lag’é sinti ku nos ta mas sabí kuné. Si e doño di kas pidi nos pa bai for di su porta, respetuosamente nos ta kumpli ku su petishon.
4. Kiko ta nifiká papia ku grasia?
4 Papia ku Grasia: Asta si nan zundra nos, nos kontesta mester ta suave i ku grasia. (Kol. 4:6; 1 Ped. 2:23) En bes di drenta den diskushon, nos mester buska puntonan ku nos tin en komun. Kisas nos por puntra e doño di kas amablemente kiko ta e motibu di su opheshon. Sinembargo, tin biaha ta mihó pa no sigui ku e kòmbersashon i pone e doño di kas rabia mas ainda.—Pro. 9:7; 17:14.
5. Ki benefisio nos lo haña ora nos keda na pas ku tur hende den sirbishi?
5 Si nos ta pasífiko, e doño di kas kisas lo kòrda kon nos a reakshoná i lo skucha e mensahe e próksimo biaha ku un Testigu purba di papia kuné. (Rom. 12:20, 21) Asta si e ta keda para riba su punto, bo no sa nunka, un dia e por bira nos ruman. (Gal. 1:13, 14) Sea ku e aseptá e bèrdat òf nò, si nos mustra dominio propio i keda na pas ku tur hende, nos lo onra Yehova i dòrna nos siñansa.—2 Kor. 6:3.