Loke Hesus A Bisa Tokante e Fin

BAN WAK DOS KOS KU HESUS A BISA TOKANTE E FIN:

“P’esei, keda vigilá, pasobra boso no sa ni e dia ni e ora.”—MATEO 25:13.

“Keda alerta, keda lantá, pasobra boso no sa ki ora e tempu stipulá ta.”—MARKO 13:33.

Pues, no tin niun hende na mundu ku sa presis ki dia e fin lo yega. Pero Dios sí a stipulá un tempu, un “dia i ora” spesífiko, pa e fin yega. (Mateo 24:36) Esei ke men ku no tin niun manera pa hende sa si e fin ta serka? Nò. Hesus a bisa su disipelnan pa nan paga tinu riba sierto suseso ku lo mustra ku e fin ta hopi serka.

E SEÑAL

E susesonan ei lo ta e señal “di konklushon di e era akí.” Hesus a bisa: “Nashon lo lanta kontra nashon i reino kontra reino, i lo tin skarsedat di kuminda i temblor den un lugá tras di otro.” (Mateo 24:3, 7) El a bisa tambe ku lo “tin pèst”—epidemia. (Lukas 21:11) Abo ta mira tur e kosnan ku Hesus a bisa ei ta pasando aworakí?

Hopi hende ta sufri debí na guera, hamber, temblor i un malesa tras di otro. Por ehèmpel, na 2004, un temblor fuerte a kousa un tsunami den Oséano Indio ku a mata kasi 225.000 hende. Den tres aña, e pandemia di COVID-19 a mata mas ku 6.9 mion hende rònt mundu. Hesus a bisa ku e tipo di susesonan ei lo indiká ku e fin ta serka.

“E ÚLTIMO DIANAN”

Beibel ta bisa ku lo yama e periodo nèt promé ku e fin “e último dianan.” (2 Pedro 3:3, 4) Dos Timoteo 3:1-5 ta bisa ku “den e último dianan” hende lo no ke biba segun e normanan moral di Dios. (Wak e kuadro “Nèt Promé ku Fin di Mundu.”) Bo a ripará ku hende awendia ta egoista, golos, violento i sin amor? Tur e kosnan ei tambe ta mustra ku fin di mundu ta masha serka mes.

Pero, ta kon largu e último dianan lo dura? Beibel ta bisa ku esei lo dura solamente un “poko tempu.” Djei, Dios lo destruí “esnan ku ta kaba ku e tera.”—Revelashon 11:15-18; 12:12.

PRONTO TERA LO BIRA UN PARADEIS!

Dios ya kaba a pone un dia i un ora ku lo e kaba ku tur e kosnan malu ku ta pasa. (Mateo 24:36) Pero, Dios “no ta deseá pa ningun hende ser destruí.” (2 Pedro 3:9) E ta dunando nos chèns pa siña tokante dje i obedes’é. Dikon? Pasobra e ke pa nos sobrebibí e fin di e mundu akí i biba den su mundu nobo, kaminda e tera lo bira un paradeis.

Dios ta hasiendo sigur ku tur hende rònt mundu por haña sa kiko nan mester hasi pa biba den Paradeis goberná pa su Reino. Hesus a bisa ku e bon notisia tokante e Reino di Dios “lo ser prediká den henter e tera habitá.” (Mateo 24:14) Rònt mundu, Testigunan di Yehova ta pasa míles di miónes di ora ta prediká i siña hende tokante e bunita speransa ku Beibel ta duna. Hesus a bisa ku e predikashon ei lo tuma lugá rònt mundu promé ku e fin yega.

E dianan di e gobièrnunan humano ta kontá. Pero, e bon notisia ta ku bo por sobrebibí e fin di e mundu akí i biba aki riba tera den e paradeis ku Dios a primintí. E siguiente artíkulo lo yuda bo mira kiko abo tin ku hasi pa bo por biba den Paradeis.