Kon pa Mehorá Nos Sirbishi: Nos Manera di Kontestá un Persona Rabiá

Dikon E Ta Importante: Mayoria di hende ku nos topa den sirbishi ta amabel. Sinembargo, Hesus a profetisá ku algun hende lo odia nos. (Huan 17:14) P’esei, nos no mester keda sorprendí si nos topa un persona rabiá den sirbishi. Ora nos haña nos ku un situashon asina, nos mester kontestá na un manera ku ta laga Yehova, esun ku nos ta representá, keda kontentu. (Rom. 12:17-21; 1 Ped. 3:15) Nos kontesta suave por evitá ku kos por sali for di man. Ademas, esei por ta un testimonio pa tantu e persona komo esnan ku ta mira, i esaki por pone ku nan por skucha ora un Testigu di Yehova pasa un otro biaha.—2 Kor. 6:3.

Kon pa Hasié:

Keda trankil i amigabel. Di e manera ei bo por baha e tenshon. No pensa ku ta ku bo e persona ta rabiá. (Ekl. 7:9) Kisas e tin problema personal òf bo a yama na un mal momento. I asta si ta nos mensahe ta pon’é kunsumí, mayoria di biaha esei ta debí ku e ta malinformá.—2 Kor. 4:4.
Kontestá na un manera suave. (Pro. 15:1) Bo a lant’é for di soño òf strob’é ku su kosnan di hasi? Aunke nos no ta pidi despensa pa e echo ku nos ta kumpli ku e trabou di prediká, nos por pidi despensa sí pa e echo ku nos a yama na un mal momento. Si e persona ta rabiá debí na rumornan falsu ku el a tende di nos, bo por bis’é: “Mi por komprondé dikon bo ta asina rabiá. Sinembargo, e informashon ku nan a duna bo no ta korekto. Mi por splika bo dikon?” Pero kiko si e no ta di akuerdo ku un di nos kreensianan, kisas tokante ekspulshon òf sanger? Bo por kontest’é: “Mi ta komprondé. Tin mas hende ku e mesun preokupashon. Pero bo tabata sa ku e siñansa ei ta basá riba Beibel? Bo ta permití mi mustra bo esei?”
Si e persona ta sumamente rabiá, ta mihó pa nos bai sin bisa nada. Si e bisa ku e no ke pa Testigunan di Yehova yama na su kas, bis’é ku nos lo respetá esei.

Purba di Hasi Esaki Durante e Luna Akí:

Tene seshonnan di práktika durante bo estudio di famia.
Despues di a papia ku un persona rabiá den sirbishi, puntra bo kompañero kon bo por a trata ku e situashon na un mihó manera.